រុស្ស៊ីចាប់ផ្ដើមសកម្មភាពយោធាទ្រង់ទ្រាយធំ ដើម្បីដណ្ដើមការកាន់កាប់ភាគខាងកើតអ៊ុយក្រែន
កាលពីយប់ថ្ងៃចន្ទ ទី១៨ មេសាប្រធានាធិបតីអ៊ុយក្រែនលោកវ៉ុឡូឌិមៀរ ហ្សេលេនស្គី បានប្រកាសថារុស្ស៊ីបានចាប់ផ្ដើមសកម្មភាពយោធាទ្រង់ទ្រាយធំ ដែលគេរំពឹងទុកជាយូរមកហើយ ដើម្បីដណ្ដើមយកភាគច្រើននៃតំបន់ភាគខាងកើតនៃប្រទេសរបស់លោក។
«ឥឡូវនេះ យើងអាចបញ្ជាក់បានថា កងទ័ពរុស្ស៊ីបានចាប់ផ្ដើមការប្រយុទ្ធដើម្បីដណ្ដើមតំបន់ដុនបាស ដែលពួកគេបានត្រៀមជាយូរយារណាស់មកហើយ» លោកហ្សេលេនស្គីនិយាយបែបនេះហើយបន្តទៀតថា «ផ្នែកដ៏ធំមួយនៃកងទ័ពរុស្ស៊ីទាំងមូល ឥឡូវនេះត្រូវបានផ្ដោតលើការលុកលុយនេះ»។
លោកបន្ថែមទៀតថា៖ «មិនថាទាហានប៉ុន្មាននាក់ត្រូវបានជំរុញទៅទីនោះ យើងនឹងការពារខ្លួន។ យើងនឹងប្រយុទ្ធ។ យើងនឹងមិនបោះបង់អ្វីមួយជាអ៊ុយក្រែនឡើយ»។
ការលើកឡើងរបស់លោកហ្សេលេនស្គីបានកើតឡើងបន្ទាប់ពីកងកម្លាំងរុស្ស៊ីបង្កើនការវាយប្រហាររបស់ខ្លួនយ៉ាងខ្លាំង មុនពេលការចាប់ផ្ដើមនៃសកម្មភាពទ្រង់ទ្រាយធំនេះ។ សារព័ត៌មានអ៊ុយក្រែនបានរាយការណ៍អំពីការបាញ់ផ្លោងនៅទីក្រុងនានានៅជិតជួរមុខនៃសមរភូមិដុនបាស។
មីស៊ីលរុស្ស៊ីចំនួនបួនត្រូវបានបាញ់ទៅកាន់ក្រុងលឺវីវ នៅជិតព្រំដែនជាមួយប្រទេសប៉ូឡូញ ធ្វើឱ្យមនុស្ស ៧ នាក់ស្លាប់ និងយ៉ាងហោចណាស់របួស ១១ នាក់។ គេក៏បានរាយការណ៍ថាក្រុងគៀវ និងកាគៀវផងដែរ។
ប្រធានាធិបតីរស្ស៊ីលោកវ្ល៉ាឌីមៀរ ពូទីនប្រកាសគោលដៅចូលកាន់កាប់កាន់តំបន់ដុនបាស ដែលជាតំបន់ឧស្សាហកម្មដ៏សំខាន់មួយសម្រាប់ប្រទេសអ៊ុយក្រែន ហើយមួយផ្នែកធំត្រូវបានគ្រប់គ្រងដោយក្រុមផ្ដាច់ខ្លួនគាំទ្រដោយរុស្ស៊ី។ ការចូលកាន់កាប់តំបន់ដុនបាសគឺនឹងអនុញ្ញាតឱ្យរុស្ស៊ីបង្កើតច្រកផ្លូវគោកទៅកាន់ឧបទ្វីបគ្រីមៀរដែលខ្លួនកាត់យកកាលពីឆ្នាំ ២០១៤៕
ប្រភព៖ The Guardian
