ទាហានអ៊ុយក្រែនធ្វើការតដៃចុងក្រោយនៅក្នុងបណ្ដាញផ្លូវក្រោមដីក្រុងម៉ារីអូប៉ូល
អស់រយៈពេលជាងប្រាំពីរសប្ដាហ៍ កងកម្លាំងឈ្លានពានរុស្ស៊ី បានឡោមព័ទ្ធ និងកំពុងខិតជិតចំណុចកណ្ដាលនៃក្រុងម៉ារីអូប៉ូល ខណៈពេលពួកគេកម្ទេចក្រុងនេះដោយការទម្លាក់គ្រាប់បែក ការបាញ់កាំភ្លើងធំ និងមីស៊ីល ធ្វើឱ្យមានការបាក់បែកអគារលំនៅឋាន មន្ទីរពេទ្យ និងអគារដទៃទៀត។
ក្នុងអំឡុងពេលនេះ អ្នកវិភាគបានចង្អុលថាកងកម្លាំងអ៊ុយក្រែននៅទីនោះគឺទំហំតូចជាង និងអាវុធ និងគ្រាប់តិចជាង កងកម្លាំងរុស្ស៊ី ហើយបានព្យាករណ៍ថាទីក្រុងនេះនឹងដួលរលំនៅពេលឆាប់ៗនេះ។ បើទោះជាយ៉ាងនេះក៏ដោយ កងកម្លាំងអ៊ុយក្រែន ដែលរួមមានកងយោធា កងឆ្មាំព្រំដែន និងកងជីវពលស្ដាំនិយម Azov បានបដិសេធមិនចុះចាញ់។ ពួកគេបានចូលជ្រកក្នុងបណ្ដាញផ្លូវក្រោមដៃនៃរោងចក្រធំៗនៃក្រុងម៉ារីអូប៉ូល ដែលរួមមានរោងចក្រដែក Azovtsal និងផ្នែកមួយចំនួននៃកំពុងផែក្រុង។
នៅប៉ុន្មានថ្ងៃថ្មីៗនេះ ចុងបញ្ចប់នៃការឡោមព័ទ្ធហាក់ដូចជាកាន់តែខិតជិតមកដល់។ កាលពីថ្ងៃសៅរ៍ ក្រសួងការពារជាតិរុស្ស៊ីបានអះអាងថាពួកគេបានបោសសម្អាតកងកម្លាំងចេញទីក្រុងនេះ ក្រៅពីកងកម្លាំងមួយចំនួនដែលចូលជ្រកក្នុងរោងចក្រ Azovstal។ បន្ទាប់ពីពាក់កណ្ដាលអធ្រាត្រ រុស្ស៊ីបានដាក់ឱសានវាទឱ្យកងកម្លាំងចុះចាញ់ និងបោះបង់អាវុធ។
ការដួលរលំនៃក្រុងម៉ារីអូប៉ូល នឹងផ្ដល់ជ័យជម្នះដ៏ធំមួយទៅឱ្យរុស្ស៊ី ដែលមានការលំបាកនៅសមរភូមិដទៃទៀត ហើយនឹងផ្ដល់តំណភ្ជាប់ផ្លូវគោកពីឧបទ្វីបគ្រីមៀរ ដល់តំបន់ផ្ដាច់ខ្លួននៅភាគខាងកើយប្រទេសអ៊ុយក្រែន។ ហើយវាក៏នឹងរំដោះធនធានយោធាសម្រាប់រុស្ស៊ីយកទៅធ្វើការវាយការវាយលុកនៅតំបន់ដទៃទៀតនៃអ៊ុយក្រែន។
សម្រាប់អ៊ុយក្រែន ការកាន់កាប់ក្រុងម៉ារីអូប៉ូល បានក្លាយជានិមិត្តរូបនៃចលនាតស៊ូទប់ទល់នឹងការឈ្លានពាន ដែលសម្លាប់ប្រជាជន និងបង្កការខូចខាតដល់រាប់រយពាន់លានដុល្លារ៕
ប្រភព៖ FT
