ការបរិច្ចាគប៊ីតខញកំពុងហូរចូលអ៊ុយក្រែន ខណៈដែលរុស្ស៊ីប្រមូលផ្តុំកងទ័ពនៅតាមព្រំដែន
ខណៈដែលកងទ័ពរុស្ស៊ីច្រើនជាង ១ សែននាក់ត្រូវបានដាក់ពង្រាយនៅតាមព្រំដែនជាមួយអ៊ុយក្រែន ទិន្នន័យថ្មីរបស់Elliptic ដែលជាក្រុមហ៊ុនអ្នកវិភាគអំពីប្លុកឆេន បង្ហាញថា ប្រជាជនអ៊ុយក្រែនកំពុងប្រមូលមូលនិធិប៊ីតខញដើម្បីបរិច្ចាគលុយរាប់សែនដុល្លារទៅអង្គការមិនមែនរដ្ឋាភិបាលអ៊ុយក្រែន និងក្រុមអ្នកស្ម័គ្រចិត្ត។
យោងតាមរបាយការណ៍របស់ Elliptic ក្រុមសកម្មជនបានដាក់គ្រីបតូក្នុងគោលបំណងផ្សេងៗ រួមទាំងជាជំនួយដល់កងទ័ពអ៊ុយក្រែនក្នុងការបំពាក់ឧបករណ៍យោធា ការផ្គត់ផ្គង់វេជ្ជសាស្រ្ត និងដ្រូន ក៏ដូចជាការផ្តល់មូលនិធិដល់ការបង្កើតកម្មវិធីសម្គាល់មុខដែលអាចកំណត់អាចទាហានស៊ីឈ្នួល ឬចារកម្មរុស្ស៊ីបាន។
ថ្វីបើរុស្ស៊ីនិយាយថា ខ្លួនមិនមានផែនការវាយលុកអ៊ុយក្រែនក្ដី សហរដ្ឋអាមេរិក ចក្រភពអង់គ្លេស និងប្រទេសលោកខាងលិចដទៃទៀត នៅតែខ្លាចថានឹងមានការឈ្លានពានដែលបង្កឱ្យមានសង្រ្គាមផ្ទុះឡើង។ លោក Tom Robinson ប្រធានអ្នកវិទ្យាសាស្ត្ររបស់ Elliptic និយាយថា៖ «រូបិយប័ណ្ណគ្រីបតូ ត្រូវបានប្រើប្រាស់កាន់តែខ្លាំងឡើង ដើម្បីប្រមូលថវិកាក្នុងសង្គ្រាម ដោយមានការយល់ព្រមពីរដ្ឋាភិបាល»។
លោក Robinson និយាយថា លុយគ្រីបតូស័ក្តិសមជាពិសេសចំពោះការរៃអង្គាសប្រាក់អន្តរជាតិ ព្រោះវាមិនគោរពព្រំដែនជាតិ ហើយវាធន់នឹងការចាប់ពិរុទ្ធ ដោយមិនមានអាជ្ញាធរកណ្តាលដែលអាចទប់ស្កាត់ប្រតិបត្តិការបានទេ ឧទាហរណ៍ក្នុងការឆ្លើយតបទៅនឹងការដាក់ទណ្ឌកម្ម»។
លោក Boaz Sobrado អ្នកវិភាគទិន្នន័យបច្ចេកវិទ្យាហិរញ្ញវត្ថុនៅទីក្រុងឡុងដ៍ ដែលណែនាំដល់អង្គការសប្បុរសធម៌ក្នុងប្រទេសផ្តាច់ការ រួមទាំងអតីតប្រទេសប្លុកបូព៌ា ស្តីពីការរៃអង្គាសថវិកា និយាយថា៖ «អត្ថប្រយោជន៍នៃការរៃអង្គាសមូលនិធិគ្រីបតូគឺថា វាពិបាកក្នុងការរឹបអូសពួកគេ»។
លើសពីនេះទៀត នៅប្រទេសអ៊ុយក្រែនវិញ លោកប្រធានាធិបតី Volodymyr Zelenskyy បានចុះហត្ថលេខាលើច្បាប់មួយនៅឆ្នាំ ២០២១ ដែលត្រួសត្រាយផ្លូវសម្រាប់ធនាគារកណ្តាលរបស់ប្រទេសក្នុងការចេញរូបិយប័ណ្ណឌីជីថលរបស់ខ្លួន។ លោកប្រធានាធិបតី និងសភា ក៏កំពុងពិភាក្សាចំពោះភាពស្របច្បាប់ និងការគ្រប់គ្រងរូបិយប័ណ្ណគ្រីបតូ។
ប្រភព៖ CNBC
