នាយករដ្ឋមន្ត្រីជប៉ុន យល់ព្រមលើកិច្ចព្រមព្រៀងការពារជាតិជាមួយរាជាណាចក្រថៃ
បាងកក៖ មេដឹកនាំជប៉ុន និងថៃ បានប្រកាសកិច្ចព្រមព្រៀងការពារជាតិថ្មីមួយកាលពីថ្ងៃចន្ទ ក៏ដូចជាផែនការធ្វើឱ្យប្រសើរឡើងនូវទំនាក់ទំនងសេដ្ឋកិច្ចទ្វេភាគី ខណៈដែលនាយករដ្ឋមន្ត្រីជប៉ុន ហ្វូមីអូ គីស្សីដា បញ្ចប់ជើងចុងក្រោយនៃដំណើរទស្សនកិច្ច៣ប្រទេសនៅតំបន់អាស៊ីអាគ្នេយ៍។
កិច្ចព្រមព្រៀងនេះ នឹងជួយសម្រួលដល់ការផ្ទេរសម្ភារៈ និងបច្ចេកវិទ្យាការពារជាតិពីជប៉ុនទៅថៃ ដែលមានកងទ័ពដ៏ធំបំផុតក្នុងតំបន់ និងមានប្រវត្តិទំនាក់ទំនងយូរអង្វែងជាមួយយោធាសហរដ្ឋអាមេរិក។ យ៉ាងណាមិញ ព័ត៌មានលម្អិតបន្ថែមនៃកិច្ចព្រមព្រៀងនេះមិនត្រូវបានបង្ហាញឱ្យដឹងជាសាធារណៈនោះទេ។
នាយករដ្ឋមន្ត្រីថៃ លោក ប្រាយុទ្ធ ចាន់អ៊ូចា និយាយក្នុងសេចក្តីថ្លែងការណ៍រួមមួយថា៖ «នេះនឹងជួយកែលម្អវិស័យការពារជាតិ និងគាំទ្រការវិនិយោគពីជប៉ុននៅក្នុងសកម្មភាពនេះ ដែលជាគោលដៅសំខាន់សម្រាប់ប្រទេសថៃ»។
លោក ប្រាយុទ្ធ និយាយថា លោកបានពិភាក្សាអំពីការកែលម្អខ្សែសង្វាក់ផ្គត់ផ្គង់ និងការព្រាងនៃភាពជាដៃគូសេដ្ឋកិច្ចរយៈពេល៥ឆ្នាំជាមួយជប៉ុន ដែលជាអ្នកវិនិយោគធំជាងគេរបស់ថៃ។
អស់រយៈពេលជាច្រើនទសវត្សរ៍មកនេះ អាស៊ីអាគ្នេយ៍គឺជាតំបន់ដ៏សំខាន់មួយសម្រាប់ជប៉ុន លើការវិនិយោគក្នុងវិស័យឧស្សាហកម្ម រាប់ពីហេដ្ឋារចនាសម្ព័ន្ធ វិស្វកម្ម និងតំបន់ឧស្សាហកម្ម រហូតដល់ការផលិតយានយន្ត និងអេឡិចត្រូនិច។តំបន់នេះនៅតែជាសមរភូមិប្រយុទ្ធរវាងសម្ព័ន្ធមិត្តជិតស្និទ្ធរបស់ជប៉ុនគឺសហរដ្ឋអាមេរិក និងគូប្រជែងចិន ដែលជាដៃគូពាណិជ្ជកម្មដ៏ធំបំផុតរបស់អាស៊ីអាគ្នេយ៍។
ក្នុងដំណើរទស្សនកិច្ចទៅថៃ លោក គីស្សីដា ក៏បានលើកឡើងពីការឈ្លានពានរបស់រុស្ស៊ីទៅលើអ៊ុយក្រែន ដោយអរគុណលោក ប្រាយុទ្ធ ក្នុងការដំណោះស្រាយរបស់អង្គការសហប្រជាជាតិកាលពីខែមីនា ដែលថ្កោលទោសការឈ្លានពាននេះ។ លោក គីស្សីដា និយាយថា៖ «ខ្ញុំបានយល់ស្របជាមួយនាយករដ្ឋមន្ត្រី ប្រាយុទ្ធ ថានៅក្នុងតំបន់ណាមួយ ការរំលោភលើអធិបតេយ្យភាព និងបូរណភាពទឹកដី ឬការផ្លាស់ប្តូរជាឯកតោភាគីចំពោះស្ថានភាពបច្ចុប្បន្នដោយកម្លាំង មិនគួរត្រូវបានអត់ឱនឱ្យសោះ»។ យ៉ាងណាមិញ ក្នុងចំណោមប្រទេសអាស៊ីអាគ្នេយ៍ មានតែសិង្ហបុរីប៉ុណ្ណោះ ដែលចូលរួមជាមួយបស្ចិមលោកដាក់ទណ្ឌកម្មរុស្ស៊ី។
ប្រភព៖ Reuters
