អាល្លឺម៉ង់ពិចារណាលើការបញ្ជូនប្រព័ន្ធអាវុធបាញ់រហ័សទៅកាន់អ៊ុយក្រែន
អធិការបតីអាល្លឺម៉ង់លោក អូឡាហ្វ សុល (Olaf Scholz) កំពុងពិចារណាលើការបញ្ជូនប្រព័ន្ធកាំភ្លើងធំបាញ់រហ័សចំនួន៧គ្រឿងទៅកាន់ក្រុងកៀវ ក្នុងជំហានមួយទៀតដើម្បីពង្រឹងកិច្ចខិតខំប្រឹងប្រែងរបស់កងកម្លាំងអ៊ុយក្រែនប្រឆាំងនឹងការឈ្លានពានរបស់រុស្ស៊ី។
វាជាការពិចារណាលើអនុសាសន៍របស់រដ្ឋមន្ត្រីក្រសួងការពារជាតិអាល្លឺម៉ង់អ្នកស្រី Christine Lambrecht លើការប្រគល់ប្រព័ន្ធកាំភ្លើងធំ PzH 2000 ប៉ុន្តែក៏មានសំណើផ្សេងទៀតជាច្រើននៅលើតុ ហើយលោក សុល មិនទាន់ទទួលបានការយល់ព្រមចុងក្រោយនៅឡើយ។ នេះបើតាមចុះផ្សាយរបស់សារព័ត៌មាន Bloomberg ដែលស្រង់សម្ដីប្រភពជាអនាមិកកាលពីថ្ងៃអង្គារ។
លោក Jacob Kirkegaard សមាជិកជាន់ខ្ពស់នៃមូលនិធិ Marshall អាល្លឺម៉ង់ ដែលមានមូលដ្ឋាននៅទីក្រុងប្រ៊ុចសែល និយាយថា៖ «ប្រសិនបើមានការយល់ព្រម នេះនឹងក្លាយជាវិធានការដ៏រឹងមាំមួយរបស់លោកអធិការបតី អូឡាហ្វ សុល ព្រោះវានឹងធ្វើឱ្យអាល្លឺម៉ង់មានប្រៀបជាមួយនឹងអ្នកផ្គត់ផ្គង់សព្វាវុធអឺរ៉ុបដ៏ធំបំផុតសម្រាប់អ៊ុយក្រែន»។
ការពិចារណារបស់លោកអធិការបតី ធ្វើឡើងបន្ទាប់ពីរដ្ឋាភិបាលអាល្លឺម៉ង់ អនុញ្ញាតឱ្យផ្ទេររថក្រោះប្រឆាំងយន្តហោះ Gepard ចំនួន ៥០ ក្រោយប្រកែកមិនបញ្ជូលអាវុធធុនធ្ងន់ទៅអ៊ុយក្រែន ហើយផ្តល់សញ្ញាថា សព្វាវុធកាន់តែច្រើននឹងបញ្ជូនទៅកាន់ទីក្រុងកៀវ។
ពីមុនមក លោក សុល ប្រឈមមុខនឹងសម្ពាធយ៉ាងខ្លាំងចំពោះការស្ទាក់ស្ទើររបស់លោកក្នុងការផ្គត់ផ្គង់ប្រព័ន្ធសព្វាវុធទំនើបៗដើម្បីទប់ទល់នឹងការឈ្លានពានរបស់រុស្ស៊ី។ តែប៉ុន្មានថ្ងៃចុងក្រោយនេះ លោកនិយាយថា អាល្លឺមង់ត្រៀមខ្លួនជាស្រេចក្នុងការបន្តបញ្ជូនអាវុធទៅអ៊ុយក្រែន ដោយច្រានចោលនឹងអ្នករិះគន់ក្នុងស្រុកមួយចំនួន។
សមត្ថភាពយោធារបស់អាល្លឺម៉ង់ ត្រូវបានរារាំងដោយការផ្តល់មូលនិធិមានកំណត់ជាច្រើនឆ្នាំ ហើយមេដឹកនាំយោធាព្រមានថា ការបញ្ជូនយន្តហោះចម្បាំងអាចធ្វើឱ្យវិស័យការពារប្រទេសចុះខ្សោយ។ យោធាអាល្លឺម៉ង់ មានអាវុធ PzH 2000 ចំនួន ១៩៩ គ្រឿង ប៉ុន្តែមានតែ ៤០ ប៉ុណ្ណេះដែលកំពុងដំណើរការនាពេលបច្ចុប្បន្ន។ យ៉ាងណាមិញ លោក Kirkegaard និយាយថា ក្តីបារម្ភរបស់មេដឹកនាំយោធាអាល្លឺម៉ង់ ដែលថាការចែកចាយសព្វាវុធអាចធ្វើឲ្យសមត្ថភាពការពាររបស់ប្រទេសខ្លួនចុះខ្សោយ គឺជារឿង «មិនសមហេតុផល» ដោយសារកាំភ្លើងធំនឹងត្រូវប្រើដើម្បីការពារមិនត្រឹមតែអ៊ុយក្រែនប៉ុណ្ណោះទេ ប៉ុន្តែថែមទាំងអឺរ៉ុបទាំងមូលផងដែរ។
ប្រភព៖ Yahoo
