កំពង់ឆ្នាំង ៖ លោកជំទាវ កែ ច័ន្ទមុន្នី បាននាំយកអំណោយរបស់សម្តេចគិត្តិព្រឹទ្ធបណ្ឌិត ប៊ុនរ៉ានី ហ៊ុនសែនប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃផែនការសកកម្មរួមអគ្គលេខាធិការសហប្រជាជាតិដើម្បីសុខភាពស្រ្តី និងកុមារ ជូនស្រ្តីមានផ្ទៃពោះ ស្រ្តីកំពុងបំបៅដោះកូន និងគ្រួសារជួបការលំបាក មកពី ៧ឃុំ ក្នុងស្រុកកំពង់លែង ខេត្តកំពង់ឆ្នាំងសរុបចំនួន ៩៣នាក់ ។

ពិធីនេះរៀបចំឡើងក្នុងទិវាជាតិ សុខភាពមាតា ទារក និងកុមារ ឆ្នាំ២០២២ ក្រោមប្រធានបទ (ពង្រឹងការផ្តល់សេវា សុខភាពបន្តពូជ និងផ្តល់វ៉ាក់សាំងបង្ការជំងឺកូវីដ-១៩ ជូនដល់ស្រ្តីមានផ្ទៃពោះ និងមាតា កំពុងបំបៅកូនដោយទឹកដោះម្តាយ នៅក្នុងស្រុកកំពង់លែង នាព្រឹកថ្ងៃទី២០ ខែកុម្ភៈ ឆ្នាំ២០២២ ក្រោមអធិបតីភាព លោកជំទាវ កែ ច័ន្ទមុន្នី អនុប្រធានកិត្តិយស សាខាកាកបាទក្រហមកម្ពុជាខេត្តកំពង់ឆ្នាំង និងជាអ្នកតំណាងរាស្រ្តមណ្ឌលកំពង់ឆ្នាំង ។

អំណោយសម្រាប់ ស្រ្តីមានផ្ទៃពោះ ស្រ្តីកំពុងបំបៅដោះកូនចំនួន ៦៣នាក់ ក្នុងមួយម្នាក់ៗទទួលបាន អង្ករ មី ត្រីខ ឃីត ១កញ្ចប់ (មុង ភួយ ក្រម៉ា សារ៉ុង អាវយឺត កន្សែង សាប៊ូ) ម៉ាស់ និង ថវិកា ៥៥,០០០រៀល ។ សម្រាប់គ្រួសារជួបការលំបាកចំនួន ៣០នាក់ ក្នុងមួយម្នាក់ៗទទួលបាន អង្ករ មី ត្រីខ ឃីត ១កញ្ចប់ (មុង ភួយ ក្រម៉ា សារ៉ុង អាវយឺត) ម៉ាស់ និងថវិកា ៥៥,០០០រៀលផងដែរ ៕សុខ គឹមសៀន