សម្តេចតេជោ ហ៊ុន សែន នឹងអញ្ជើញទទួលវ៉ាក់សាំងកូវីដ១៩ ដែលជាអំណោយរបស់ប្រទេសប៉ូឡូញ នៅល្ងាចនេះ
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញទទួលវ៉ាក់សាំងកូវីដ១៩ ប្រភេទអាស្ត្រាហ្សេនីកា ចំនួន ៣០ម៉ឺនដូស ដែលជាអំណោយរបស់រដ្ឋាភិបាលប៉ូឡូញ ផ្តល់ជូនរាជដ្ឋាភិបាល និងប្រជាជនកម្ពុជា ខណៈវ៉ាក់សាំងនេះ នឹងត្រូវដឹកមកដល់អាកាសយានដ្ឋានអន្តរជាតិភ្នំពេញ នៅល្ងាចថ្ងៃទី២៥ ខែមករា ឆ្នាំ២០២២ ។
សូមរំលឹកថា ប្រទេសដែលបានផ្តល់ជំនួយវ៉ាក់សាំងមកកម្ពុជា កន្លងទៅរួមមាន៖ ចិន, ជប៉ុន, អាមេរិក, អង់គ្លេស, អូស្ត្រាលី និងហូឡង់ជាដើម។ វត្តមានវ៉ាក់សាំងដ៏ច្រើននៅកម្ពុជា បានមកពីការបញ្ជាទិញផង និងជំនួយផង ដែលបានធ្វើឱ្យកម្ពុជា សម្រេចបានការចាក់វ៉ាក់សាំង ជូនប្រជាពលរដ្ឋយ៉ាងឆាប់រហ័សមុនផែនការកំណត់។
វ៉ាក់សាំងបង្ការជំងឺកូវីដ១៩ គឺឧបករណ៍ដ៏ចាំបាច់មួយបន្ថែមពីលើវិធានសុខាភិបាល ដើម្បីប្រយុទ្ធប្រឆាំងការរាតត្បាតជំងឺកូវីដ១៩ និងការពាអាយុជីវិតប្រជាពលរដ្ឋពីជំងឺកូវីដ១៩។ កន្លងទៅនេះ រាជរដ្ឋាភិបាល បានដាក់ចេញនូវវិធានការជាបន្តបន្ទាប់ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងវីដ-១៩ សំដៅការពារសុខភាព និងអាយុជីវិតរបស់ប្រជាជន រហូតសម្រេចបាននូវការបើកដំណើរការប្រទេសជាតិពេញលេញឡើងវិញលើគ្រប់វិស័យ និងសម្រេចបិទបញ្ចប់ “ព្រឹត្តិការណ៍សហគមន៍២០ កុម្ភៈ”។
ជាមួយគ្នានេះ ការសម្រេចបាន នូវវឌ្ឍនភាពដ៏ល្អប្រសើរទាំងនេះ គឺដោយសាររាជរដ្ឋាភិបាលបានដាក់ចេញ និងបានអនុវត្តយ៉ាងសកម្មនូវគោលនយោបាយចាក់វ៉ាក់សាំងកូវដ-១៩ ដែលជាយុទ្ធសាស្រ្តគន្លឹះដ៏សំខាន់មួយ និងជាខ្សែក្រវាត់ការពារទី១ ដើម្បីបង្កើតឱ្យបាននូវភាពស៊ាំសហគមន៍ទប់ទល់នឹងមេរោគកូវីដ-១៩ ដែលគិតមកទល់ពេលនេះ ព្រះរាជាណាចក្រកម្ពុជា សម្រេចបានការចាក់វ៉ាក់សាំងជូនប្រជាជនដែលមានអាយុចាប់ពី ៥ ឆ្នាំឡើងទៅ បានប្រមាណជិត ៩០% ធៀបនឹងគោលដៅប្រមាណ ១៦លាននាក់ ក្នុងនោះ មានប្រជាជនប្រមាណ ៤លាននាក់ បានទទួលការចាក់វ៉ាក់សាំងដូសជំរុញ ៕ ដោយវណ្ណលុក