អាមេរិកបិទស្ថានទូតនៅក្រុងកៀវ ហើយបញ្ជូនបុគ្គលិកនៅសេសសល់ទៅភាគខាងលិចអ៊ុយក្រែន
កាលពីថ្ងៃចន្ទទី១៤ កុម្ភៈរដ្ឋមន្ត្រីការបរទេសអាមេរិកលោកអាន់តូនី ប្លីនខែនបានប្រកាសថាសហរដ្ឋអាមេរិកនឹងបិទស្ថានទូតរបស់ខ្លួននៅទីក្រុងកៀវ រដ្ឋធានីនៃប្រទេសអ៊ុយក្រែន ហើយបុគ្គលិកការទូតមួយចំនួនតូចដែលនៅសេសសល់ នឹងត្រូវ «ផ្លាស់ទីជាបណ្ដោះអាសន្ន» ទៅកាន់ទីក្រុងលឺវីវ នៅភាគខាងលិចនៃប្រទេសអ៊ុយក្រែន «ដោយសារតែការបង្កើនល្បឿនយ៉ាងខ្លាំងនៃការប្រមូលផ្ដុំទាហានរុស្សី» នៅជិតព្រំដែន។
ក្នុងសេចក្ដីថ្លែងការណ៍មួយលោកប្លីនខែនបាននិយាយថា៖ «ខ្ញុំបានបញ្ជាឱ្យចាត់វិធានការទាំងនេះសម្រាប់ហេតុផលមួយ សុវត្ថិភាពរបស់បុគ្គលិកយើង ហើយយើងជំរុញយ៉ាងខ្លាំងដល់ពលរដ្ឋអាមេរិកដែលនៅសេសសល់ក្នុងប្រទេសអ៊ុយក្រែនឱ្យចាកចេញពីប្រទេសជាបន្ទាន់»។
ការប្រកាសនេះធ្វើឡើងប៉ុន្មានថ្ងៃបន្ទាប់អាមេរិកបានដកមន្ត្រីរបស់ខ្លួនស្ទើរតែទាំងអស់ចេញពីប្រទេសអ៊ុយក្រែន ហើយប្រកាសបិទសេវាកុងស៊ុលត្រឹមថ្ងៃអាទិត្យ ខណៈពេលដែលពួកគេអះអាងថាការវាយប្រហារដោយរុស្សីអាចចាប់ផ្ដើមនៅពេលឆាប់ៗនេះ។
អ្នកនាំពាក្យក្រសួងការបរទេសអាមេរិកលោកណេដ ប្រាយស៍បាននិយាយថាការសម្រេចចិត្តផ្លាស់ទីត្រូវបានធ្វើឡើងដោយសារតែក្រសួងការបរទេសមានអារម្មណ៍ថាវា «ពិតជាចាំបាច់» ដោយសារតែ «លទ្ធភាព ប្រហែលជាពិតប្រាកដជាងពេលមុន ដែលរុស្សីអាចសម្រេចចិត្តបន្តសកម្មភាពយោធា»។
មន្ត្រីជាន់ខ្ពស់មួយរូប បាននិយាយកាលពីថ្ងៃសៅរ៍ថាស្ថានទូតនៅក្រុងកៀវបានចាប់ផ្ដើមការកម្ទេចឯកសារសំងាត់រួចទៅហើយ ដើម្បីត្រៀមខ្លួនក្នុងករណីដែលក្រសួងការបរទេសសម្រេចចិត្តធ្វើការផ្លាស់ទីពួកគេ៕