កូរ៉េខាងជើងអះអាងថា ខ្លួនជាប្រទេសតែមួយគត់ដែលអាចក្រោកឈរប្រឆាំងនឹងសហរដ្ឋអាមេរិក
កូរ៉េខាងជើងអះអាងថា ខ្លួនជាប្រទេសតែមួយគត់នៅលើលោក ដែលអាចក្រោកឈរប្រឆាំងនឹងសហរដ្ឋអាមេរិក។ នេះបើតាមសេចក្ដីថ្លែងការណ៍របស់ក្រសួងការបរទេសប្រទេសនេះ កាលពីថ្ងៃអង្គារកន្លងទៅ។
ប្រភពខាងលើបានឱ្យដឹងថា ប្រជាជនកូរ៉េខាងជើងមាន «មោទនភាព និងភាពជឿជាក់» ដោយប្រទេសកុម្មុយនិស្តមួយនេះ «បោះជំហានទៅកាន់ជួរខាងមុខនៃអំណាចពិភពលោក»។
«មានប្រទេសច្រើនជាង ២០០នៅលើលោក ប៉ុន្តែមានតែប្រទេសមួយចំនួនតូចប៉ុណ្ណោះ ដែលកំពុងកាន់កាប់គ្រាប់បែកអ៊ីដ្រូសែន មីស៊ីលបាលីស្ទិកអន្តរទ្វីប (ICBMs) និងមីស៊ីលអេពែរសូនិក»។ នេះបើតាមសេចក្ដីថ្លែងការណ៍ខាងលើ។
កូរ៉េខាងជើងបានបន្តនៅក្នុងសេចក្ដីថ្លែងការណ៍ថា៖ «នៅក្នុងពិភពលោកសព្វថ្ងៃនេះ ប្រទេសជាច្រើនខ្ជះខ្ជាយពេលវេលារបស់គេក្នុងការទាក់ទងជាមួយសហរដ្ឋអាមេរិក ជាមួយការយល់ព្រមឱ្យអាមេរិកធ្វើជាចៅហ្វាយ និងតាមអាមេរិកយ៉ាងងងឹតងងល់»។
ប្រទេសកុម្មុយនិស្តមួយនេះបានបន្ថែមថា៖ «មានតែប្រទេសយើង នៅក្នុងពិភពលោកនេះ ក្រោកឈរប្រឆាំងនឹងអាមេរិក ហើយធ្វើឱ្យពិភពលោករង្គោះរង្គើ ជាមួយនឹងការធ្វើតេស្តមីស៊ីល ដែលអាចបាញ់ដល់ទឹកដីអាមេរិកទៀតផង»។
ចំណែកឯសហរដ្ឋអាមេរិកវិញបានឆ្លើយតបតាមរយៈអ្នកនាំពាក្យក្រសួងការបរទេសរបស់ខ្លួនថា ខ្លួននៅតែជំរុញឱ្យកូរ៉េខាងជើងចូលតុចរចា ដើម្បីកាត់បន្ថយភាពតានតឹង៕
ប្រភព៖ The Straits Times