តុលាការសម្រេចឃុំខ្លួនបុរសប៉ុនប៉ុងដុតភោជនីយ៍ដ្ឋានបឹងឈូក នៅខណ្ឌច្បារអំពៅ ដាក់ពន្ធនាគារបណ្ដោះអាសន្ន
ភ្នំពេញ៖ លោក ឌុច សុខសារិន ចៅក្រមស៊ើបសួរនៃសាលាដំបូងរាជធានីភ្នំពេញ នៅល្ងាចថ្ងៃទី ២៨ ខែវិច្ឆិកា ឆ្នាំ២០១៩ បានសម្រេចចេញដីកាឃុំខ្លួនជនជាប់ចោទឈ្មោព ហេង សុភា ភេទប្រុសអាយុ៣៥ ឆ្នាំ ដាក់ពន្ធនាគារបណ្ដោះអាសន្ន រង់ចាំថ្ងៃជំនុំជម្រះទោសនៅពេលក្រោយ ។
ការសម្រេចឃុំខ្លួនជនជាប់បែបនេះ បន្ទាប់ពីលោក អ៊ុ សុភ័ក្រ ព្រះរាជអាជ្ញារងអមអយ្យការនៃសាលាដំបូងរាជធានីភ្នំពេញ សម្រេចចោទប្រកាន់លើឈ្មោះ ហេង សុភា អាយុ៣៥ឆ្នាំ ពីបទ ហិង្សាដោយចេតនាមានស្ថានទម្ងន់ទោស និង ធ្វើឲ្យខូចខាតដោយចេតនា បទល្មើសដែលមានបញ្ញាត្ដិ និងផ្ដន្ទាទោសតាមមាត្រា២១៨ និង ៤១០ នៃក្រមព្រហ្មទណ្ឌ ។
សូមរំលឹកថា កម្លាំងនគរបាលព្រហ្មទណ្ឌខណ្ឌច្បារអំពៅ នៅរសៀលថ្ងៃទី ២៨ ខែវិច្ឆិកា ឆ្នាំ២០១៩ ចាប់ នឹង បញ្ជូនខ្លួនជនសង្ស័យឈ្មោះ ហេង សុភា ទៅ កាន់សាលាដំបូងរាជធានីភ្នំពេញ ចាត់ ការតាមនីតិវិធី ពាក់ព័ន្ធ សកម្មភាពគប់ដប់សាំងបម្រុងដុតភោជនីយ៍ដ្ឋានបឹងឈូក បង្កឲ្យមានរបួសស្នាមដល់បុគ្គលិកក្នុងស្ថានីយ៍ប្រេងឥន្ធនៈម្នាក់ កាលពីថ្ងៃទី ២៥ ខែវិច្ឆិកា ឆ្នាំ២០១៩ ។
គួររំលឹកថា កាលពីថ្ងៃទី២៤ខែវិច្ឆិកា ឆ្នាំ២០១៩ ម៉ោង ០៥ និង ៣០នាទី ជនសង្ស័យខឹងបុគ្គលិក ភោជនីដ្ឋានបឹងឈូក ដើរជាន់បែកទុយោទឹក នៅក្បែរហាង ក៏ឡើងទៅលើផ្ទះជាន់ទី២ យកដុំថ្ម និងកាំបិតប៉័ងតោគប់ទៅលើដំបូល ហាងខាងលើបណ្តាលឲ្យធ្លុះធ្លាយ ពេលនោះ ឈ្មោះសុខ ហេងចេញមកមើល ស្រាប់តែជនសង្ស័យយកដំបង ដែកបួនជ្រុងគប់ត្រូវពោះជាំ រួចគេចខ្លួន។
រហូតដល់ថ្ងៃទី២៥ ខែវិច្ឆិកា ឆ្នាំ ២០១៩ ម៉ោង០១និង ០០នាទី ជនសង្ស័យយកដុំថ្មគប់ទៅលើដំបូលភោជនីយ៍ដ្ឋានខាងលើម្តងទៀត យកដុំថ្ម និងកាំបិតប៉័ងតោគប់ទៅលើដំបូល ហាងខាងលើបណ្តាលឲ្យធ្លុះធ្លាយនិងយកជំពាមកៅស៊ូបាញ់មកលើបង្អួចកញ្ចក់ ភោជនីយ៍ដ្ឋានបណ្តាលឲ្យធ្លុះ០៣កន្លែង រួចគេចខ្លួន។
លុះដល់ម៉ោង០៨និង០០នាទី ថ្ងៃដដែល សមត្ថកិច្ចឃាត់ខ្លួនជនសង្ស័យនៅភូមិបឹងឈូក សង្កាត់និរោធ ខណ្ឌច្បារអំពៅ បញ្ជូនមកអធិការដ្ឋានខណ្ឌច្បារអំពៅ។ សូមជម្រាបថា កាលពីថ្ងៃទី២២ ខែវិច្ឆិកា ឆ្នាំ ២០១៩ ម៉ោង០១និង០០នាទី កន្លងមកជនសង្ស័យធ្លាប់យកដបសាំងគប់មក លើភោជនីយ៍ដា្ឋនខាងលើបណ្តាលឲ្យឆេះទ្វារផ្នែកខាងក្រោយ ៕ធ.ដ
