រុស្ស៊ីបន្តការផ្គត់ផ្គង់ហ្គាស ទោះបីសហភាពអឺរ៉ុបពិចារណាដាក់ទណ្ឌកម្មកាន់តែតឹងរ៉ឹងក្ដី
រុស្ស៊ីបន្តផ្គត់ផ្គង់ឧស្ម័នធម្មជាតិ (ហ្គាស) តាមរយៈបំពង់បង្ហូរសំខាន់ៗទៅកាន់អឺរ៉ុបកាលពីថ្ងៃចន្ទ ទោះបីជាមានភាពមិនច្បាស់លាស់លើលក្ខខណ្ឌនៃការទូទាត់ប្រាក់ និងការពិចារណារឹតបន្តឹងទណ្ឌកម្មប្រឆាំងនឹងក្រុងម៉ូស្គូពីសហភាពអឺរ៉ុប ដែលកំពុងថ្កោលទោសរុស្ស៊ីពីបទឧក្រិដ្ឋកម្មសង្រ្គាមនៅអ៊ុយក្រែនក្ដី។
ទិន្នន័យពីប្រតិបត្តិករ Gascade បង្ហាញថា ឧស្ម័នធម្មជាតិនៅតែបង្ហូរតាមបំពង់ Yamal-Europe នៅចំណុចព្រំដែន Mallnow របស់អាល្លឺម៉ង់។ លទ្ធផលនៃការដេញថ្លៃបានបង្ហាញថាក្រុមហ៊ុនឧស្ម័នយក្សរុស្ស៊ី Gazprom បានកក់ទុកលទ្ធភាពដឹកជញ្ជូនឧស្ម័នធម្មជាតិនាពេលខាងមុខតាមរយៈ Yamal ។ ក្រុមហ៊ុននេះបានកក់ទុក ៤,៩ លានគីឡូវ៉ាត់ម៉ោង/ម៉ោង សម្រាប់យប់ថ្ងៃចន្ទ និង ១,៤ លានគីឡូវ៉ាត់ម៉ោង/ម៉ោងសម្រាប់ថ្ងៃអង្គារ។
ការស្នើសុំសម្រាប់ការចែកចាយឧស្ម័នរបស់រុស្ស៊ីតាមរយៈច្រកចូល Velke Kapusany របស់ស្លូវ៉ាគីពីអ៊ុយក្រែន មានស្ថិរភាពកាលពីថ្ងៃចន្ទក្នុងលំហូរជាង ៩,៦ សែនមេហ្គាវ៉ាត់ម៉ោង/ថ្ងៃ ខណៈដែលហូរតាមបំពង់ Nord Stream 1 ទៅអាល្លឺម៉ង់នៅជាង ៧៣,៤ លានគីឡូវ៉ាត់ម៉ោង/ម៉ោង។
ក្រុមហ៊ុន Gazprom និយាយថា ខ្លួនកំពុងបន្តផ្គត់ផ្គង់ឧស្ម័នធម្មជាតិទៅកាន់អឺរ៉ុបតាមរយៈអ៊ុយក្រែន ស្របតាមសំណើរបស់អ្នកប្រើប្រាស់អឺរ៉ុប។ ទោះជាយ៉ាងណាក៏ដោយ សំណួរនៅតែមានលើការចែកចាយនាពេលអនាគត ដោយគិតពីការទាមទាររបស់វិមានក្រឹមឡាំង ដែលឱ្យអ្នកទិញទូទាត់ឱ្យក្រុមហ៊ុន Gazprom ជាប្រាក់រូប ខណៈដែលអ្នកប្រើប្រាស់អឺរ៉ុបបដិសេធលើការទាមទារនេះ។
បន្ថែមពីលើភាពស្រពិចស្រពិលនៃការទូទាត់ សហភាពអឺរ៉ុបក៏ជំរុញឱ្យមានការអំពាវនាវឱ្យមានការដាក់ទណ្ឌកម្មកាន់តែតឹងរ៉ឹងលើប្រទេសរុស្ស៊ី ចំពោះរបាយការណ៍សម្លាប់ជនស៊ីវិលរបស់យោធារុស្ស៊ីនៅក្រុងប៊ូចាក្បែររដ្ឋធានីកៀវរបស់អ៊ុយក្រែន ដែលរុស្ស៊ីបដិសេធថាជាការរៀបចំដើម្បីបង្ខូចឈ្មោះរបស់ខ្លួន។ចំពោះករណីនេះ អាល្លឺម៉ង់និយាយកាលពីថ្ងៃចន្ទថា សហភាពអឺរ៉ុបនឹង «រឹតបន្តឹងយ៉ាងតឹងរ៉ឹង»លើទណ្ឌកម្មរបស់ខ្លួនប្រឆាំងនឹងរុស្ស៊ីបន្ថែមទៀត។ ប៉ុន្តែបន្ថែមពីលើសំណើកាត់ផ្ដាច់សេដ្ឋកិច្ចជាមួយរុស្ស៊ី រដ្ឋមន្ត្រីក្រសួងហិរញ្ញវត្ថុអាល្លឺម៉ង់លោក Christian Lindner បែរជាបដិសេធមិនបិទការនាំចូលហ្គាសពីរុស្ស៊ី ខណៈដែលអ៊ីតាលី ដែលពឹងផ្អែកខ្លាំងលើឧស្ម័នធម្មជាតិរុស្ស៊ីដូចគ្នានិយាយថា ខ្លួននឹងមិនដាក់បោះឆ្នោតវេតូលើទណ្ឌកម្មបិទការនាំចូលឧស្ម័នពីរុស្ស៊ីឡើយ។
ប្រភព៖ Reuters
