ប្រមុខ UN ស្នើមេដឹកនាំរុស្ស៊ី និងអ៊ុយក្រែន ឱ្យជួបលោកដាច់ដោយឡែកពីគ្នាដើម្បីពិភាក្សារកសន្តិភាព
អគ្គលេខាធិការអង្គការសហប្រជាជាតិលោក អង់តូនីញ៉ូ ហ្គូតែរ៉េស (António Guterres) បានស្នើមេដឹកនាំរុស្ស៊ីលោក វ៉្លាឌីមៀ ពូទីន និងប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គី ឱ្យទទួលលោកដោយដាច់ដោយឡែកពីគ្នា ដើម្បីពិភាក្សាអំពីជំហានសន្តិភាព ខណៈសង្រ្គាមឈ្លានពានអ៊ុយក្រែនរបស់រុស្ស៊ីបន្តអូសបន្លាយ។
អ្នកនាំពាក្យអង្គការសហប្រជាជាតិ លោក Stephane Dujarric និយាយថា សំបុត្រផ្សេងគ្នាត្រូវបានប្រគល់ទៅឱ្យបេសកកម្មអចិន្ត្រៃយ៍របស់រុស្ស៊ី និងអ៊ុយក្រែនកាលពីរសៀលថ្ងៃអង្គារ ដោយស្នើសុំឱ្យលោក ពូទីន ទទួលលោក ហ្គូតែរ៉េស នៅទីក្រុងម៉ូស្គូ ដូចគ្នានឹងលោក ហ្សេឡេនស្គី នៅទីក្រុងកៀវ។
លោក Dujarric និយាយក្នុងសេចក្តីថ្លែងការណ៍ថា៖ «អគ្គលេខាធិការនិយាយថា នៅពេលគ្រោះថ្នាក់ និងផលវិបាកដ៏ធំធេងនេះ លោកចង់ពិភាក្សាអំពីជំហានបន្ទាន់ដើម្បីនាំមកនូវសន្តិភាពក្នុងប្រទេសអ៊ុយក្រែន និងអនាគតនៃពហុភាគី ដោយផ្អែកលើធម្មនុញ្ញអង្គការសហប្រជាជាតិ និងច្បាប់អន្តរជាតិ»។
សំណើជំនួបផ្សេងគ្នា ធ្វើឡើងបន្ទាប់ពី លោក ហ្គូតែរ៉េស អំពាវនាវកាលពីថ្ងៃអង្គារឱ្យផ្អាកការបាញ់គ្នាចំនួន៤ថ្ងៃនៅថ្ងៃបុណ្យអេស្ទឺរអូស្សូដក់ចុងសប្ដាហ៍នេះ ដើម្បីជម្លៀសប្រជាជនក្នុងតំបន់ជម្លោះចេញ និងបញ្ចូនជំនួយមនុស្សធម៌ទៅកាន់តំបន់ដែលរងគ្រោះខ្លាំង។
លោក ហ្គូតែរ៉េស និយាយថា មនុស្សជាង ១២ លាននាក់នៅអ៊ុយក្រែន កំពុងត្រូវការជំនួយមនុស្សធម៌ ខណៈទិន្នន័យ UN គិតត្រឹមដើមសប្ដាហ៍ បង្ហាញថា ជនស៊ីវិលចំនួន ២ ០៧២ នាក់បានស្លាប់ និងជាង ២ ៨០០ នាក់បានរងរបួស ហើយចំនួនពិតប្រាកដអាចនឹងច្រើនជាងនេះ។
នាពេលនេះ រុស្ស៊ីកំពុងបង្កើនការវាយលុកនៅតំបន់ភាគខាងកើត និងខាងត្បូងអ៊ុយក្រែន ដែលធ្វើឱ្យភាពតានតឹងកាន់តែធ្ងន់ធ្ងរទៅៗ ក្រោមលេសរំដោះពួកប៉ះបោរដែលខ្លួនគាំទ្រនៃតំបន់ដុនបាស រួមមានសាធារណរដ្ឋដុនណែតស៍ និងលូហានស្ក៍។ លោក ហ្សេឡេនស្គី និយាយថា សមរភូមិនៅតំបន់ដុនបាសបានចាប់ផ្ដើមកាលពីថ្ងៃចន្ទ។
គិតត្រឹមថ្ងៃពុធ មន្រ្តីប្រចាំតំបន់លូហានស្ក៍និយាយថា រុស្ស៊ីកាន់កាប់តំបន់នេះជាង ៨០ ភាគរយ។ ជ័យជម្នះរបស់រុស្ស៊ីនៅដុនបាស នឹងដកហូតទ្រព្យសម្បត្តិឧស្សាហកម្មអ៊ុយក្រែនដែលប្រមូលផ្តុំនៅទីនោះ រួមទាំងអណ្តូងរ៉ែ រោងចក្រលោហៈ និងរោងចក្រឧស្សាហកម្មធុនធ្ងន់ជាច្រើនទៀត។
ប្រភព៖ Reuters
