អ៊ីស្រាអែលនិយាយថា រ៉ុក្កែតត្រូវបានបាញ់ចេញពីតំបន់ហ្កាហ្សា ចំពេលភាពតានតឹងកើនឡើង
កងទ័ពអ៊ីស្រាអែលនិយាយកាលពីថ្ងៃចន្ទថា ប្រព័ន្ធការពារអាកាសរបស់ខ្លួនបានស្ទាក់ចាប់គ្រាប់រ៉ុក្កែត ដែលបាញ់ចេញពីតំបន់ហ្គាហ្សាស្ទ្រីបចូលទៅក្នុងតំបន់ភាគខាងត្បូងនៃប្រទេស ក្នុងការវាយប្រហារលើកដំបូងបន្ទាប់ពីស្ងាត់អស់រយៈពេលជាច្រើនខែ ខណៈភាពតានតឹងកើនឡើងក្នុងទីក្រុងហ្សេរុយសាឡឹមខាងកើតដែលអ៊ីស្រាអែលកាន់កាប់។
ក្រុមខាងប៉ាឡេស្ទីនមិនបានអះអាងទទួលខុសត្រូវលើការបាញ់គ្រាប់រ៉ុក្កែតនោះទេ ហើយនៅថ្ងៃចន្ទដដែលនោះ ក៏គ្មានរបាយការណ៍អំពីអ្នកស្លាប់ ឬការខូចខាតដែរ។ មុនពេលការវាយប្រហារដោយគ្រាប់រ៉ុក្កែតកើតឡើង នាយករដ្ឋមន្ត្រីអ៊ីស្រាអែល លោក Naftali Bennett ចោទប្រកាន់ក្រុមហាម៉ាស់ ដែលគ្រប់គ្រងតំបន់ហ្កាហ្សា ថាធ្វើយុទ្ធនាការយាយី ប្រឆាំងនឹងអ៊ីស្រាអែល។
ភាពតានតឹងក្នុងទីក្រុងហ្សេរុយសាឡឹមខាងកើត កើតឡើងបន្ទាប់ពីកងកម្លាំងអ៊ីស្រាអែលវាយឆ្មក់វិហារអ៊ិស្លាម Al-Aqsa ជាច្រើនដងក្នុងរយៈពេលប៉ុន្មានថ្ងៃថ្មីៗនេះ ដោយចាប់ខ្លួនជនជាតិប៉ាឡេស្ទីនរាប់រយនាក់ និងបណ្តាលឲ្យមនុស្សរាប់សិបនាក់រងរបួស ហើយក្រុមហាម៉ាស់របស់ប៉ាឡេស្ទីន ព្រមានថា ឧប្បត្តិហេតុណាមួយនៅក្នុងបរិវេណវិហារនេះ នឹងក្លាយជា «បន្ទាត់ក្រហម»។
ប៉ាឡេស្ទីនចោទអ៊ីស្រាអែលពីការទន្ទ្រានយកវិហារ Al-Aqsa ក្នុងអំឡុងខែបុណ្យរ៉ាម៉ាដនរបស់មូស្លីម។ ប៉ុន្តែអ៊ីស្រាអែលនិយាយថា បាតុករប៉ាឡេស្ទីនព្យាយាមរំខានការអធិស្ឋានរបស់មូស្លីមដើម្បីការបញ្ចប់ផ្នែកនយោបាយ និងដើម្បីទប់ស្កាត់ការមកលេងរបស់ជនជាតិយូដា ដែលកំពុងប្រារព្ធពិធី «បុណ្យរំលង»។
តំបន់នៃវិហារដែលកំពុងមានភាពតានតឹងនេះ គឺជាកន្លែងសក្ការៈបូជារបស់អ្នកកាន់សាសនាអ៊ិស្លាម និងជនជាតិយូដា។ ហើយប៉ូលិសអ៊ីស្រាអែលនិយាយថា ពួកគេប្តេជ្ញាធានាថា សមាជិកនៃសាសនាទាំងអស់អាចប្រារព្ធពិធីបុណ្យនេះដោយសុវត្ថិភាព។
យ៉ាងណាមិញ អេហ្ស៊ីប និងហ្ស៊កដានី ដែលចុះហត្ថលេខាលើកិច្ចព្រមព្រៀងសន្តិភាពជាមួយអ៊ីស្រាអែល និងជាអ្នកសម្របសម្រួលលើបញ្ហាសន្តិសុខ ថ្កោលទោសចំពោះសកម្មភាពរបស់កងកម្លាំងអ៊ីស្រាអែលនៅវិហារដ៏ពិសិដ្ឋ ដោយវាធ្វើឱ្យខូចខាតធ្ងន់ធ្ងរដល់សន្តិភាពក្នុងតំបន់នោះ។
កាលពីថ្ងៃសុក្រ ជនជាតិប៉ាឡេស្ទីនយ៉ាងហោចណាស់ ១៥២ នាក់ បានរងរបួសដោយសារការវាយប្រហាររបស់ប៉ូលិសអ៊ីស្រាអែលក្នុងបរិវេណវិហារ Al-Aqsa ដែលបង្កើនការភ័យខ្លាចនៃការរុញច្រាន ត្រឡប់ទៅរកជម្លោះកាន់តែខ្លាំង។ ភាពតានតឹងកើនឡើង ក្រោយស្ងប់ស្ងាត់អស់រយៈពេលជាច្រើនខែ បន្ទាប់ពីអំពើហិង្សាកាលពីឆ្នាំមុន ដែលរាលដាលពីការវាយប្រហាររបស់កងកម្លាំងអ៊ីស្រាអែលលើក្រុមបាតុករដែលប្រឆាំងនឹងការបណ្តេញជនជាតិប៉ាឡេស្ទីនពីផ្ទះ នៅសង្កាត់ Sheikh Jarrah ក្នុងក្រុងហ្សេរុយសាឡឹមខាងកើត។
ប្រភព៖ Aljazeera
