អាល្លឺម៉ង់នឹងចូលកាន់កាប់គ្រប់គ្រងក្រុមហ៊ុន Gazprom Germania ដើម្បីធានាការផ្គត់ផ្គង់ថាមពល
រដ្ឋមន្ត្រីក្រសួងសេដ្ឋកិច្ចអាល្លឺម៉ង់ លោក Robert Habeck និយាយកាលពីថ្ងៃចន្ទថា ក្រុមហ៊ុន Gazprom Germania ដែលជាអាជីវកម្មពាណិជ្ជកម្មថាមពល និងជាក្រុមហ៊ុនបុត្រសម្ព័ន្ធរបស់ក្រុមហ៊ុនថាមពលរុស្ស៊ី Gazprom នឹងត្រូវផ្ទេរការគ្រប់គ្រងទៅឱ្យនិយតកររបស់អាល្លឺម៉ង់ជាបណ្ដោះអាសន្នរហូតដល់ចុងខែកញ្ញា ដើម្បីធានាសុវត្ថិភាពថាមពល។
ការផ្ទេរនេះ នឹងអនុញ្ញាតឱ្យទីភ្នាក់ងារបណ្ដាញសហព័ន្ធ (Bundesnetzagentur)ទទួលតួនាទីជាម្ចាស់ភាគហ៊ុន ហើយអាចចាត់វិធានការចាំបាច់ទាំងអស់ ដើម្បីធានាសុវត្ថិភាពនៃការផ្គត់ផ្គង់ក្នុងប្រទេស ប៉ុន្តែរដ្ឋាភិបាលនឹងមិនកាន់កាប់កម្មសិទ្ធក្រុមហ៊ុនទេ។ នេះបើតាមការនិយាយរបស់លោក Habeck ដែលបន្ថែមថា សន្តិសុខនៃការផ្គត់ផ្គង់ថាមពលអាល្លឺម៉ង់បច្ចុប្បន្ននេះត្រូវបានធានា ចំពេលមានវិបត្តិក្នុងទំនាក់ទំនងថាមពលរវាងរុស្ស៊ី។
វិធានការរបស់រដ្ឋាភិបាលអាល្លឺម៉ង់ធ្វើឡើង ក្រោយពេលដែលក្រុមហ៊ុន Gazprom ប្រកាសកាលពីថ្ងៃសុក្រថា ក្រុមហ៊ុន Gazprom Germania លែងជាកម្មសិទ្ធិរបស់ខ្លួនទៀតហើយ ប៉ុន្តែមិនផ្ដល់ព័ត៌មានលម្អិត ឬការពន្យល់អំពីការសម្រេចចិត្តរបស់ខ្លួន។ ឆ្លើយតបនឹងការប្រកាសនេះ លោក Habeck និយាយថា ក្រុមហ៊ុនឧស្ម័នយក្សរុស្ស៊ីផ្ដាច់ក្រុមហ៊ុនបុត្រសម្ព័ន្ធអាល្លឺម៉ង់ចេញ ដោយមិនស្វែងរកការយល់ព្រមពីរដ្ឋាភិបាល និងបំពានច្បាប់ពាណិជ្ជកម្មបរទេសរបស់អាល្លឺម៉ង់។
ក្រុមហ៊ុនអាល្លឺម៉ង់ Gazprom Germania ដំណើរការកន្លែងផ្ទុកឧស្ម័នធម្មជាតិដ៏ធំបំផុតរបស់ប្រទេសក្នុងក្រុងភាគខាងជើង Rehden នៃរដ្ឋ Lower Saxony ដែលតំបន់នេះ ត្រូវបានចាត់ទុកថាជាគន្លឹះនៃសុវត្ថិភាពថាមពលរបស់អាល្លឺម៉ង់។ លោក Habeck និយាយថា៖ «[ការផ្ទេរការគ្រប់គ្រង]នេះក៏មានន័យថា យើងមិនអនុញ្ញាតឱ្យហេដ្ឋារចនាសម្ព័ន្ធថាមពលរបស់អាល្លឺម៉ង់ ក្លាយជាកម្មវត្ថុនៃការសម្រេចចិត្តទាំងបំពានពីវិមានក្រឹមឡាំងនោះទេ»។
អាល្លឺម៉ង់គាំទ្រការដាក់ទណ្ឌកម្មរបស់លោកខាងលិច ប្រឆាំងនឹងទីក្រុងម៉ូស្គូជុំវិញការលុកលុយអ៊ុយក្រែន ប៉ុន្តែដោយសារតែការពឹងផ្អែកយ៉ាងខ្លាំងលើការនាំចូលថាមពលពីរុស្ស៊ីមកទល់ពេលនេះ ទីក្រុងប៊ែរឡាំងនៅតែស្ទាក់ស្ទើនឹងពហិការបិទការនាំចូលប្រេង និងឧស្ម័នរបស់រុស្ស៊ី ទោះបីថ្កោលទោសយ៉ាងម៉ឺងមាត់ចំពោះរបាយការណ៍សម្លាប់ជនស៊ីវិលរង្គាលនៅអ៊ុយក្រែននាពេលថ្មីៗនេះក៏ដោយ។
ប្រភព៖ Aljazeera
