ខេត្តកំពង់ឆ្នាំង ៖ កំណាត់ផ្លូវក្រាលគ្រួសក្រហមជាង ២,៥គីឡូម៉ែត្រ ស្ថិតក្នុងភូមិអណ្ដូងឫស្សី ឃុំស្រែថ្មី ស្រុករលាប្អៀរ ត្រូវបានបើកការដ្ឋានសាងសង់ឲ្យក្លាយជាផ្លូវកៅស៊ូ DBST ក្រោមអធិបតីភាព ឯកឧត្តម ស៊ុន សុវណ្ណារិទ្ធិ អភិបាលខេត្ត និងលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង នាព្រឹកថ្ងៃទី ៧ ខែមិនាឆ្នាំ២០២២នេះ ។

ឯកឧត្តម ស៊ុន សុវណ្ណារិទ្ធិ មានប្រសាសន៍ថា ការស្ថាបនាផ្លូវនេះឡើង ដើម្បីសម្រួលដល់ដំណើរកំសាន្ត របស់ភ្ញៀវទេសចរណ៍ជាតិ និងអន្តរជាតិមកកាន់ សហគមន៍ទេសចរណ៍ ស្មូនឆ្នាំង ឃុំស្រែថ្មី ស្រុករលាប្អៀរ យើងឱ្យបានច្រើនថែមទៀត ក្រោយពីជំងឺកូវីដ ស្ងប់ស្ងាត់ ។

ឯកឧត្តម អភិបាលខេត្តកំពង់ឆ្នាំង បន្តថា ក្រោយពេលសាងសង់កំណាត់ផ្លូវនេះរួច នឹងមានបំពាក់អំពូលភ្លើងសូឡា បំភ្លឺ តាមដងផ្លូវដោយចំណាយទឹកប្រាក់ចំនួនប្រមាណ ១ម៉ឺនដុល្លារ ។

របាយការណ៍បានឲ្យដឹងថា ការកសាង និងពង្រីកផ្លូវ ដោយចាក់កៅស៊ូ DBST នេះ មានប្រវែង ២៥៣៥ម៉ែត្រទទឹង ៦ម៉ែត្រ រៀបចំខឿនចិញ្ចើមផ្លូវសងខាង ដោយចាក់បេតុងបង្ហូរទឹក ទទឹង 0,៣ម៉ែត្រ ប្រវែង ៥០៧០ម៉ែត្រផងដែរ។

ឯកឧត្តម អភិបាលខេត្តកំពង់ឆ្នាំង ក៏បាននាំយកអំណោយដល់បងប្អូនប្រជាពលរដ្ឋ ដែលមកចូលរួមចំនួន ១៥០គ្រួសារ ដោយក្នុងមួយគ្រួសារៗទទួលបានអង្ករ ទឹកត្រី ទឹកស៊ីអ៊ីវ និងថវិកា ២ម៉ឺនរៀលផងដែរ ៕ ដោយ៖ សុខ គឹមសៀន