ក្រុមហ៊ុនផលិតរថយន្តធំៗផ្អាកផលិតកម្ម ខណៈរដ្ឋាភិបាលព្រមានផលប៉ះពាល់សេដ្ឋកិច្ចជុំវិញបាតុកម្មបិទព្រំដែនអាមេរិក-កាណាដា
ក្រុមហ៊ុនផលិតរថយន្ត Ford និង Toyota និយាយកាលពីថ្ងៃពុធថា ពួកគេកំពុងផ្អាកផលិតកម្មមួយចំនួនរបស់ខ្លួន ស្របពេលដែលក្រុងវ៉ាស៊ីតោន និងអូតាវ៉ា ប្រមានពីផលប៉ះពាល់សេដ្ឋកិច្ច ដែលបណ្ដាលមកពីការបិទច្រកព្រំដែនអាមេរិក-កាណាដារបស់អ្នកតវ៉ាដែលប្រឆាំងនឹងការរឹតត្បឹត និងកាតព្វកិច្ចចាក់វ៉ាក់សាំងដើម្បីការពារកូវីដ។
តាំងពីយប់ថ្ងៃចន្ទមក អ្នកតវ៉ាដែលជាអ្នកបើកឡានដឹកទំនិញ បានបិទចរាចរណ៍លើស្ពាន Ambassador ឆ្លងចូលប្រទេសកាណាដា ពីក្រុង Detroit នៃរដ្ឋ Michigan ដែលបង្អាក់ដល់ការដឹកជញ្ជូនផលិតផលរបស់ក្រុមហ៊ុនផលិតរថយន្ត និងកសិកម្មនានាក្នុងក្រុង។ ច្រកព្រំដែនអាមេរិក-កាណាដាមួយផ្សេងទៀតនៅក្នុងខេត្ត Alberta ក៏ត្រូវបានបិទចាប់តាំងពីល្ងាចថ្ងៃអង្គារមក។
ក្រុមហ៊ុន Toyota ដែលជាអ្នកលក់ឡានកំពូលនៅសហរដ្ឋអាមេរិកនិយាយថា ខ្លួនមិនរំពឹងថានឹងផលិតរថយន្តនៅរោងចក្រក្នុងក្រុង Ontario ក្នុងសប្តាហ៍នេះទេ ខណៈក្រុមហ៊ុន Ford ផ្អាកការផលិតម៉ាស៊ីននៅក្រុង Windsor ហើយរោងចក្ររបស់ខ្លួននៅក្បែរក្រុង Toronto ក៏កាត់បន្ថយដំណើរការផលិត។
ស្របពេលដែលការបិទផ្លូវធ្វើឱ្យការដឹកជញ្ជូនរាំងស្ទះ ច្រើនជាង ២/៣នៃទំនិញ ៥១១ ប៊ីលានដុល្លារក្នុងទំនិញដែលជួញដូររាល់ថ្ងៃរវាងប្រទេសអាមេរិកខាងជើងទាំងពីរ ត្រូវបានដឹកជញ្ជូនតាមផ្លូវគោក។
អ្នកនាំពាក្យសេតវិមានអ្នកស្រី Jen Psaki និយាយកាលពីថ្ងៃពុធថា៖ «ខ្ញុំគិតថា វាមានសារៈសំខាន់សម្រាប់មនុស្សគ្រប់គ្នានៅក្នុងប្រទេសកាណាដា និងសហរដ្ឋអាមេរិក យល់ពីផលប៉ះពាល់នៃការស្ទះនេះគឺ ផលប៉ះពាល់សក្តានុពល លើកម្មករ ខ្សែសង្វាក់ផ្គត់ផ្គង់ ហើយនោះជាកន្លែងដែលយើងយកចិត្តទុកដាក់បំផុត»។
ទេសាភិបាលធនាគារកាណាដាលោក Tiff Macklem ក៏អំពាវនាវឱ្យមានដំណោះស្រាយយ៉ាងឆាប់រហ័ស។ លោកនិយាយថា៖ «ប្រសិនបើមានការរាំងស្ទះអូសបន្លាយនៅចំណុចចូលសំខាន់ៗក្នុងប្រទេសកាណាដា នោះវាអាចចាប់ផ្តើមមានឥទ្ធិពលលើសកម្មភាពសេដ្ឋកិច្ច។ យើងមានខ្សែសង្វាក់ផ្គត់ផ្គង់សកល ដែលមានភាពតានតឹងរួចហើយ។ យើងមិនត្រូវការវាទេ»។
ការតវ៉ាដំបូងឡើយ ជាការដើរក្បួនដង្ហែដោយសេរីភាពក្នុងក្រុងអូតាវ៉ា ប្រឆាំងនឹងកាតព្វកិច្ចចាក់វ៉ាក់សាំង ឬការតម្រូវឱ្យធ្វើចត្តាឡីស័កចំពោះអ្នកមិនចាក់ នៅពេលឆ្លងដែនពីសហរដ្ឋអាមេរិកចូលកាណាដា។ ក្រោយមក ការតវ៉ាក៏ប្រែក្លាយទៅជាការប្រឆាំងរដ្ឋាភិបាលរបស់លោកនាយករដ្ឋមន្រ្តី Justin Trudeau ដោយបាតុករសម្ដែងពីការពន្ធកាបូន និងច្បាប់ផ្សេងៗ។
ប្រភព៖ Reuters
