ព្រៃវែង៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញសម្ពោធដាក់ឲ្យប្រើប្រាស់ជាផ្លូវការ ភូមិកុមារ អេស អូ អេស (SOS) ដែលស្ថិតនៅក្នុងភូមិ០១ សង្កាត់កំពង់លាវ ក្រុងព្រៃវែង ខេត្តព្រៃវែង នៅព្រឹកថ្ងៃទី១៧ ខែមីនា ឆ្នាំ២០២២។

សូមជម្រាបថា ភូមិកុមារ SOS មានទំហំជាង១ហិកតា ដែលជាអំណោយដ៏ថ្លៃថ្លារបស់សមេ្តចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។ ភូមិកុមារ SOS ព្រៃវែង បានចាប់ផ្តើមសាងសង់នៅថ្ងៃទី០៥ ខែធ្នូ ឆ្នាំ២០១៨ និងបានបិទបញ្ចប់ការសាងសង់នៅ ថ្ងៃទី០៧ ខែកុម្ភៈ ឆ្នាំ២០២០ នឹងសម្ភោធដាក់ឱ្យប្រើប្រាស់នាពេលនេះ។

ភូមិកុមារ អេស អូ អេស (SOS) ខេត្តព្រៃវែង បានគិតគូរយកចិត្តទុកដាក់ជួយគាំទ្រ ចិញ្ចឹមបីបាច់ថែរក្សាដល់កុមារកំព្រា និងកុមារដែលមិនមានឪពុកម្ដាយថែរក្សានៅក្នុងខេត្តព្រៃវែង បានយ៉ាងល្អ។

ភូមិកុមារ អេស អូ អេស (SOS) ព្រៃវែង បានផ្តល់នូវឱកាសជាថ្មីម្តងទៀតដល់កុមារទាំងអស់ នូវការរស់នៅជាបរិយាកាសគ្រួសារដ៏យូរអង្វែង ដែលមានអ្នកម្តាយ បងប្អូនប្រុស-ស្រី ផ្ទះ និងភូមិ ប្រកបដោយភាពកក់ក្តៅ សប្បាយរីករាយ និងសុវត្ថិភាព។

កុមារទទួលបានការទំនុកបម្រុងយ៉ាងពេញលេញ និងគ្រប់ជ្រុងជ្រោយ ទាំងអាហារហូបចុកប្រចាំថ្ងៃ សម្លៀកបំពាក់ ការសិក្សាអប់រំ សេវាថែទាំសុខភាពជាដើម ដូចគ្រួសារដើមដទៃៗទៀត នៅក្នុងសហគមន៍ផងដែរ ៕ ដោយ វណ្ណលុក