សហរដ្ឋអាមេរិកបញ្ជាអោយទាហាន ៨.៥០០នាក់ប្រុងជើងការខ្ពស់ ចំពេលមានភាពតានតឹងនៅអ៊ុយក្រែន
វ៉ាស៊ីនតោន៖យោធាអាមេរិកបានបញ្ជាអោយកងទ័ព ៨ពាន់៥រយនាក់ប្រុងជើងការខ្ពស់សម្រាប់លទ្ធភាពដាក់ពង្រាយទៅកាន់អឺរ៉ុប ដែលជាផ្នែកមួយនៃកងកម្លាំងឆ្លើយតបរបស់អង្គការណាតូ ចំពេលមានការព្រួយបារម្ភកាន់តែខ្លាំងឡើងថា រុស្ស៊ីអាចនឹងធ្វើចំណាត់ការយោធាឆាប់ៗនេះលើអ៊ុយក្រែន។
អ្នកនាំពាក្យមន្ទីរបញ្ចកោណលោក ចន ឃឺប៊ី និយាយថា កងទ័ពដែលមានមូលដ្ឋាននៅសហរដ្ឋអាមេរិកប្រមាណ ៨ពាន់៥រយនាក់កំពុងត្រូវបានដាក់ឱ្យប្រុងជើងការខ្ពស់ សម្រាប់លទ្ធភាពដាក់ពង្រាយមិនមែនទៅកាន់អ៊ុយក្រែនទេ ប៉ុន្តែទៅកាន់ទឹកដីរបស់អង្គការណាតូនៅអឺរ៉ុបខាងកើត ជាផ្នែកមួយនៃកងកម្លាំងសម្ព័ន្ធមិត្ត ដែលនេះមានន័យថា ជាសញ្ញានៃការប្តេជ្ញាចិត្តរួមមួយដើម្បីទប់ស្កាត់ការឈ្លានពានខ្លាំងឡើងរបស់រុស្ស៊ី។ ប៉ុន្តែលោក ឃឺប៊ី បានសង្កត់ធ្ងន់ថា លោក អូស្ទីន ក៏ចង់បានចំនួនទាហានដែលមិនបានបញ្ជាក់ ដើម្បីត្រៀមខ្លួនសម្រាប់ឧបទ្ទវហេតុផ្សេងទៀតផងដែរ។ លោក ឃឺប៊ី បានប្រាប់សន្និសីទសារព័ត៌មានមួយថា អ្វីដែលកំពុងកើតឡើងនៅពេលនេះ គឺធ្វើឱ្យពួកគេត្រៀមខ្លួនជាស្រេចនៅលើខ្សែបន្ទាត់ខ្លីមួយ។
ទោះបីជាយ៉ាងណា រុស្ស៊ីបានបដិសេធថា ខ្លួនមិនបានរៀបចំផែនការឈ្លានពាននោះទេ ហើយថា ការចោទប្រកាន់របស់លោកខាងលិចគ្រាន់តែជាការបិទបាំង ចំពោះការបង្កហេតុដែលបានគ្រោងទុករបស់អង្គការណាតូប៉ុណ្ណោះ៕ ប្រភព៖ CNA
