មេរោគបំប្លែង BA.2 នៃវ៉ារ៉្យង់អូមីក្រុងនឹងបង្ករលកឆ្លងធំនៅអាមេរិកក្នុងរយៈពេល ២ សប្ដាហ៍
យោងតាមទិន្នន័យពីមជ្ឈមណ្ឌលគ្រប់គ្រង និងបង្ការជំងឺរបស់អាមេរិក មេរោគបំប្លែង BA.2 នៃពីវ៉ារ្យង់អូមីក្រុង បានឆ្លងកាន់តែច្រើន ដោយរហូតដល់ទៅ ៧២% នៃការឆ្លងជំងឺកូវីដសរុបនៅសហរដ្ឋអាមេរិកបច្ចុប្បន្នគឺបង្កដោយមេរោគបម្លែងនេះ។
មេរោគបំប្លែង BA.2 បានក្លាយជាអំបូរមេរោគចម្បងនៃជំងឺកូវីដ-១៩នៅក្នុងសហរដ្ឋអាមេរិកកាលពីសប្តាហ៍មុន ហើយឥឡូវនេះ អាចនឹងឆ្លងលើស មេរោគបំប្លែងBA.1ទៅទៀត។ លោក Ali Mokdad អ្នកជំនាញជំងឺរាតត្បាតនៅវិទ្យាស្ថានតាមដាន និងការវាយតម្លៃសុខភាពក្នុងរដ្ឋ Washington បានព្យាករណ៍ថា BA.2 នឹងបង្ករលកឆ្លងដ៏ធំក្នុងរយៈពេលពីរសប្តាហ៍ខាងមុខ។
បើទោះបីជា ការប៉ាន់ស្មានមួយចំនួនខុសគ្នាក៏ដោយ ក៏មេរោគបំប្លែង BA.2 ត្រូវបានគេជឿជាក់ថាមានសមត្ថភាពចម្លងពី ៣០% ទៅ ៨០% លឿនជាងមេរោគបំប្លែង BA.1.។
មន្ត្រីអង្គការសុខភាពពិភពលោកជាន់ខ្ពស់ម្នាក់ឈ្មោះ Maria Van Kerkhove បានពណ៌នា មេរោគបំប្លែងBA.2 ថាជាមេរោគឆ្លងច្រើនបំផុតរហូតមកដល់ពេលនេះ។ ការផ្ទុះឡើងជាថ្មី បានកើតឡើងនៅក្នុងប្រទេសអឺរ៉ុបធំៗ រួមទាំងចក្រភពអង់គ្លេស និងអាល្លឺម៉ង់ផងដែរ។
នៅសហរដ្ឋអាមេរិក លោកវេជ្ជបណ្ឌិត Anthony Fauci ទីប្រឹក្សាសុខាភិបាលជាន់ខ្ពស់ បាននិយាយថា ការឆ្លងអាចកើនឡើង ប៉ុន្តែគាត់មិនរំពឹងថា នឹងមានការកើនឡើងដ៏ធំផ្សេងទៀតនោះទេ។ លោក ជឿថា ការឆ្លងនៅក្នុងសហរដ្ឋអាមេរិកទំនងជានឹងធ្លាក់ចុះក្នុងរយៈពេល ១ ឬ ២ សប្ដាហ៍ហើយបន្ទាប់មកធ្លាក់ចុះរហូតដល់រដូវរងា។
ប្រភព៖ CNBC
