ខេត្តព្រះវិហារ ៖ ឯកឧត្តម ឧត្តមសេនីយ៍ទោ មាស វណ្ណារី មេបញ្ជាការរង តំណាង ឯកឧត្តម ឧត្តមសេនីយ៍ឯក ស្រី ឌឹក មេបញ្ជាការរង កងទ័ពជើងគោក មេបញ្ជាការ កងពលធំអន្តរាគមន៍លេខ៣ នាព្រឹកថ្ងៃទី៧ ខែមីនា ឆ្នាំ២០២២នេះ បានដឹកនាំក្រុមការងារ សប្បុរសជន កងពលតូចអន្តរាគមន៍ទាំងបី ចំណុះ នាំយកថវិកាសរុបចំនួន ១០០,០០០,០០០៛ (មួយរយលានរៀល) ទៅបរិច្ចាគជូនមន្ទីរពេទ្យគន្ធបុប្ផា និងមន្ទីរពេទ្យកុមារអង្គរ ស្ថិតនៅក្នុងខេត្តសៀមរាប ។

ក្នុងនោះមន្ទីរពេទ្យគន្ធបុប្ផាទទួលបានថវិកាបរិច្ចាគចំនួន ៥០,០០០,០០០៛(ហាសិបលានរៀល) និងមន្ទីរពេទ្យកុមារអង្គរ ទទួលបានថវិកាបរិច្ចាគចំនួន ៥០,០០០,០០០៛(ហាសិបលានរៀល) ។

ថ្នាក់ដឹកនាំប្រតិភូ ថ្លែងថា ថវិកាចំនួន ១០០,០០០,០០០៛ (មួយរយលានរៀល) ដែលក្រុមការងារនាំយកទៅបរិច្ចាគជូនដល់មន្ទីរពេទ្យទាំងពី គឺក្នុងគោលបំណងរួមចំណែកបន្តររក្សានិរន្តរភាព នៃកិច្ចដំណើរការព្យាបាល របស់មន្ទីរពេទ្យគន្ធបុប្ផា និងមន្ទីរពេទ្យកុមារអង្គរ ក្នុងគោលដៅជួយសង្រ្គោះ និងលើកកម្ពស់សុខុមាលភាពរបស់ទារក ស្រ្តីមានផ្ទៃពោះ សម្រាលកូន និងកុមារ នៅកម្ពុជា ព្រមទាំង ចូលរួមថែរក្សាមរតករបស់សាស្ត្រាចារ្យ Beat Richner ។

ថ្នាក់ដឹកនាំប្រតិភូក៏បាន អំពាវនាវដល់សប្បុរសជនទាំងអស់ចូលជាសមាជិកគាំទ្ររបស់មូលនិធិគន្ធបុប្ផាកម្ពុជា ដោយបរិច្ចាគចាប់ពី ៥,០០០៛/ខែ ឬ៦០,០០០៛/ឆ្នាំ ក្នុងស្មារតី “ខ្មែរជួយខ្មែរ”។ ដើម្បីនិរន្តរភាព របស់មន្ទីរពេទ្យទាំង២ ក្នុងបេសកកម្មសង្រ្គោះជីវិតកុមារកម្ពុជា ដោយឥតគិតថ្លៃ ៕ ដោយ៖ សួន លីណា