ក្រុមហ៊ុន Evergrande ប្ដេជ្ញាចាប់ផ្ដើមសាងសង់ឡើងវិញនូវគម្រោងសំណង់ទាំងអស់នៅចិន
ក្រុមហ៊ុនអចលនទ្រព្យចិន Evergrande ប្ដេជ្ញាថានឹងចាប់ផ្ដើមសាងសង់ឡើងវិញនូវគម្រោងសំណង់នានានៅក្នុងប្រទេសចិននៅក្នុងខែកុម្ភៈនេះ ហើយគ្រោងនឹងសាងសង់ឱ្យបាន ៦០ម៉ឺនអាផាតមិននៅត្រឹមឆ្នាំ២០២២។ នេះបើតាមការលើកឡើងរបស់ប្រធានក្រុមប្រឹក្សាភិបាលក្រុមហ៊ុនលោក Hui Ka Yan ដែលបានចុះផ្សាយដោយសារព័ត៌មានរ៉យទ័រ ដោយដកស្រង់ពីប្រភពមួយ ដែលបានដឹងពីរឿងផ្ទៃក្នុងរបស់ក្រុមហ៊ុន Evergrande។
និយាយនៅក្នុងកិច្ចប្រជុំផ្ទៃក្នុងមួយកាលពីថ្ងៃអាទិត្យ លោក Hui បាននិយាយថា ក្រុមហ៊ុននៅពេលនេះមានទឹកប្រាក់ប្រមាណក្បែរ ៨ប៊ីលានដុល្លារ ហើយនៅមានទ្រព្យសម្បត្តិដែលដាក់លក់សរុបប្រមាណ ២៦ប៊ីលានដុល្លារ។
លោកក៏ប្រឆាំងដាច់ខាតនឹងការដាក់លក់ទ្រព្យសម្បត្តិឡៃឡុងក្នុងតម្លៃទាប។យ៉ាងណាមិញ ក្រុមហ៊ុន Evergrande បានបដិសេធមិនបកស្រាយពាក់ព័ន្ធនឹងការវិវត្តថ្មីៗនេះ។
ក្រុមហ៊ុនអចលនទ្រព្យយក្សរបស់ចិនមួយនេះកំពុងតែមានវិបត្តិហិរញ្ញវត្ថុមួយ ដែលផ្ទុះតាំងពីឆ្នាំមុន។ ក្រុមហ៊ុនជំពាក់បំណុលសរុបប្រមាណ ៣០០ប៊ីលានដុល្លារ៕
ប្រភព៖ Reuters