អ្នកជំនាញ៖ វ៉ារ្យ៉ង់អូមីក្រុងបំលែងរងថ្មី អាចពន្យារការរីករាលដាលនៃកូវីដនៅចក្រភពអង់គ្លេស
អ្នកជំនាញព្រមានថា វ៉ារ្យ៉ង់អូមីក្រុងបំលែងរងថ្មីBA.2 ដែលកំពុងរីករាលដាលយ៉ាងរហ័សនៅជុំវិញពិភពលោក អាចពន្យារការរីករាលដាលជំងឺកូវីដ-១៩ នៅចក្រភពអង់គ្លេស និងបន្ថែមសម្ពាធលើសេវាសុខាភិបាលជាតិរបស់ប្រទេស។
វ៉ារ្យ៉ង់ BA.2 ដែលត្រូវបានកំណត់ថាជាវ៉ារ្យ៉ង់ស្ថិតនៅក្រោមការស៊ើបអង្កេត (VUI) ដោយទីភ្នាក់ងារសន្តិសុខសុខភាពចក្រភពអង់គ្លេស (UKHSA) កាលពីសប្តាហ៍មុន គឺស្រដៀងទៅនឹងប្រភេទវ៉ារ្យ៉ងអូមីក្រុងដើមរបស់កូវីដដែរ ប៉ុន្តែអ្នកវិទ្យាសាស្ត្រនៅតែមិនច្បាស់លាស់អំពីផលប៉ះពាល់របស់វាទៅលើការរីករាលដាល។
មកដល់ថ្ងៃទី ២១ ខែមករា វ៉ារ្យ៉ង់ថ្មីនេះត្រូវបានរកឃើញនៅអង់គ្លេសរហូតដល់ ៤២៦ ករណី។ លោកវេជ្ជបណ្ឌិត Meera Chand នាយកខាងតាមដានកូវីដរបស់ UKHSA និយាយថា៖ «រហូតមកដល់ពេលនេះ មានភ័ស្តុតាងមិនគ្រប់គ្រាន់ដើម្បីកំណត់ថាតើ BA.2 បង្កឱ្យមានជំងឺធ្ងន់ធ្ងរជាងអូមីក្រុង BA.1 ដែរឬទេ ប៉ុន្តែទិន្នន័យមានកំណត់ ហើយ UKHSA បន្តស៊ើបអង្កេត»។
លោក Francois Balloux សាស្ត្រាចារ្យផ្នែកជីវវិទ្យាកុំព្យូទ័រនៅសាកលវិទ្យាល័យ College ទីក្រុងឡុងដ៍និយាយថា៖ «នៅដំណាក់កាលនេះ BA.1 និង BA.2 អាចត្រូវបានចាត់ទុកថាជាជំងឺរាតត្បាតពីរដែលមានលក្ខណៈប្រហាក់ប្រហែលគ្នានៃអូមីក្រុង»។
ចំណែកឯលោកសាស្ត្រាចារ្យ Oliver Johnson នាយកវិទ្យាស្ថានវិទ្យាសាស្ត្រស្ថិតិនៅសាកលវិទ្យាល័យ Bristol និយាយថាវ៉ារ្យ៉ង់ថ្មីនេះមិនគួរឱ្យភ័យខ្លាចនោះទេ ប៉ុន្តែវាអាចមានន័យថាការឆ្លងរាតត្បាតនៅអង់គ្លេសនឹងមិនចុះខ្សោយលឿនដូចការរំពឹងទុកនោះទេ។
វ៉ារ្យ៉ង់ BA.2 ត្រូវបានរកឃើញដំបូងនៅខែធ្នូ ហើយត្រូវបានគេដាក់ឈ្មោះថា វ៉ារ្យ៉ង់បំបាំងកាយ ដោយសារតែវាមិនងាយស្រួលក្នុងការឱ្យគេកំណត់អត្តសញ្ញាណដូចអូមីក្រុងដើម BA.1។ អ្នកស្រី Meaghan Kall អ្នកឯកទេសខាងរោគរាតត្បាតនៅ UKHSA និយាយថា BA.2 កំពុងកើនឡើងនៅចក្រភពអង់គ្លេស ប៉ុន្តែអ្នកជំនាញរូបនេះបន្ថែមថា៖ «វ៉ារ្យ៉ង់នឹងបន្តលេចឡើង ប៉ុន្តែមិនមែនគ្រប់វ៉ារ្យ៉ង់ទាំងអស់នឹងមានបញ្ហានោះទេ»។
ប្រភព៖ The Telegraph