បាងកក៖ នាយករដ្ឋមន្ត្រីថៃ ប្រាយុទ្ធ ចាន់អូចា បានទទួលស្គាល់ថា ការបញ្ចប់ការផ្ទុះឡើងនៃមេរោគកូវីដ-១៩ នៅក្នុងប្រទេសថៃ គឺមិនត្រូវបានគេមើលឃើញនោះទេ ហើយបានសង្កត់ធ្ងន់លើតម្រូវការសម្រាប់ក្រុមដែលមានហានិភ័យ រួមទាំងកុមារតូចៗដែលមិនទាន់បានចាក់វ៉ាក់សាំង ដើម្បីទទួលការចាក់វ៉ាក់សាំង Covid-19 របស់ពួកគេឱ្យបានឆាប់ តាមដែលអាចធ្វើបាន។

អ្នកនាំពាក្យរាជរដ្ឋាភិបាលលោក Thanakorn Wangboonkongchana បាននិយាយកាលពីថ្ងៃទី៦ មេសាថា នាយករដ្ឋមន្ត្រីចង់ព្រមានសាធារណជនថា ការផ្ទុះឡើងទំនងជាមិនអាចបញ្ចប់ក្នុងពេលដ៏ខ្លីខាងមុខនេះទេ ហើយបានសម្តែងការព្រួយបារម្ភអំពីការកើនឡើងនៃការឆ្លង និងការស្លាប់ក្នុងចំណោមកុមារតូចៗ។

ឧត្តមសេនីយ Prayut តាមរយៈសេចក្តីថ្លែងការណ៍ ក៏បានជំរុញដល់គ្រួសារដែលមានកុមារអាយុចាប់ពី ៥ ឆ្នាំឡើងទៅគួរតែចាក់វ៉ាក់សាំងពួកគេ ដើម្បីកាត់បន្ថយឱកាសនៃការវិវត្តន៍នៃរោគសញ្ញាធ្ងន់ធ្ងរជាងនេះ ប្រសិនបើឆ្លងមេរោគនេះ។

អ្នកនាំពាក្យរូបនេះបាននិយាយថា កុមារតូចៗមួយចំនួនដែលបានស្លាប់បន្ទាប់ពីឆ្លងមេរោគ Covid-19 ត្រូវបានអាជ្ញាធរសុខាភិបាលរកឃើញថា មិនបានទទួលថ្នាំបង្ការប្រឆាំងនឹងមេរោគនេះទេ។

ជាការកត់សម្គាល់ ថៃនៅតែបន្តឆ្លងប្រចាំថ្ងៃរាប់ម៉ឺននាក់ និងស្លាប់មនុស្សព្រោះកូវីដ រាប់សិបនាក់។ ជាក់ស្តែង នាព្រឹកថ្ងៃទី៧ មេសា បានប្រកាសថា ឆ្លងថ្មីជាង ២៦០០០នាក់ ស្លាប់ ៩១នាក់បន្ថែមទៀត ត្រឹមពេល២៤ម៉ោងចុងក្រោយ៕ ប្រែសម្រួល៖ សារ៉ាត