ឥណ្ឌូណេស៊ីថា លោក ហ្សេឡេនស្គី និងលោក ពូទីន យល់ព្រមតាមការអញ្ជើញឱ្យចូលរួមកិច្ចប្រជុំ G-២០
ប្រធានាធិបតីឥណ្ឌូនេស៊ី លោក ចូកូ វីដូដូ Joko Widodo និយាយថា ទាំងប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី និងប្រធានាធិបតីរុស្ស៊ី លោក វ្ល៉ាឌីមៀ ពូទីន បានយល់ព្រមចូលរួមកិច្ចប្រជុំកំពូលនៃក្រុមប្រទេស G-២០ដែលនឹងប្រព្រឹត្តទៅនៅខែវិច្ឆិកា តាមការអញ្ជើញរបស់ឥណ្ឌូនេស៊ីដែលជាម្ចាស់ផ្ទះ។
លោក វីដូដូ និយាយកាលពីថ្ងៃសុក្រតាមកញ្ចក់ទូរទស្សន៍ថា លោកបានសន្ទនាទូរស័ព្ទជាមួយមេដឹកនាំនៃប្រទេសទាំង២ ថែមទាំងជំរុញឱ្យអ៊ុយក្រែន និងរុស្ស៊ីឲ្យបញ្ចប់សង្គ្រាមតាមរយៈការចរចា។
លោក វីដូដូ និយាយថា៖ «ខ្ញុំបានបញ្ជាក់ម្តងទៀត ពីសារៈសំខាន់នៃការបញ្ចប់សង្គ្រាមភ្លាមៗ។ ខ្ញុំក៏បានសង្កត់ធ្ងន់ថាកិច្ចខិតខំប្រឹងប្រែងដោយសន្តិវិធីគួរតែបន្ត ហើយឥណ្ឌូនេស៊ីត្រៀមខ្លួនជាស្រេចដើម្បីរួមចំណែកដល់កិច្ចខិតខំប្រឹងប្រែងដោយសន្តិភាពទាំងនេះ»។
លោកនិយាយថា លោកបានអញ្ជើញលោកពូទីន និងលោក ហ្សេឡេនស្គី ទៅចូលរួមកិច្ចប្រជុំកំពូល G-២០ ខណៈដែលសង្រ្គាមនៅអ៊ុយក្រែនជះឥទ្ធិពលយ៉ាងខ្លាំងដល់សេដ្ឋកិច្ចពិភពលោក។ ប្រធានាធិបតីដដែលបន្តថា៖ «យើងយល់ថា G-២០ ដើរតួជាកាតាលីករ(អ្នកបង្កើនល្បឿន)ក្នុងការងើបឡើងវិញនៃសេដ្ឋកិច្ចពិភពលោក»។
ឥណ្ឌូណេស៊ី ដែលធ្វើជាម្ចាស់ផ្ទះកិច្ចប្រជុំ G-២០ នៅឆ្នាំនេះ រងសម្ពាធយ៉ាងខ្លាំងពីបស្ចិមលោក ដែលដឹកនាំដោយសហរដ្ឋអាមេរិក ដើម្បីផ្ដាច់ទំនាក់ទំនងជាមួយរុស្ស៊ីចេញបន្ទាប់ពីការឈ្លានពានអ៊ុយក្រែន ប៉ុន្តែរដ្ឋាភិបាលលោក វីដូដូ ប្រកែកថា ខ្លួនត្រូវតែរក្សា «ភាពមិនលម្អៀង»។
បស្ចិមលោកព្យាយាមដាក់រុស្ស៊ីឱ្យនៅឯកោទាំងផ្នែកការទូត និងសេដ្ឋកិច្ច។ កិច្ចប្រជុំរបស់រដ្ឋមន្ត្រីហិរញ្ញវត្ថុ G-២០ កាលពីខែមេសា នាទីក្រុងវ៉ាស៊ីនតោន បានបង្ហាញពីការបែកបាក់យ៉ាងស៊ីជម្រៅនៅក្នុងក្រុមនៃបណ្តាប្រទេសសេដ្ឋកិច្ចធំៗរបស់ពិភពលោក ដោយសហរដ្ឋអាមេរិក និងសម្ព័ន្ធមិត្តមួយចំនួន ធ្វើពហិការកិច្ចពិភាក្សានានាដើម្បីប្រឆាំងនឹងការចូលរួមរបស់រុស្ស៊ី។
ប៉ុន្តែឥណ្ឌូណេស៊ី ដូចជាប្រទេសដែលមានសេដ្ឋកិច្ចកំពុងរីកចម្រើនធំៗភាគច្រើនផ្សេងទៀតដែរ បានព្យាយាមរក្សាជំហរអព្យាក្រឹតរបស់ខ្លួន។ លោកប្រធានាធិបតី វីដូដូ និយាយកាលពីថ្ងៃសុក្រថា ឥណ្ឌូនេស៊ីនឹងមិនបញ្ជូនអាវុធទៅអ៊ុយក្រែនតាមការស្នើសុំអាវុធរបស់លោកហ្សេឡេនស្គីទេ ប៉ុន្តែនឹងបញ្ជូនជំនួយមនុស្សធម៌ជំនួសវិញ ដោយសារតែរដ្ឋធម្មនុញ្ញ និងគោលនយោបាយការបរទេសប្រទេសនេះ ហាមឃាត់មិនឱ្យផ្តល់ជំនួយសព្វាវុធដល់ប្រទេសដទៃទៀត។
ប្រភព៖ The Hill
