តុលាការចេញដីកាឱ្យនាំខ្លួនលោក សៀម ភ្លុក តំណាងស្ថាបនិកគណបក្សបេះដូងជាតិ
ភ្នំពញ៖ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាបង្គាប់ឱ្យកម្លាំងសាធារណ:នាំលោក សៀម ភ្លុក តំណាងស្ថាបនិកគណបក្សបេះដូងជាតិ មកប្រគល់ជូនសាលាដំបូងរាជធានីភ្នំពេញឱ្យបានមុនថ្ងៃទី២៥ ខែមេសាឆ្នាំ២០២២ ជាកំហិតដើម្បីចាត់ការតាមច្បាប់។
ដីកាបង្គាប់ឱ្យនាំខ្លួននេះ ចេញដោយចៅក្រមស៊ើបសួរសាលាដំបូងរាជធានីភ្នំពេញ លិ សុខា កាលពីថ្ងៃទី៤ ខែមេសា ឆ្នាំ២០២២ ។
ដីកាបង្គាប់ឱ្យនាំខ្លួនបានឱ្យដឹងថា លោក សៀម ភ្លុក ត្រូវបានចោទប្រកាន់ពីបទក្លែងបន្លំ និងបទប្រើប្រាស់លិខិតក្លែង ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០២១ ដែលបទល្មើស ដែលមានចែង និងឱ្យផ្តន្ទាទោសតាមមាត្រា៦២៦, មាត្រា៦២៧ និងមាត្រា៦២៨ នៃក្រមព្រហ្មទណ្ឌ។ ដើម្បីធានាដល់ការស៊ើបសួរឱ្យបានពេញលេញ គប្បីសម្រេចនាំខ្លួនឈ្មោះ សៀម ភ្លុក មកចំពោះមុខចៅក្រមស៊ើបសួរ ដើម្បីបំភ្លឺការពិត។ ហេតុដូច្នេះសម្រេច៖
១ . ឱ្យនាំខ្លួនឈ្មោះ សៀម ភ្លុក ភេទប្រុស ដែលមានអត្តសញ្ញាណខាងលើនេះ។
២. បង្គាប់មកកងកម្លាំងសាធារណៈឱ្យនាំខ្លួនជនត្រូវចោទខាងលើនេះ មកប្រគល់ជូនសាលាដំបូងរាជធានីភ្នំពេញ ឱ្យបានមុនថ្ងៃទី២៥ ខែមេសា ឆ្នាំ២០២២ ជាកំហិត ដើម្បីចាត់ការតាមច្បាប់។
តវ៉ា។
សូមជម្រាបថា តុលាការបានចេញដីកាកោះហៅ លោក សៀម ភ្លុក តំណាងស្ថាបនិកគណបក្សបេះដូងជាតិឲ្យចូលខ្លួន ទៅកាន់អយ្យការអមសាលាដំបូងរាជធានីភ្នំពេញកាលពីថ្ងៃទី២២ ខែមីនាឆ្នាំ២០២២ ដើម្បីសាកសួរពីដំណើររឿង ពាក់ព័ន្ធការផ្តិតស្នាមមេដៃជំនួសការក្លែងបន្លំ ត្តសញ្ញាណបុគ្គល និង ការផ្តិតស្នាមមេដៃឲ្យខូចគុណភាព។ ដីកាកោះឲ្យ ចូលខ្លួននេះចេញដោយលោក សេង ហៀង ព្រះរាជអាជ្ញារង។
គួរបញ្ជាក់ថា ក្រសួងមហាផ្ទៃបានបដិសេធចំពោះសំណើស្នើសុំចុះបញ្ជីរបស់គណបក្សបេះដូងជាតិ ក្នុងបញ្ជីគណបក្ស នយោបាយនៅក្រសួងមហាផ្ទៃ ។ ការបដិសេធនេះបានធ្វើឡើងបន្ទាប់ពីក្រសួងមហាផ្ទៃបានរកឃើញថា ការផ្តិតស្នាម មេដៃរបស់សមាជិកដើម្បីគាំទ្រក្នុងការសុំចុះបញ្ជីមានចេតនាទុច្ចរិត ដោយមានការផ្តិតស្នាមមេដៃជំនួស ការក្លែងបន្លំ អត្តសញ្ញាណបុគ្គល និង ការផ្ដិតធ្វើឲ្យខូចគុណភាព ដើម្បីបង្កើនបរិមាណចំនួនសមាជិក ៕ដោយ៖ពលជ័យ
