វិបត្តិអ៊ុយក្រែនប្រែប្រួល ខណៈពេលដែលរុស្សីបង្ហាញការបើកចំហដើម្បីការចរចាបន្ថែមទៀត
ស្នូរនៃវិបត្តិអ៊ុយក្រែនបានប្រែប្រួលកាលពីថ្ងៃចន្ទ ទី១៤ កុម្ភៈបន្ទាប់ពីរដ្ឋមន្ត្រីក្រសួងការបរទេសរុស្សីបាននិយាយថាលោកគាំទ្រការចរចាបន្ថែមទៀត ដើម្បីដោះស្រាយការប្រឈមមុខដាក់គ្នាជាមួយលោកខាងលិច ហើយប្រធានាធិបតីអ៊ុយក្រែនមួយចំនួនបង្ហាញតម្រុយថាពួកគេអាចធ្វើការលះបង់ដើម្បីជៀសវាងសង្គ្រាម នេះបើទោះបីជារុស្សីបន្តការប្រមូលផ្ដុំនាវាចម្បាំងនៅសមុទ្រខ្មៅជិតឆ្នេររបស់ប្រទេសអ៊ុយក្រែន។
នៅក្នុងកិច្ចប្រជុំចាក់ផ្សាយលើទូរទស្សន៍រដ្ឋ វិមានក្រឹមឡាំង បានបញ្ជូនសញ្ញាខ្លាំងបំផុតរបស់ខ្លួនថា ខ្លួននឹងស្វែងរកការចរចាបន្ថែមទៀតជាមួយលោកខាងលិច ជាជាងចាប់ផ្តើមសកម្មភាពយោធាភ្លាមៗ។ ក្នុងកិច្ចប្រជុំមួយរដ្ឋមន្ត្រីការបរទេសរុស្សីលោកសឺហ្គេ ឡាវរ៉ូវបានប្រាប់លោកប្រធានាធិបតីវ្ល៉ាឌីមៀរ ពូទីនថាឥឡូវនៅតែមានផ្លូវការទូតនៅខាងមុខ។ ប៉ុន្មាននាទីក្រោយមករដ្ឋមន្ត្រីក្រសួងការពារជាតិរុស្សីលោកសឺហ្គេ ស៊ូហ្គូបានប្រាប់លោកពូទីន ថា «ការសមយុទ្ធខ្នាតធំ» នៅជិតព្រំដែនអ៊ុយក្រែនគឺកំពុងជិតចប់ហើយ។
«ខ្ញុំជឿថាលទ្ធភាពរបស់យើងគឺនៅឆ្ងាយណាស់ពីការអស់ជម្រើស» លោកឡាវរ៉ូវបាននិយាយបែបនេះអំពីការចរចាជាមួយលោកខាងលិច ហើយបន្តទៀតថា៖ «ខ្ញុំនឹងស្នើឱ្យបន្ត និងពង្រឹងពួកវា»។ លោកពូទីនបានឆ្លើយដោយខ្លីថា៖ «ល្អ»។
នេះគឺសញ្ញាមួយដែលបង្ហាញថាវិមានក្រឹមឡាំងគឺនៅមានការរំពឹងទុកថាការប្រមូលផ្ដុំទាហាន ដាក់សម្ពាធគ្រប់គ្រាន់សម្រាប់សម្រេចបាននៅគោលដៅសំខាន់ៗរបស់ខ្លួន ដោយមិនចាំបាច់ធ្វើសកម្មភាពយោធា។
សេណេរីយ៉ូនេះត្រូវបានពង្រឹងនៅពេលដែលប្រធានាធិបតីអ៊ុយក្រែនលោកវ៉ុលូឌីមៀរ ហ្សេលេនស្គីបានឱ្យតម្រុយថាប្រទេសអ៊ុយក្រែនអាចបោះបង់គោលបំណងរបស់ពួកគេក្នុងការចូលរួមជាសមាជិកក្នុងសម្ព័ន្ធភាពយោធាលោកខាងលិចណាតូ ដែលនេះនឹងបំពេញការទាមទារដ៏សំខាន់មួយរបស់រុស្សី។
ក្នុងសន្និសីទសារព័ត៌មានមួយ លោកហ្សេលេនស្គី បាននិយាយថាការសង្កត់ធ្ងន់លើការចូលរួមជាសមាជិកនៃអង្គការណាតូគឺដើម្បីសន្តិសុខរបស់ប្រទេសអ៊ុយក្រែន ដោយគោលដៅនេះត្រូវបានចារក្នុងរដ្ឋធម្មនុញ្ញរបស់ប្រទេស។ ប៉ុន្តែលោកបានទទួលស្គាល់ស្ថានភាពដ៏លំបាកដែលប្រទេសអ៊ុយក្រែនកំពុងប្រឈម ដោយមានទាហានរុស្សីជាង ១០០.០០០ នាក់នៅខាងកើតប្រទេស ហើយដៃគូដូចជាអាមេរិកបដិសេធមិនបញ្ជូនទាហានដើម្បីទប់ទល់នឹងការឈ្លានពាន។
«តើអ៊ុយក្រែនគួរដើរលើផ្លូវនោះប៉ុន្មានទៀត?» លោកហ្សេលេនស្គីនិយាយអំពីដំណើរការសមាជិកភាពរបស់អ៊ុយក្រែន ហើយបន្ថែមទៀតថា «តើនរណានឹងគាំទ្រយើង?»។ លោកលើកឡើងថាការរំពឹងរបស់អ៊ុយក្រែនក្នុងការចូលរួមអង្គការណាតូគឺ «ដូចជាសុបិន»។
ការលើកឡើងរបស់ហ្សេលេនស្គីបានបង្ហាញថាយុទ្ធសាស្ត្រផ្គួបការចរចា ជាមួយនឹងសម្ពាធយោធាគឺកំពុងមានប្រសិទ្ធភាព។ លោកឡាវរ៉ូវបានប្រាប់លោកពូទីនថា៖ «គំនិតផ្ដួចផ្ដើមរបស់យើងបានអង្រួនសហសេវិកលោកខាងលិចរបស់យើង ហើយបានក្លាយជាហេតុផលដែលពួកគេមិនអាចព្រងើយកន្តើយនឹងការទាមទារពីមុនរបស់យើងបានទៀតទេ»។
យ៉ាងណាមិញ សហរដ្ឋអាមេរិកបានព្យាយាមបន្ទាបការរំពឹងទុកលើដំណោះស្រាយការទូតបន្ទាប់ពីការលើកឡើងរបស់លោកឡាវរ៉ូវ។ អ្នកនាំពាក្យក្រសួងការបរទេសអាមេរិកលោកណេដ ប្រាយស៍បាននិយាយថាសំដីរបស់លោកឡាវរ៉ូវគឺផ្ទុយពីសកម្មភាពរបស់យោធារុស្សី។
លោកប្រាយស៍និយាយថា៖ «យើងបានកត់សម្គាល់ពីយោបល់របស់គាត់។ អ្វីដែលយើងមិនបានកត់សម្គាល់នោះគឺជាការបង្ហាញពីការបន្ថយការកើនឡើង។ យើងមិនបានឃើញសញ្ញាជាក់ស្តែងណាមួយនៃការបន្ថយការកើនឡើងនោះទេ»៕