សហភាពអឺរ៉ុបនឹងបង្កើនជំនួយយោធា «យ៉ាងខ្លាំង» ទៅឱ្យប្រទេសម៉ុលដាវី
ប្រធានក្រុមប្រឹក្សាអឺរ៉ុបលោកហ្សាល មីសែលបានប្ដេជ្ញាបង្កើនជំនួយយោធារបស់សហភាពអឺរ៉ុបទៅឱ្យប្រទេសម៉ុលដាវី ដែលជាប្រទេសជាប់ព្រំដែនជាមួយប្រទេសអ៊ុយក្រែន ហើយកំពុងមានការកើនឡើងភាពតានតឹងក្រោយពីមានការផ្ទុះជាបន្តបន្ទាប់នៅក្នុងតំបន់ផ្ដាច់ខ្លួនគាំទ្រដោយរុស្ស៊ី។
ក្នុងសន្និសីទសារព័ត៌មានជាមួយប្រធានាធិបតីម៉ុលដាវីលោកស្រីម៉ាយ៉ា សាន់ឌូ លោកមីសែលបាននិយាយថា៖ «នៅឆ្នាំនេះ យើងមានគម្រោងបង្កើនការគាំទ្ររបស់យើងយ៉ាងខ្លាំងចំពោះប្រទេសម៉ុលដាវី តាមរយៈការផ្ដល់ឧបករណ៍យោធាបន្ថែមទៅឱ្យកងកម្លាំងប្រដាប់អាវុធរបស់ប្រទេសនេះ»។
លោកមីសែលនិយាយថាសហភាពអឺរ៉ុបនឹងបង្កើនការគាំទ្ររបស់ខ្លូនលើ «វិស័យភស្តុភារនៃការការពារអ៊ីធឺណិត» ហើយនឹងស្វែងរកផ្ដល់នូវ «សមត្ថភាពកសាងយោធាបន្ថែមទៀត» ដល់ម៉ុលដាវី ប៉ុន្តែលោកមិនបានផ្ដល់ព័ត៌មានលម្អិតបន្ថែមទៀតទេ។
រីឯលោកស្រីសាន់ឌូវិញ បានបញ្ជាក់ជាថ្មីអំពីគោលបំណងរបស់ម៉ុលដាវីក្នុងការចូលជាសមាជិកសហភាពអឺរ៉ុប បន្ទាប់ពីដាក់ពាក្យកាលពីថ្ងៃទី ៣ មិនា ប្រមាណជាងមួយសប្ដាហ៍បន្ទាប់ពីរុស្ស៊ីចាប់ផ្ដើមការឈ្លានពានចូលប្រទេសអ៊ុយក្រែន។
លោកមីសែល និយាយថាលោកគាំទ្រជម្រើសរបស់ម៉ុលដាវីក្នុងការដាក់ពាក្យសុំចូលជាសមាជិកសហភាពអឺរ៉ុប។ លោកបានកត់សម្គាល់ថាករណីរបស់ម៉ុលដាវីគឺ «ស្មុគស្មាញ» តែលោកមានគោលបំណងធ្វើសកម្មភាពភ្លាមៗលើសំណើរបស់ប្រទេសនេះ។
យ៉ាងណាមិញ ក្រុមផ្ដាច់ខ្លួនតំបន់ត្រង់នីស្ត្រៀនៅភាគខាងកើតប្រទេសម៉ុលដាវី បានរាយការណ៍ថាមានការផ្ទុះគ្រាប់បែកនៅទីស្ដីការក្រសួងមហាផ្ទៃរបស់ខ្លួន មូលដ្ឋានយោធាមួយ និងអង់តែនវិទ្យុភាសារុស្ស៊ីមួយ។ គេមិនដឹងប្រភពនៃការផ្ទុះគ្រាប់បែកនេះ ប៉ុន្តែក្រុងម៉ូស្គូបាននិយាយថាវាគឺជា «អំពើភេរវកម្ម»។
មន្ត្រីម៉ុលដាវី និងអ៊ុយក្រែនជាច្រើនបានបង្ហាញការព្រួយបារម្ភថាការផ្ទុះគ្រាប់បែកទាំងនេះគឺត្រូវបានរៀបចំឡើងដើម្បីបង្កើតលេសឱ្យកងកម្លាំងផ្ដាច់ខ្លួន និងកងកម្លាំងរុស្ស៊ី នៅក្នុងតំបន់ត្រង់នីស្ត្រៀ ធ្វើការឆ្លងព្រំដែនចូលអ៊ុយក្រែន ដើម្បីចូលរួមក្នុងការឈ្លានពានរបស់រុស្ស៊ី៕
ប្រភព៖ Aljazeera