អ្នកការទូតអាមេរិកមួយចំនួនចង់ចាកចេញពីប្រទេសចិន ដោយសារតែបម្រាមកូវីដ-១៩តឹងរឹងពេក
ស្ថានទូតអាមេរិកប្រចាំនៅទីក្រុងប៉េកាំងបានស្នើសុំក្រសួងការបរទេសរបស់ខ្លួនកាលពីថ្ងៃច័ន្ទកន្លងទៅ ដើម្បីអនុញ្ញាតឱ្យអ្នកការទូត និងគ្រួសាររបស់ពួកគេត្រលប់ទៅស្រុកវិញជាផ្លូវការ ដោយសារតែចិនដាក់បម្រាមកូវីដ-១៩តឹងតែងពេក ស្របពេលដែលព្រឹត្តិការណ៍អូឡាំពិករដូវរងានឹងឈានមកដល់។ នេះបើតាមការចុះផ្សាយរបស់សារព័ត៌មានរ៉យទ័រ។
បម្រាមទាំងនោះរួមមានការបង្ខំឱ្យចូលព្យាបាលទៅក្នុងមណ្ឌលព្យាបាលជំងឺកូវីដ-១៩ ក៏ដូចជាការពង្រាត់ចេញពីកូនៗរបស់អ្នកការទូតនោះ នៅពេលព្យាបាលជំងឺ។
ប្រភពខាងលើបានដកស្រង់ពីប្រភពអនាមិកមួយថា ស្ថានទូតបានធ្វើប្រជាមតិផ្ទៃក្នុងមួយ ហើយលទ្ធផលបានបង្ហាញថា ប្រមាណ ២៥% នៃបុគ្គលិក និងសមាជិកគ្រួសារស្ថានទូតចង់ត្រលប់ទៅផ្ទះវិញឱ្យកាន់តែឆាប់។ បន្ថែមពីនេះទៅទៀត ការអនុវត្តតាមវិន័យរបស់ចិនគួរតែជាការស្ម័គ្រចិត្ត ហើយជំរុញឱ្យអាមេរិកដាក់វិធានការឆ្លើយតបទៅកាន់អ្នកការទូតចិននៅអាមេរិកវិញ។
លើសពីនេះទៅទៀត ប្រភពខាងលើបានឱ្យដឹងថា អាមេរិកប្រហែលជាមិនមានទឹកចិត្ត ឬ មិនមានសមត្ថភាពក្នុងការការពារមន្ត្រីអាមេរិកពីវិធានការតឹងរ៉ឹងរបស់ចិន។
ទោះជាយ៉ាងណាក៏ដោយ ក្រសួងការបរទេសសហរដ្ឋអាមេរិកបានប្រាប់រ៉យទ័រថា មកទល់ពេលនេះមិនទាន់មានការផ្លាស់ប្ដូរវិធានការណាមួយសម្រាប់អ្នកការទូតអាមេរិកធ្វើការនៅស្ថានទូត ឬ ស្ថានកុងស៊ុលណាមួយនៅឡើយទេ។
ចំណែកឯក្រសួងការបរទេសចិនក៏មិនទាន់មានការឆ្លើយតបភ្លាមៗពាក់ព័ន្ធនឹងបញ្ហានេះដែរ៕
ប្រភព៖ The Straits Times
