ឧត្តមសេនីទោ ជាម សុភា អគ្គលេខាធិការ សហព័ន្ធកីឡាវាយសីកម្ពុជា បានថ្លែងលើកឡើងថា ការប្រកួតកីឡាវាយសីថ្នាក់ជាតិសិស្សកម្រិតបឋមសិក្សាដែលបង្កើតឡើងជាលើកដំបូងក្នុងឆ្នាំ២០២២ ដោយក្រសួងអប់រំយុវជន និងកីឡា សហការផ្តល់បច្ចេកទេស ដោយសហព័ន្ធកីឡាវាយសីកម្ពុជា គឺជាការរួមចំណែកមួយយ៉ាងសំខាន់ក្នុងការបំផុសកីឡាវាយសីនៅក្នុងសាលារៀន និងបណ្តុះឆន្ទៈឲ្យក្មេងៗស្រលាញ់កីឡាវាយសី ហើយ ចាប់យកកីឡាវាយសីជាកីឡាជំនាញក្នុងការអភិវឌ្ឍសមត្ថភាពក្លាយជាកីឡាករការិនីសក្តានុពលសម្រាប់ប្រទេសជាតិ នាពេលអនាគត។

អគ្គលេខាធិការរូបនេះ បានគូបញ្ជាក់ទៀតថា កន្លងមកសហព័ន្ធកីឡាវាយសីកម្ពុជា ពុំធ្លាប់រៀបចំការប្រកួតសម្រាប់ក្មេងៗនោះទេ ពោលគឺយើងចាប់ផ្តើមរៀបចំប្រកួតតែសម្រាប់កីឡាករកីឡាការិនីធំៗ ហើយ សហព័ន្ធក៏ជ្រើសរើសបានតែកីឡាករ កីឡាការិនីធំៗមកបណ្តុះបណ្តាលសម្រាប់ចូលរួមប្រជែងលើឆាកអន្តរជាតិប៉ុណ្ណោះ។ដូចច្នោះការបង្កើតរបស់ក្រសួងអប់យុវជន និងកីឡាចាប់ពីឆ្នាំ២០២២ឲ្យមានការប្រកួតថ្នាក់ជាតិកីឡាវាយសីសម្រាប់សិស្សកម្រិតបឋមនេះ វានឹងអាចផលិតបានធនធានកីឡាករកីឡាការិនីឆ្នើមៗកាន់តែច្រើនសម្រាប់កម្ពុជា នាពេលអនាគត។

អគ្គលេខាធិការខាងលើ បន្តទៀតថា ការប្រកួតកីឡាវាយសីថ្នាក់ជាតិសិស្សកម្រិតបឋមសិក្សានេះ សហព័ន្ធមិនរៀបចំជាលក្ខណៈស្តង់ដា ដោយគោរពតាមច្បាប់អន្តរជាតិទាំងស្រុងនោះទេ ពោលហព័ន្ធរៀបចំជាលក្ខណៈបច្ចេកទេសងាយៗ ដើម្បីជាការជម្រុញលើកទឹកចិត្តឲ្យពួកគេចង់លេងនិងបន្តចាប់យកការហ្វឹកហាត់កីឡាវាយសីជាកីឡាជំនាញសម្រាប់ពួក។

សូមបញ្ជាក់ថា ការប្រកួតកីឡាវាយសីថ្នាក់ជាតិសិស្សកម្រិតបឋមសិក្សាដំណើរការប្រកួតរយៈពេល៣ថ្ងៃបញ្ចប់នៅថ្ងៃទី៦ ខែ ឧសភា មានមន្ទីរចំនួន៦រាជធានីខេត្តក្រុងចូលរួម សរុប ប្រតិភូគ្រូបង្វឹក និង កីឡាករកីឡាការិនីចូលរួមសរុបចំនួន៦៨នាក់ ដោយធ្វើការប្រកួតលើ៥វិញ្ញាសា មានដូចជា វិញ្ញាសាវាយទោលកុមារា វាយទោលកុមារី វាយគូកុមារា កុមារី និងវាយគូចំរុះកុមារា និងកុមារី៕អត្ថបទ៖ ជាវ ចន្ធូ