ភ្នំពេញ ៖ រថយន្តហុីយ៉ាន់ដាយមួយគ្រឿង ដែលបេីកបរដោយបុរសម្នាក់ ចុះពីលើស្ពានអាកាសស្ទឹងមានជ័យក្នុងល្បឿនលឿន និងមិនប្រយ័ត្នបានបុកខឿន បង្កាន់ដៃស្ពានព្រមទាំងបង្គោលភ្លើង ១ដើម បណ្ដាលឲ្យបាក់រៀបដល់ដីរងការខូចខាតយ៉ាងដំណំ ឯរថយន្តបង្កកល់លើខឿនទៅមុខលែងរួច កាលពីវេលាម៉ោង៨ និង១០នាទីព្រឹកថ្ងៃអង្គារ៍ ទី២៩ ខែមីនា ឆ្នាំ២០២២ នៅត្រង់ចំណុចលេីស្ពានអាកាសស្ទឹងមានជ័យ តាមបណ្ដោយផ្លូវ២៧១ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បើករថយន្តម៉ាក ហ៊ីយ៉ាន់ដាយ ក្បាលពណ៌ស ពាក់ស្លាកលេខភ្នំពេញ3C-3873ធ្វើដំណើរតាមបណ្ដោយផ្លូវ២៧១ ទិសដៅពីត្បូងទៅជើងឡើងស្ពានអាកាសស្ទឹងមានជ័យ ក្នុងល្បឿនយ៉ាងលឿន ខណៈមកដល់ចំណុចកើតហេតុខាងលើដោយស្ថានភាពផ្លូវកោងផងនោះបានជ្រុលបុករះខឿននិងបង្កាន់ដៃស្ពានព្រមទាំងបង្គោលភ្លើងបំភ្លឺផ្លូវបាក់១ដើមរងការខូចខាតយ៉ាងដំណំ ភ្លាមៗនោះដែរតៃកុងរថយន្តឃើញសភាពការណ៍មិនស្រួលក៏ចុះរត់គេចខ្លួនបាត់។

ក្រោយកើតហេតុ សមត្ថកិច្ចមូលដ្ឋានសហការជាមួយសមត្ថកិច្ចជំនាញចរាចរណ៍ ចុះមកធ្វេីការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំឲ្យម្ចាស់រថយន្តចូលខ្លួនមកដោះស្រាយតាមច្បាប់ ៕ ដោយ ៖ ជីម ភារ៉ា