អ្នកនាំពាក្យក្រសួងព័ត៌មានច្រានចោលចំពោះការផ្សព្វផ្សាយរបាយការណ៍របស់ CCIM
ភ្នំពេញ៖ អ្នកនាំពាក្យក្រសួងព័ត៌មានបានច្រានចោលចំពោះការផ្សព្វផ្សាយរបាយការណ៍របស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM)ស្ដីពីសេរីភាពសារព័ត៌មាននៅកម្ពុជាសម្រាប់ឆ្នាំ២០២២នេះថា សេរីភាពសារព័ត៌មាន នៅកម្ពុជាក្នុងឆ្នាំ២០២១ បានធ្លាក់ចុះកាន់តែអាក្រក់បើប្រៀបធៀបនឹងឆ្នាំ២០២០កន្លងទៅ។
ឯកឧត្តម មាស សុភ័ណ្ឌ អ្នកនាំពាក្យក្រសួងព័ត៌មានបានមានប្រសាសន៍បញ្ជាក់ប្រាប់ AMS នៅថ្ងៃទី១៣ ខែមីនានេះថា “ការកត់ត្រានូវទិន្នន័យចំពោះអ្នកសារព័ត៌មានមួយចំនួនដែលបានប្រព្រឹត្តខុសច្បាប់ហើយត្រូវបានអាជ្ញាធរមានសមត្ថកិច្ច ពាក់ព័ន្ធអនុវត្តទៅតាមនីតិវិធីច្បាប់នោះ គឺមិនបានធ្វើការសិក្សាស្រាវជ្រាវ ហើយមិនបានផ្ទៀងផ្ទាត់ទៅតាមករណីនីមួយៗ ទៅតាមអង្គហេតុ និងអង្គច្បាប់នោះទេ គឺជាការកត់ត្រាទៅលើបរិមាណដោយមិនបានធ្វើការសិក្សាវាយតម្លៃថាតើករណីនីមួយៗនោះ វាមានអង្គហេតុ និងអង្គច្បាប់ដូចម្តេច? ហើយថាតើករណីនីមួយៗនោះត្រូវបានដោះស្រាយ ឬក៏មានដំណើរការវិឌ្ឍន៍ទៅដល់នោះហើយ?។ តែវាជាការកត់ត្រាតែបរិមាណដោយមិនបានធ្វើការផ្ទៀងផ្ទាត់ធ្វើការសិក្សាឲ្យលម្អិតនិងច្បាស់លាស់ទៅតាមករណីនីមួយៗនោះទេ។
អ្នកនាំពាក្យដដែលបញ្ជាក់ថា ការអនុវត្តនីតិវិធីផ្លូវច្បាប់ទៅលើអ្នកសារព័ត៌មានមួយចំនួនដែលបានប្រព្រឹត្តផ្ទុយនឹងច្បាប់ ប្រព្រឹត្តប្រាសចាកនឹងក្រមសីលធម៌វិជ្ជាជីវៈក្នុងនាមជាអ្នកសារព័ត៌មាន វាពុំមែនជាការរឹតត្បិតសិទ្ធិសេរីភាព ពុំមែនជាការគំរាមកំហែង ឬការធ្វើទុក្ខបុកម្នេញទៅលើអ្នកសារព័ត៌មាននោះទេ។ អ្នកសារព័ត៌មានក៏ដូចជាប្រជាពលរដ្ឋទូទៅក៏ដូចជាអ្នកប្រកបវិជ្ជាជីវៈដទៃទៀតដែរ នៅពេលដែលពួកគាត់ប្រព្រឹត្តផ្ទុយនឹងច្បាប់ប្រព្រឹត្តប្រាសចាកនឹងក្រមសីលធម៌ វិជ្ជាជីវៈ ពួកគាត់គឺត្រូវតែទទួលខុសត្រូវចំពោះមុខច្បាប់ជាធរមាន។
អ្នកនាំពាក្យដដែលបានបន្តថា វិស័យព័ត៌មាន និងសោតទស្សន៍នៅព្រះរាជាណាចក្រកម្ពុជា គឺមានការរីកចម្រើនគួរឱ្យកត់សម្គាល់ពីមួយថ្ងៃទៅមួយថ្ងៃ។ ជាក់ស្តែងសង្កេតឃើញថា ប្រព័ន្ធផ្សព្វផ្សាយបែបប្រពៃណី ទាំងបែបទំនើប មានការរីកចម្រើនទាំងវិសាលភាព និងមធ្យោបាយនៅក្នុងការផ្តល់ព័ត៌មានជូនទៅប្រជាពលរដ្ឋទាំងក្នុង និងក្រៅប្រទេសឱ្យបានទទួលព័ត៌មាននឹងហេតុការណ៍ ព្រឹត្តិការណ៍ ក៏ដូចជាព័ត៌មានផ្សេងៗដែលកើតនៅក្នុងព្រះរាជាណាចក្រកម្ពុជា ក៏ដូចជានៅក្នុងពិភពលោកទាំងមូល។
ឯកឧត្តម មាស សុភ័ណ្ឌ បានបន្តថា បើពិនិត្យទៅលើចំនួននៃអង្គភាពផ្សព្វផ្សាយនៅពេលបច្ចុប្បន្ននេះឃើញថា មានការកើនឡើងជាលំដាប់ពីមួយឆ្នាំទៅមួយឆ្នាំ។ ឧទាហរណ៍ជាក់ស្តែងប្រព័ន្ធផ្សព្វផ្សាយតាមបែបទំនើបផ្សព្វផ្សាយតាម អ៊ីនធឺណិត មានគេហទំព័រ និងទូរទស្សន៍អនឡាញ បើគិតត្រឹមដំណាច់ឆ្នាំ២០២១នេះ គឺមានការកើនឡើងរហូតទៅ ដល់៧៨៧អង្គភាព ហើយចំនួននេះបើប្រៀបធៀបនឹងរយៈពេលដូចគ្នាកាលពីឆ្នាំ២០២០ គឺមានការកើនឡើងទៅដល់១១៨អង្គភាពផងដែរ។ ក្រៅពីនោះឃើញថា ប្រព័ន្ធផ្សព្វផ្សាយបែបប្រពៃណីមានទាំងវិទ្យុ ទូរទស្សន៍ ទស្សនាវដ្តី ជាច្រើនផងដែរក៏កំពុងតែបម្រើការផ្សព្វផ្សាយព័ត៌មានយ៉ាងសម្បូរបែបទៅដល់ប្រជាជនហើយចំនួនអ្នកសារព័ត៌មានទាំងជាតិ និងអន្តរជាតិដែលកំពុងប្រកបវិជ្ជាជីវៈសារព័ត៌មាននៅកម្ពុជាក៏មានការកើនឡើងផងដែរ។ ជាក់ស្តែងនៅក្នុង ឆ្នាំ២០២១ សង្កេតឃើញថា អ្នកសារព័ត៌មានជាតិ និងអន្តរជាតិ ប្រមាណជិត៦ពាន់នាក់ កំពុងតែបំពេញតួនាទី ភារកិច្ចរបស់ខ្លួននៅក្នុងការផលិត និងផ្សព្វផ្សាយជូនទៅដល់ប្រជាពលរដ្ឋទាំងក្នុង និងក្រៅប្រទេសផងដែរ។ ទាំងនេះអាចបញ្ជាក់ផងដែរថា ស្ថានភាពសេរីភាពសារព័ត៌មាន ក៏ដូចជាបរិយាកាស នៃការអភិវឌ្ឍវិជ្ជាជីវៈសារព័ត៌មាន នៅក្នុងព្រះរាជាណាចក្រកម្ពុជាមានការរីកចម្រើនហើយកាន់តែប្រសើរឡើងដែលអាចអនុញ្ញាតឱ្យប្រជាពលរដ្ឋទទួលបានព័ត៌មានពីគ្រប់និន្នាការប្រព័ន្ធផ្សព្វផ្សាយចម្រុះដែលអាចជួយជាផលប្រយោជន៍ទៅដល់ពួកគាត់នៅក្នុងការចូលរួមអភិវឌ្ឍន៍សង្គមជាតិផងដែរ៕
ដោយ៖ពលជ័យ
