ភ្នំពេញ ៖ ជនសង្ស័យម្នាក់ បានធ្វើសកម្មភាពលួចម៉ូតូនៅម្ដុំរោងកុនលុច្សក្បែរផ្សារអូឬស្សី ហើយជិះក្នុងគោលបំណងទៅស្រុកកំណើតឯខេត្តព្រៃវែង ដោយធ្វើដំណើរមិនពាក់មួកសុវត្ថិភាព ខណៈពេលដែលមកដល់ចំណុចគោលដៅចរាចរណ៍គល់ស្ពានជ្រោយចង្វារ ត្រូវបានសមត្ថកិច្ចឃាត់ឃាត់ខ្លួនសួរនាំបែកធ្លាយករណីលួចម៉ូតូ។ ហេតុការណ៍ខាងលើនេះ បានកើតឡើងនៅវេលាម៉ោង១១ និង៣០នាទីព្រឹកថ្ងៃទី៨ ខែមេសា ឆ្នាំ២០២២ ស្ថិតនៅត្រង់ចំណុចគោលដៅចរាចរណ៍គល់ស្ពានជ្រោយចង្វារ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ជនសង្ស័យដែលបានធ្វើសកម្មភាពលួចម៉ូតូ ត្រូវបានសមត្ថកិច្ចឃាត់ខ្លួនមានឈ្មោះ ណាក់ នឿន ភេទប្រុស អាយុ ១៦ឆ្នាំ បច្ចុប្បន្នស្នាក់នៅអូឬស្សី២ ខណ្ឌ៧មករា រាជធានីភ្នំពេញ។ មានស្រុកកំណើតនៅឃុំពាមរូង ស្រុកស្វាយអន្ទរ ខេត្តព្រៃវែង។ ចំណែកជនរងគ្រោះមានឈ្មោះ ម៉ា នុត ភេទប្រុស អាយុ ២០ឆ្នាំ មុខរបរដឹកម៉ាស៊ីនត្រជាក់ឱ្យក្រុមហ៊ុនតាំងម៉េងលី មានស្រុកកំណើតនៅខេត្តព្រះវិហារ។

តាមប្រភពព័ត៌មានពីជនរងគ្រោះ បានប្រាប់ឱ្យដឹងថា មុនពេលកើតហេតុ ជនរងគ្រោះបានយកម៉ូតូសណ្តោងរម៉កទុកនៅមុខក្រុមហ៊ុន ដែលស្ថិតនៅតាមបណ្ដោយផ្លូវ២១៧ ម្ដុំរោងកុនអង្គរក្នុងសង្កាត់អូរឫស្សី២ ខណ្ឌ ៧មករា រាជធានីភ្នំពេញ ដូចសព្វមួយដង លុះដល់វេលាម៉ោង៧ព្រឹក ទើបដឹងថា បាត់ម៉ូតូសណ្ដោងរម៉ករបស់ក្រុមហ៊ុនបន្ទាប់មកបានឆែកកាមេរ៉ាសុវត្ថិភាព ក៏បានឃើញនៅវេលាម៉ោង២ និង៥០នាទីយប់ឈានចូលថ្ងៃទី ៨ ខែមេសា ឆ្នាំ២០២២ ឃើញជនសង្ស័យចូលមកធ្វើសកម្មភាពដោះកន្ទុយរម៉កចេញរួចកាច់កម៉ូតូ ជិះគេចខ្លួនបាត់ស្រមោលតែម្ដង។

បន្ទាប់មកនៅវេលាម៉ោង ១១ និង៣០នាទីព្រឹក ថ្ងៃខែឆ្នាំដដែល ជនរងគ្រោះបានជិះម៉ូតូសណ្ដោងរម៉កធ្វើដំណើរតាមបណ្ដោយផ្លូវព្រះមនីវង្សមកដល់ការាសសាំងកាលតិចមុខមន្ទីរពេទ្យកាល់ម៉ែត្រ ដោយម៉ូតូអស់សាំងជនរងគ្រោះ បានចូលទៅចាក់សាំង ខណៈពេលដែលកំពុងតែចាក់សាំង ក៏ស្រាប់តែប្រទះឃើញជនជនសង្ស័យជិះម៉ូតូរបស់ខ្លួន ដែលបាត់កាលពីយប់ ក៏បានជិះម៉ូតូសណ្ដោងរម៉កដេញតាមពីក្រោយ ដោយជនសង្ស័យធ្វើដំណើរជិះម៉ូតូមួយគ្រឿង ពណ៌ក្រហម Honda wave ពាក់ស្លាកលេខ ភ្នំពេញ 1-lL-5360 មកដល់ចំណុចគល់ស្ពានជ្រោយចង្វាត្រើយខាងលិច ត្រង់ចំណុចគោលដៅសមត្ថកិច្ចចរាចរផ្លូវគោក កំពុងអនុវត្តច្បាប់ចរាចរណ៍ ក៏បានប្រទះឃើញជនសង្ស័យ ដោយពុំបានពាក់មួកសុវត្ថិភាពក៏ហៅឃាត់សួរនាំ ភ្លាមនោះត្រូវបានជនរងគ្រោះមកដល់ ហើយបានបែកធ្លាយរឿងករណីកាច់កម៉ូតូតែម្ដង។

ក្រោយពេលកើតហេតុ សមត្ថកិច្ចគោលដៅគល់ស្ពានជ្រោយចង្វារ បានធ្វើការទំនាក់ទំនងទៅខាងសមត្ថកិច្ចខណ្ឌ៧មករា ចុះមកនាំខ្លួនជនសង្ស័យយកទៅកាន់កន្លែងកើតហេតុ ដើម្បី់សួរនាំកសាងសំណុំរឿងចាត់ការទៅតាមនីតិវិធី ៕ ដោយ ឆៃហួត