ស៊ុយអែតនិយាយថាខ្លួនទទួលបានការធានាសន្តិសុខពីអាមេរិក ប្រសិនបើដាក់ពាក្យចូលជាសមាជិកណាតូ
កាលពីថ្ងៃពុធ ទី៤ ឧសភារដ្ឋមន្ត្រីការបរទេសស៊ុយអែតលោកស្រីអាន់ លីនដេបាននិយាយក្នុងទស្សនកិច្ចទៅកាន់ក្រុងវ៉ាស៊ីនតោនថា ប្រទេសលោកស្រីបានទទួលការធានាសន្តិសុខពីសហរដ្ឋអាមេរិក ក្នុងអំឡុងពេលដែលសមាជិកទាំង៣០ប្រទេសនៃអង្គការណាតូធ្វើការពិចារណាសមាជិកភាព ប្រសិនបើស៊ុយអែតដាក់ពាក្យស្នើសុំចូលជាសមាជិក។
ប្រទេសស៊ុយអែត និងប្រទេសជិតខាងហ្វាំងឡង់ បានជៀសវាងមិនចូលជាសមាជិកអង្គការណាតូនៅក្នុងសម័យសង្គ្រាមត្រជាក់។ ប៉ុន្តែឥឡូវនេះការឈ្លានពានរបស់រុស្ស៊ីទៅលើប្រទេសអ៊ុយក្រែនបានធ្វើឱ្យប្រទេសទាំងពិចារណាឡើងវិញនូវជំហរគោលនយោបាយសន្តិសុខរបស់ពួកគេ ដែលធ្វើការចូលជាសមាជិកអង្គការណាតូកាន់តែទំនងនឹងកើតឡើង។
បើទោះជាយ៉ាងនេះក៏ដោយ ប្រទេសទាំងពីរមានការព្រួយបារម្ភថាពួកគេអាចងាយរងគ្រោះក្នុងអំឡុងពេលដែលអង្គការណាតូធ្វើការពិចារណាពាក្យស្នើសុំរបស់ពួកគេ ដែលអាចអូសបន្លាយរហូតដល់មួយឆ្នាំសម្រាប់សមាជិកណាតូទាំងអស់ធ្វើការអនុម័ត។
បន្ទាប់ពីជំនួបជាមួយរដ្ឋមន្ត្រីការបរទេសអាមេរិកលោកអាន់តូនី ប្លីនខែន លោកស្រីលីនដេ បាននិយាយថា៖ «ជាធម្មតា ខ្ញុំមិននិយាយលម្អិតទេ ប៉ុន្តែខ្ញុំមានអារម្មណ៍ប្រាកដណាស់ថា ឥឡូវនេះយើងមានការធានាពីអាមេរិក»។
លោកស្រីបន្ថែមទៀតថា៖ «ប៉ុន្តែ មិនមែនជាការធានាសន្តិសុខរឹងមាំដូចអ្វីដែលអាចទទួលបានលុះត្រាតែជាសមាជិកពេញសិទ្ធណាតូ»។
កាលពីខែមុនរដ្ឋមន្ត្រីក្រសួងការពារជាតិស៊ុយអែត បាននិយាយថាការដាក់ពាក្យស្នើសុំសមាជិកភាពណាតូ អាចនឹងបង្កឱ្យមានវិធានការឆ្លើយតបមួយចំនួនពីរុស្ស៊ី ដូចជាការវាយប្រហារតាមអ៊ីនធឺណិត និង «វិធានការកូនកាត់» ពោលគឺការផ្សព្វផ្សាយព័ត៌មានមិនពិត ដើម្បីធ្វើឱ្យខូចខាតដល់សន្តិសុខជាតិរបស់ស៊ុយអែត។
ក្រុងម៉ូស្គូ ក៏ធ្លាប់បានព្រមានថាពួកគេនឹងដាក់ពង្រាយអាវុធនុយក្លេអ៊ែរនៅតំបន់សមុទ្របាល់ទិច ប្រសិនបើស៊ុយអែត និងហ្វាំងឡង់ចូលជាសមាជិកនៃអង្គការណាតូ។
ទាំងស៊ុយអែត និងហ្វាំងឡង់ត្រូវបានគេរំពឹងថានឹងធ្វើការសម្រេចចិត្តឆាប់នេះអំពីការចូលជាសមាជិកអង្គការណាតូ៕
ប្រភព៖ Reuters
