ប៉ារីស៖ ប្រធានាធិបតីបារាំងលោក អេម៉ានុយអែល ម៉ាក្រុង ព្រមានថា ជម្លោះនៅអ៊ុយក្រែននឹងកាន់តែធ្ងន់ធ្ងរឡើង តាមរយៈការបោះពាក្យសម្ដី ឬសកម្មភាពនានាដែលគួរតែត្រូវបានជៀសវាង។

លោក ម៉ាក្រុង បានព្រមានបែបនេះ មួយថ្ងៃបន្ទាប់ពីសមភាគីអាមេរិកលោក ចូ បៃដិន បានហៅមេដឹកនាំរុស្ស៊ីលោក វ្ល៉ាឌីមៀ ពូទីន ថា ជាអ្នកកាប់សម្លាប់ និងនិយាយថា លោកមិនគួរត្រូវបានអនុញ្ញាតឱ្យបន្តកាន់អំណាចឡើយ។

លោក ម៉ាក្រុង បានប្រាប់ទូរទស្សន៍បារាំង France 3 ថា លោកគ្រោងនឹងនិយាយជាមួយលោក ពូទីន អំពីស្ថានការណ៍នៅអ៊ុយក្រែនក្នុងរយៈពេលពីរថ្ងៃបន្ទាប់។ លោកបាននិយាយថា គោលដៅរបស់លោក គឺការសម្រេចបាននូវបទឈប់បាញ់ជាលើកដំបូងហើយបន្ទាប់មកគឺការដកទ័ពទាំងអស់របស់រុស្ស៊ី តាមរយៈមធ្យោបាយការទូត។ ប៉ុន្តែលោកថា រឿងនេះនឹងមិនអាចទៅរួចទេ បើសិនជាមានការបោះពាក្យសម្តី ឬការធ្វើសកម្មភាពនានាដោយមិនប្រុងប្រយ័ត្ន៕ ប្រភព៖ RT ប្រែសម្រួលដោយ ៖ ឈឹម ទីណា