លោក ម៉ាក្រុង ហាក់ព្យាយាមរត់ឱ្យទាន់គេក្នុងយុទ្ធនាការរកសម្លេងឆ្នោត ក្រោយសន្ទុះនៃការគាំទ្រគូប្រជែងហក់ឡើង
នៅមិនដល់១សប្ដាហ៍ទៀតទេ ការបោះឆ្នោតប្រធានាធិបតីបារាំងនឹងប្រព្រឹត្តទៅ ហើយជោគវាសនាក្នុងនាមជាមេដឹកនាំរបស់លោក អេម៉ានុយអែល ម៉ាក្រុង (Emmanuel Macron) យ៉ាងណានោះនឹងត្រូវបានកំណត់ ខណៈដែលការគាំទ្រទៅលើបេក្ខជនស្ដាំនិយមជ្រុលដែលជាគូប្រជែង គឺអ្នកស្រី Marine Le Pen កំពុងស្ទុះឡើងក្នុងរយៈពេលប៉ុន្មានសប្ដាហ៍ចុងក្រោយនេះ។
សន្ទុះនៃការគាំទ្រគូប្រជែង តម្រូវឱ្យលោក ម៉ាក្រុង តម្លើងសម្លេងលើគោលនយោបាយដឹកនាំ ក្នុងយុទ្ធនាការឃោសនារកសម្លេងឆ្នោតដ៏យឺតយ៉ាវរបស់លោកកាលពីចុងសប្ដាហ៍ ខណៈដែលអ្នកវិភាគមួយចំនួននិយាយថា សេណរីយ៉ូអាក្រក់សម្រាប់មេដឹកនាំបារាំងរូបនេះអាចនឹងកើតមានឡើង គឺអ្នកស្រី Le Pen អាចនឹងឈ្នះ។
ការស្ទង់មតិថ្មីមួយរបស់ស្ថាប័នស្រាវជ្រាវបារាំង Ifop-Fiducial ដែលចេញផ្សាយកាលពីថ្ងៃចន្ទ បង្ហាញថា លោកស្រី Le Pen ទទួលសម្លេងគាំទ្រ ២១, ៥ ភាគរយនៅក្នុងការបោះឆ្នោតជុំទី១នាថ្ងៃអាទិត្យខាងមុខ ខណៈដែលលោក ម៉ាក្រុង ទទួលបានសម្លេង ២៨ ភាគរយ ក្នុងចំណោមបេក្ខជនប្រធានាធិបតីដទៃៗទៀត។
តាមទិន្នន័យនេះ បេក្ខជននាំមុខទាំង២រូប នឹងឈានដល់ការប្រកួតប្រជែងគ្នាក្នុងការបោះឆ្នោតជុំទី២នៅថ្ងៃទី២៤ ខែមេសា ហើយនឹងកាន់តែបារម្ភសម្រាប់លោក ម៉ាក្រុង ក្នុងការយកឈ្នះអ្នកស្រី Le Pen ត្រឹមសម្លេង ៥៣,៥ ភាគរយ ទល់នឹង ៤៦,៥ ភាគរយ។ ចន្លោះនេះហាក់តូចខ្លាំងបើប្រៀបធៀបនឹងលទ្ធផលបោះឆ្នោតប្រធានាធិបតីចុងក្រោយក្នុងឆ្នាំ ២០១៧ ដែលនាពេលនោះ លោក ម៉ាក្រុង បានយកឈ្នះអ្នកស្រី Le Pen ក្នុងសម្លេងបោះឆ្នោតគាំទ្រ ៦៦,១ ភាគរយ ទល់នឹង ៣៣,៩ ភាគរយ។
ការធ្លាក់ចុះនៃសន្ទុះគាំទ្រលោក ម៉ាក្រុង ត្រូវបានគេផ្សាភ្ជាប់ទៅនឹងលទ្ធផលមួយនៃការធ្វើយុទ្ធនាការឃោសនាបោះឆ្នោតយឺតយ៉ាវរបស់លោក ដោយសាររវល់នឹងកិច្ចការទូតព្យាយាមបញ្ចប់សង្រ្គាមនៅអ៊ុយក្រែន ហើយផ្តោតលើកំណែទម្រង់សេដ្ឋកិច្ចដែលមិនសូវពេញនិយម រួមទាំងការបង្កើនអាយុចូលនិវត្តន៍ជាដើម។
ចំណែកសន្ទុះនៃការគាំទ្រអ្នកស្រី Le Pen ដែលប្រឆាំងនឹងអន្តប្រវេសន៍វិញឯណោះវិញ កើនឡើងក្នុងរយៈពេល២-៣សប្តាហ៍កន្លងមកនេះ តាមរយៈការឃោសនាគោលនយោបាយរបស់អ្នកស្រីដែលផ្តោតលើបញ្ហាតម្លៃនៃការរស់នៅ ដែលប្រជាជនបារាំងរាប់លាននាក់កំពុងជួបប្រទះ ក្រោយតម្លៃហ្គាសឡើងថ្លៃជាង ៣៥ ភាគរយក្នុងឆ្នាំកន្លងទៅ។
លោក Nicolas Tenzer សាស្រ្តាចារ្យវិទ្យាសាស្ត្រនយោបាយនៅសាកលវិទ្យាល័យ Sciences Po និយាយប្រាប់កាសែតញូវយ៉ងថែមស៍ថា៖ «វាជាការបំភាន់ដែលថា លោក ម៉ាក្រុង នឹងឈ្នះការបោះឆ្នោតនេះ។ ជាមួយនឹងអត្រាមិនបោះឆ្នោតខ្ពស់ ដែលអាចកើតមាន និងកម្រិតនៃការស្អប់ប្រធានាធិបតីក្នុងចំណោមមនុស្សមួយចំនួន អាចបង្កើតឱ្យមានការភ្ញាក់ផ្អើលពិតប្រាកដ។ គំនិតដែលថាអ្នកស្រី Le Pen នឹងឈ្នះ គឺអាចទៅរួច»។
ការយល់ឃើញបែបនេះ ប្រហែលជាមិនអាចទៅរួចកាលពីខែមុន នៅពេលការគាំទ្រអ្នកស្រី Le Pen ដែលកំពុងប៉ុនប៉ងយកអំណាចជាមេដឹកនាំជាលើកទី៣ នៅកម្រិតទាបជាងសន្ទុះថ្មីនៅឡើយ។ យ៉ាងណាមិញ សម្លេងគាំទ្រលោក ម៉ាក្រុង បានធ្លាក់ចុះ២ឬ៣ភាគរយនៅក្នុងការស្ទង់មតិកាលពីសប្តាហ៍មុន ដោយរងការរិះគន់កាន់តែខ្លាំងឡើងចំពោះការបដិសេធរបស់លោកក្នុងការជជែកដេញដោលជាមួយបេក្ខជនផ្សេងទៀត និងគោលការណ៍របស់លោកដែលផ្ដោតលើបញ្ហាខាងក្រៅដូចជាសង្រ្គាម និងសន្តិភាពនៅអឺរ៉ុប សំខាន់ជាងផែនការប្រជាធិបតេយ្យក្នុងស្រុកបារាំង។
ថ្លែងទៅកាន់អ្នកគាំទ្ររបស់លោកក្នុងយុទ្ធនាការឃោសនាជាលើកដំបូងកាលពីចុងសប្ដាហ៍ ដែលឆ្លើយតបនឹងការព្រួយបារម្ភនឹងការចំណាយច្រើនរបស់ពលរដ្ឋបារាំងលើថ្លៃសាំង ផ្ទះជួល និងការចំណាយផ្សេងៗ លោក ម៉ាក្រុង សន្យាថានឹងវិយោគថែមទៀតក្នុងវិស័យអប់រំ ដំឡើងប្រាក់សោធនអប្បបរមា និងផ្តល់ប្រាក់រង្វាន់ដោយមិនបង់ពន្ធដល់និយោជិតក្នុងរដូវក្តៅនេះ។
វាមានអារម្មណ៍ថា ជាពេលដែលត្រូវតាមឱ្យទាន់គេមួយសម្រាប់លោកម៉ាក្រុង បន្ទាប់ពីលោកពន្យាពេលក្នុងការប្រកាសថាបន្តឈរឈ្មោះបោះឆ្នោត ដោយវិនិច្ឆ័យថារូបភាពរបស់លោកក្នុងនាមជារដ្ឋបុរស និងអ្នកបង្កើតសន្តិភាព នឹងគ្រប់គ្រាន់ដើម្បីធានាឱ្យលោកអាចកាន់អំណាចនៅអាណត្តិទី២។
លោក Vincent Martigny សាស្ត្រាចារ្យផ្នែកវិទ្យាសាស្ត្រនយោបាយនៅសាកលវិទ្យាល័យ Nice និយាយថា៖ «ជម្រើសរបស់លោក [ម៉ាក្រុង] ក្នុងការបន្តធ្វើជាប្រមុខរដ្ឋរហូតដល់ទីបញ្ចប់ បានរារាំងលោកពីការក្លាយជាបេក្ខជនពិតប្រាកដ»។
សេណារីយ៉ូដែលគួរឱ្យព្រួយបារម្ភសម្រាប់លោក ម៉ាក្រុង គឺថា សម្លេងគាំទ្ររបស់លោក លោក Éric Zemmour បេក្ខជនប្រធានាធិបតីស្ដាំនិយមជ្រុលម្នាក់ទៀត ដែលបានទាញចំណាប់អារម្មណ៍អ្នកស្រី Le Pen ទៅលើមជ្ឍដ្ឋាននយោបាយស្តាំនិយមដែលថាសាសនាអ៊ិស្លាម និងបារាំងមិនត្រូវគ្នានោះ នឹងធ្លាក់ទៅលើលោកស្រី Le Pen ក្នុងការបោះឆ្នោត។ អ្នកស្រីអាចនឹងទាញសម្លេងឆ្នោតបន្ថែមទៀត ពីអ្នកបោះឆ្នោតពាក់កណ្ដាលស្តាំនិយមមួយចំនួន ដែលយល់ឃើញថា អន្តោប្រវេសន៍គឺជាបញ្ហាស្នូល ដូចនឹងអ្វីដែលលោក Zemmour បានសាបព្រោះនាពេលកន្លងមក។
លោកស្រី Le Pen ដែលមានទំនោរគាំទ្រមេដឹកនាំរុស្ស៊ីលោក វ្ល៉ាឌីមៀរ ពូទីន ផ្តោតលើបញ្ហាសេដ្ឋកិច្ចដោយមិនឈប់ឈរ ដោយសន្យាថានឹងកាត់បន្ថយថ្លៃសាំង និងអគ្គិសនី យកពន្ធលើការជួលបុគ្គលិកបរទេសឱ្យពេញចិត្តនឹងជាតិ រក្សាអាយុចូលនិវត្តន៍ត្រឹម ៦២ ឆ្នាំ ខណៈលោក ម៉ាក្រុង ចង់បង្កើនដល់ ៦៥ ។
យ៉ាងណាមិញ លោក ម៉ាក្រុង ព្រមានថា ជនជាតិបារាំងនឹងត្រូវ «ធ្វើការឱ្យកាន់តែខ្លាំងឡើង» ដែលជាឃ្លាជាទីគោរពចំពោះអតីតប្រធានាធិបតីពាក់កណ្ដាលស្តាំនិយមលោក Nicolas Sarkozy ហើយដូច្នេះ វាជាមធ្យោបាយដើម្បីទាក់ទាញអ្នកដើរតាមដ៏ស្មោះត្រង់របស់លោក Sarkozy ឱ្យងាកទៅគាំទ្រលោក។
ប្រភព៖ New York Times
