សហភាពអឺរ៉ុបអាចនឹងផ្តល់ការលើកលែងចំពោះហុងគ្រី និងស្លូវ៉ាគី ពីការចូលរួមជាមួយប្លុកដាក់ទណ្ឌកម្មប្រេងរុស្ស៊ី
ប្រ៊ុចសែល៖ មន្ត្រីសហភាពអឺរ៉ុប២រូបនិយាយកាលពីថ្ងៃចន្ទថា គណៈកម្មការអឺរ៉ុបអាចនឹងផ្ដល់ការលើកលែងចំពោះហុងគ្រី និងស្លូវ៉ាគី ពីការចូលរួមជាមួយប្លុកក្នុងការដាក់ទណ្ឌកម្មបិទការនាំចូលប្រេងពីរុស្ស៊ី ដោយគិតពីការពឹងផ្អែករបស់ប្រទេសទាំង២លើប្រេងឆៅរុស្ស៊ី។ នេះបើតាមការចុះផ្សាយរបស់ទីភ្នាក់សារព័ត៌មានរ៉យទ័រ ដែលស្រង់សម្ដីប្រភពជាអនាមិក។
គណៈកម្មការប្លុកត្រូវបានគេរំពឹងថានឹងបញ្ចប់ការងារនៅថ្ងៃអង្គារ លើកញ្ចប់ទី៦នៃទណ្ឌកម្មរបស់សហភាព អឺរ៉ុបប្រឆាំងនឹងរុស្ស៊ីជុំវិញសកម្មភាពនៅអ៊ុយក្រែន ដែលនឹងរួមបញ្ចូលការហាមឃាត់ការទិញប្រេងពីរុស្ស៊ី ដែលជាប្រភពចំណូលដ៏សំខាន់របស់ទីក្រុងម៉ូស្គូ។ កញ្ចប់នេះនឹងត្រូវបង្ហាញដល់ឯកអគ្គរដ្ឋទូតនៃរដ្ឋាភិបាលសហភាពអឺរ៉ុបនៅថ្ងៃពុធ។
ហុងគ្រី ដែលពឹងផ្អែកខ្លាំងលើប្រេងរបស់រុស្ស៊ី និយាយម្តងហើយម្តងទៀតថា ខ្លួននឹងមិនចុះហត្ថលេខាលើទណ្ឌកម្មពាក់ព័ន្ធនឹងថាមពលនោះទេ។ ចំណែកឯស្លូវ៉ាគីវិញ ក៏ស្ថិតក្នុងចំណោមប្រទេសសហភាពអឺរ៉ុបដែលពឹងផ្អែកខ្លាំងបំផុតលើឥន្ធនៈហ្វូស៊ីលរបស់រុស្ស៊ី។
មន្ត្រីម្នាក់និយាយថា ដើម្បីរក្សាប្លុក២៧ប្រទេសឱ្យរួបរួមគ្នា គណៈកម្មការអាចនឹងផ្តល់ឲ្យស្លូវ៉ាគី និងហុងគ្រី «ការលើកលែង ឬរយៈពេលអន្តរកាល(ផ្លាស់ប្ដូរ)ដ៏វែង»។ មន្ត្រីទាំង២និយាយថា ការដាក់ទណ្ឌកម្មប្រេងទំនងជាដាក់ចេញជាដំណាក់កាលៗ ដែលភាគច្រើនទំនងជានឹងមានប្រសិទ្ធិភាពពេញលេញចាប់ពីដើមឆ្នាំក្រោយទៅ។
អឺរ៉ុបគឺជាគោលដៅសម្រាប់ការនាំចេញប្រេងឆៅ និងផលិតផលប្រេងរបស់រុស្ស៊ីជិតពាក់កណ្តាល ដែលផ្តល់ឱ្យទីក្រុងម៉ូស្គូនូវប្រភពចំណូលដ៏ច្រើន ដែលប្រទេសនានាមួយចំនួនរបស់ប្លុកនិយាយថា ត្រូវតែកាត់បន្ថយ ដើម្បីបញ្ឈប់ការផ្តល់មូលនិធិដល់សកម្មភាពយោធារបស់ខ្លួននៅអ៊ុយក្រែន។ យោងតាមអង្គការស្រាវជ្រាវមជ្ឈមណ្ឌលស្រាវជ្រាវថាមពលនិងខ្យល់ស្អាត គិតតែពីថ្ងៃប្រតិបត្តិការយោធាឈ្លានពានចាប់ផ្ដើម មកទល់ពេលនេះ បណ្តាប្រទេសសហភាពអឺរ៉ុបបានទូទាត់ប្រាក់ឱ្យរុស្ស៊ីជិត ២០ ប៊ីលានអឺរ៉ូរួចទៅហើយ។
សរុបមក សហភាពអឺរ៉ុបពឹងផ្អែកលើរុស្ស៊ី ២៦ ភាគរយនៃការនាំចូលប្រេងរបស់ខ្លួន។ យោងតាមទីភ្នាក់ងារថាមពលអន្តរជាតិ ស្លូវ៉ាគី នាំចូលប្រេងឆៅ និងផលិតផលប្រេង ៩៦ ភាគរយ ខណៈហុងគ្រី នាំចូល ៥៨ ភាគរយនៃផលិតផលដូចគ្នាពីរុស្ស៊ីកាលពីឆ្នាំមុន។
យ៉ាងណាមិញ អ៊ុយក្រែនហាក់បង្ហាញសញ្ញានៃការយល់ដឹងអំពីជំហរពេលនេះរបស់ស្លូវ៉ាគី ដោយរដ្ឋមន្ត្រីការបរទេសអ៊ុយក្រែន បានបង្ហោះសារថ្លែងអំណរគុណរួមទាំងចំពោះការស្វាគមន៍ជនភៀសខ្លួនអ៊ុយក្រែន ជំនួយមនុស្សធម៌ ការផ្គត់ផ្គង់សព្វាវុធ ការគាំទ្រឱ្យអ៊ុយក្រែនក្លាយជាបេក្ខជនចូលសហភាពអឺរ៉ុប និងអនុញ្ញាតឱ្យអ៊ុយក្រែនមានការនាំចេញដោយគ្មានពន្ធទៅកាន់ប្លុកជាដើម។
ព័ត៌មានស្ដីពីការលើកលែងចំពោះសមាជិកប្លុកទាំងហុងគ្រី និងស្លូវ៉ាគី ធ្វើឡើងបន្ទាប់ពីអាល្លឺម៉ង់ ដែលជាអ្នកទិញប្រេងកំពូលរបស់រុស្ស៊ីនៅក្នុងសហភាពអឺរ៉ុប និយាយនាពេលថ្មីៗថា ខ្លួនអាចគ្រប់គ្រងការដាក់ទណ្ឌកម្ម ដោយដំបូងឡើយត្រូវទប់ទល់នឹងផលប៉ះពាល់សេដ្ឋកិច្ចសិន។
ប្រភព៖ Reuters
