ណាតូនឹងផ្ដល់គ្រឿងការពារដល់អ៊ុយក្រែន ប្រឆាំងនឹងអាវុធគីមី និងនុយក្លេអ៊ែរ
អគ្គលេខាធិការអង្គការណាតូ លោក ជេនស៍ ស្តូលថេនបឺគ (Jens Stoltenberg) និយាយកាលពីថ្ងៃពុធថា មេដឹកនាំប្រទេសនានានៃសម្ព័ន្ធភាពយោធានេះ កំពុងរៀបចំបញ្ជូនឧបករណ៍ប្រើប្រាស់ក្នុងការការពារពីផលប៉ះពាល់អាវុធគីមី និងនុយក្លេអ៊ែរ ទៅឱ្យអ៊ុយក្រែន។
លោក ស្តូលថេនបឺគ និយាយថា សម្ព័ន្ធភាពរំពឹងថានឹងយល់ព្រមគ្នាក្នុងកិច្ចប្រជុំកំពូលថ្ងៃព្រហស្បតិ៍ដើម្បីផ្ដល់ «ការគាំទ្របន្ថែម» ដល់អ៊ុយក្រែន រួមទាំងឧបករណ៍សម្រាប់ការពារប្រឆាំងនឹងការគំរាមកំហែងគីមី ជីវសាស្ត្រ វិទ្យុសកម្ម ក៏ដូចជាជំនួយសន្តិសុខតាមអ៊ីនធឺណិត។
វាគឺជាគំនិតផ្ដួចផ្ដើមលើកដំបូង ដែលរដ្ឋជាសមាជិកណាតូនឹងបញ្ជូនការផ្គត់ផ្គង់ទៅអ៊ុយក្រែនជាពិសេសដើម្បីទប់ទល់នឹងអាវុធប្រល័យលោក ចំពេលការភ័យខ្លាចកាន់កើនឡើងនៅបណ្ដាប្រទេសខាងលិចដែលថា ទីក្រុងម៉ូស្គូអាចប្រើប្រាស់អាវុធទាំងអស់នោះ។
លោក ស្តូលថេនបឺគ និយាយថា ណាតូមានការព្រួយបារម្ភអំពីការប្រើប្រាស់អាវុធគីមី ឬជីវសាស្រ្ត ហើយកត់សម្គាល់ «ការគំរាមកំហែងនុយក្លេអ៊ែរ» ពីប្រធានាធិបតីរុស្ស៊ីលោក វ្ល៉ាឌីមៀ ពូទីន។ លោកនិយាយថា៖ «ការប្រើប្រាស់អាវុធគីមីណាមួយនឹងផ្លាស់ប្តូរទាំងស្រុងនូវធម្មជាតិនៃជម្លោះ ហើយមានផលវិបាកយ៉ាងឆ្ងាយ»។
ការប្រកាសរបស់ណាតូធ្វើឡើងបន្ទាប់ពីប្រធានាធិបតីសហរដ្ឋអាមេរិកលោក ចូ បៃដិន (Joe Biden) និយាយនៅមុនដំណើរទស្សនកិច្ចទៅកាន់អឺរ៉ុបថាមាន «ការគំរាមកំហែងពិតប្រាកដ» ដែលរុស្ស៊ីអាចប្រើប្រាស់អាវុធគីមីនៅអ៊ុយក្រែន។ ទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួនបានចោទប្រកាន់រុស្ស៊ីថាបានផ្សព្វផ្សាយការអះអាងគ្មានភស្តុតាង ដែលថាអ៊ុយក្រែនបង្កើតកម្មវិធីអាវុធជីវសាស្រ្តដែលជាលេសដែលអាចមានសក្តានុពលសម្រាប់ការចាប់ផ្តើមការវាយប្រហារជីវសាស្ត្រ ឬគីមីរបស់ខ្លួន។
ក្នុងរយៈពេលប៉ុន្មានសប្តាហ៍កន្លងមកនេះ ក្រសួងការពារជាតិរបស់រុស្ស៊ីចោទប្រកាន់ក្រុងកៀវម្តងហើយម្តងទៀត ដោយមិនផ្តល់ភស្តុតាង អំពីការរៀបចំផែនការវាយប្រហារអាវុធគីមីប្រឆាំងនឹងប្រជាជនរបស់ខ្លួន ដើម្បីចោទប្រកាន់ក្រុងម៉ូស្គូថាប្រើប្រាស់អាវុធគីមីនៅក្នុងជម្លោះរយៈពេល១ខែរបស់ខ្លួនជាមួយអ៊ុយក្រែន។
ប្រភព៖ FT
