ភ្នំពេញ៖ លោកវរៈសេនីយ៍ឯក ហ៊ាង ថារ៉េត អធិការនគរបាលខណ្ឌឬស្សីកែវ បានប្រាប់អ្នកយកព័ត៌មានឱ្យដឹងថា កម្លាំងនគរបាលខណ្ឌ បានបង្ក្រាបជាក់ស្តែកករណីបើកលេងល្បែងស៊ីសងខុសច្បាប់ (ឆ្នោតវៀតណាម) នៅថ្ងៃទី ២៧ ខែមីនា ឆ្នាំ២០២២ វេលាម៉ោង ១៥ និង ០០នាទី នៅចំណុចផ្ទះលេខV២៤៨ផ្លូវបេតុង ក្រុមទី១២ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ ឃាត់ខ្លួនបានជនសង្ស័យម្នាក់ និងវត្ថុតាងមួយចំនួន ។

មន្ត្រីនគរបាលខណ្ឌ បានឱ្យដឹងថា ជនសង្ស័យឈ្មោះ អេង ចិន្តា ភេទស្រី អាយុ៤៣ឆ្នាំ មានទីលំនៅស្នាក់នៅផ្ទះកើតហេតុខាងលើ ។ មន្ត្រីនគរបាលខណ្ឌបានបន្តថា នៅថ្ងៃកើតហេតុ ជនសង្ស័យ បានអង្គុយកត់ឆ្នោតវៀតណាម ត្រូវបានកំលាំងសមត្ថកិច្ច ធ្វើការបង្រ្កាបឃាត់ខ្លួន រួមនឹងវត្ថុតាងយកមកអធិការដ្ឋានខណ្ឌឬស្សីកែវ ដើម្បីសួរនាំ ។

បច្ចុប្បន្ន កម្លាំងនគរបាលខណ្ឌ បានកសាងសុំណុំរឿង ចាត់ការតាមនិតិវិធី ៕ ដោយ ប៊ុនធី