ភ្នំពេញ៖ រថយន្ត LEXUS RX300 បានបុកគ្នាជាមួយរថយន្តសេរីទំនើប LEXUS LX570 KURO នៅត្រង់ផ្លូវបំបែកជាបួន បណ្ដាលឱ្យរថយន្តទំនេីប 570 ក្រឡាប់ផ្ងារជើងច្រងាង។ ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង២ និង៤៥នាទី រសៀល ថ្ងៃទី១៦ ខែកុម្ភៈ ឆ្នាំ២០២២ ក្នុងតំបន់បឹងកក់ មូលដ្ឋានសង្កាត់ស្រះចក ខណ្ឌដូនពេញ រាជធានីភ្នំពេញ ។

តាមប្រភពព័ត៌មាននៅកន្លែងកើតហេតុ បានឱ្យក្រុមការងារ អប្សរា AMS ដឹងថា មុនពេលកើតហេតុ គេបានឃើញស្រ្តីម្នាក់ បើកបររថយន្តម៉ាក LEXUS LX570 KURO ពណ៌ខ្មៅ ពាក់ស្លាកលេខ ភ្នំពេញ 2BS-9899 បើកបរបញ្ជ្រាស់ទិសដៅចរាចរណ៍ ក្នុងល្បឿនលឿន ដោយខ្វះការប្រុងប្រយ័ត្ន ខណៈមកដល់ចំណុចផ្លូវបំបែកជាបួន ត្រូវបានរថយន្តមួយគ្រឿងទៀតម៉ាក់ LEXUS RX300 ពណ៌ខ្មៅ ពាក់ស្លាលេខ ភ្នំពេញ 2O-4445 បុកយ៉ាងពេញទំហឹង បណ្ដាលឱ្យរងការខូចខាត និងរថយន្ត LEXUS LX570 KURO ក្រឡាប់ផ្ញារជើងច្រងាងតែម្តង ។

ក្រោយពេលកើតហេតុ ម្ចាស់រថយន្ត LEXUS LX570 KURO បានគេចចេញពីកន្លែងកើតហេតុ បន្សល់តែរថយន្ត និងភាគីម្ខាងទៀត។ ភ្លាមៗនោះ កម្លាំងនគរបាលបានចុះមកដល់ទីតាំងកើតហេតុ ទើបធ្វើការវាស់វែងស្ទួចយករថយន្តទាំង ២គ្រឿង យកទៅរក្សារទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នានៅពេលក្រោយ ៕ ដោយ ៖ ឆៃហួត និងភា