ភាពតានតឹងផ្ទុះឡើង ខណៈពេលដែលប៉ូលិសអ៊ីស្រាអែលវាយចូលវិហារអាល់-អាក់សាម្ដងទៀត
កាលពីថ្ងៃអាទិត្យ ទី១៧ មេសាប៉ូលិសអ៊ីស្រាអែលបានចូលទៅក្នុងវិហារអ៊ីស្លាមអាល់-អាក់សានៅក្រុងជេរូហ្សាឡឹម ខណៈពេលដែលសាសនិកជាច្រើនប្រមូលផ្ដុំសម្រាប់អធិស្ឋានពេលព្រឹក ដោយនេះជាការចូលបរិវេណវិហារម្ដងទៀតដោយប៉ូលិសអ៊ីស្រាអែល ពីរថ្ងៃបន្ទាប់ពីពួកគេចូលចាប់ខ្លួនមនុស្សរាប់រយនាក់នៅទីនោះ។
អាជ្ញាធរអ៊ីស្រាអែលបានអះអាងថាពួកគេបានបញ្ជូនកងកម្លាំងប៉ូលិសទៅកាន់វិហារនេះ គឺដើម្បីជួយសម្របសម្រួលដំណើរទៅកាន់ទីសក្ការដោយជនជាតិជ្វីហ្វស្ដាំនិយមជ្រុល ហើយក៏ដោយសារជនជាតិប៉ាឡេស្ទីនបានប្រមូលប្រមូលផ្ដុំដំថ្ម និងដាក់របាំងបិទផ្លូវផងដែរ។
ប៉ូលិសបានបណ្ដេញជនជាតិបណ្ដេញជនជាតិប៉ាឡេស្ទីនចេញពីទីវាលនៅខាងក្រៅវិហារ ប៉ុន្តែនៅមានមួយចំនួនទៀតប្រមូលផ្ដុំនៅខាងក្នុង។ មានការរាយការណ៍ថាមនុស្សយ៉ាងហោចណាស់ ១៩ នាក់បានរបួស ខណៈពេលដែលកាកបាទក្រហមប៉ាឡេស្ទីនរាយការណ៍ថាមនុស្សបីនាក់ត្រូវបានបញ្ជូនទៅមន្ទីរពេទ្យ ដោយសាររបួសពីការវាយដំ ឬគ្រាប់កាំភ្លើងជ័រ។ ប៉ូលិសនិយាយថាមនុស្ស ៩ នាក់គឺត្រូវបានចាប់ខ្លួន បន្ទាប់ពីពួកគេវាយកម្ទេចបង្អួចរថយន្តក្រុង ដែលជនជាតិជ្វីហ្វទាំងនោះជិះ។
យ៉ាងណាមិញកាលពីថ្ងៃសុក្រ ប៉ូលិសអ៊ីស្រាអែលបានវាយលុកចូលក្នុងវិហារអាល-អាក់សា ហើយចាប់ខ្លួនជនជាតិប៉ាឡេស្ទីនជាង ៣០០ នាក់ ដោយមានមនុស្សយ៉ាងហោចណាស់ ១៥៨ នាក់រងរបួស។ ប៉ូលិសអ៊ីស្រាអែលបានអះអាងថាពួកគេធ្វើបែបដើម្បីបំបែកហ្វូងមនុស្ស «ហិង្សា» ដែលមិនចាកចេញពីវិហារបន្ទាប់ពីការអធិស្ឋានពេលព្រឹក។
វិហារអាល់-អាក់សាគឺជាទីសក្ការសំខាន់ជាងគេទីបីសម្រាប់សាសនាអ៊ីស្លាម ហើយជាទីសក្ការសំខាន់ជាងគេក្នុងសាសនាជ្វីហ្វ ដែលហៅវិហារនេះថា «ប្រាសាទភ្នំ»។ ភាពតានតឹងបានកើនឡើងយ៉ាងខ្លាំងបន្ទាប់ពីក្រុមជ្រុលនិយមជនជាតិជ្វីហ្វ ប្រកាសផ្ដល់ប្រាក់រង្វាន់ដល់បុគ្គលណាដែលហ៊ានធ្វើដំណើរទៅវិហារនេះ ហើយធ្វើការបូជាយញ្ញសត្វមួយក្បាល។ ការបូជាយញ្ញគឺជាពិធីមួយក្នុងសាសនាជនជាតិជ្វីហ្វ ប៉ុន្តែត្រូវបានហាមឃាត់មិនឱ្យធ្វើក្នុងវិហារនេះទេ ហើយត្រូវបានជនជាតិប៉ាឡេស្ទីនចាត់ទុកថាជាការបង្ករឿង៕
ប្រភព៖ Aljazeera
