ភ្នំពេញ ៖ កម្លាំងជំនាញផ្នែកព្រហ្មទណ្ឌ នៃអធិការដ្ឋាននគរបាលខណ្ឌបឹងកេងកង បានធ្វើការស្រាវជ្រាវឃាត់ខ្លួនជនសង្ស័យ ម្នាក់ កាលពីវេលាម៉ោង១៥:៣០នាទី ថ្ងៃទី០៧ ខែឧសភា ឆ្នាំ២០២២ ពាក់ព័ន្ធករណីឆ្កឹះលួចកញ្ចក់រថយន្ដ នៅចំណុចម្ដុំបេនឡានវីរៈប៊ុនថាំ ផ្លូវលេខ៤៧ សង្កាត់វត្ដភ្នំ ខណ្ឌដូនពេញ រាជធានីភ្នំពេញ ។

ប្រព្រឹត្ដកាលពីនៅថ្ងៃទី០៤ ខែឧសភា ឆ្នាំ២០២២ នៅចំណុចមុខហាងលក់ស្រាS.Ligor ទីតាំងលេខ២៤៨ ផ្លូវលេខ៦៣ ភូមិ៩ សង្កាត់បឹងកេងកងទី១ ខណ្ឌបឹងកេងកង ។ ជនសង្ស័យឈ្មោះ ចាន់ ទូច ហៅតូច ភេទប្រុស អាយុ២៨ឆ្នាំ ជនជាតិខ្មែរ ស្នាក់នៅផ្ទះជួលលេខ០៨ ផ្លូវបេតុង សង្កាត់គីឡូម៉ែត្រលេខ៦ ខណ្ឌឬស្សីកែវ មុខរបរមិនពិតប្រាកដ ។

ចំណែកវត្ថុតាងដកហូតរួមមាន ម៉ូតូម៉ាកហុងដាឌ្រីម សេ១២៥ ពណ៍ខ្មៅ ពាក់ផ្លាកលេខ ភ្នំពេញ 1JK 5289, ម៉ទ័រឆាបចំនួន០១គ្រឿង, ទូល័រវីស ដងពណ៌ខ្មៅ ចំនួន០២, កូនកំបិត ចំនួន០១, ដបសម្រាប់ជក់ថ្នាំ ចំនួន០១, មួកសុវត្ថិភាព ចំនួន០២ និងកូនសោរមួយចំនួនទៀត។

បច្ចុប្បន្ន ជនសង្ស័យ ខាងលើ កំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌបឹងកេងកង ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវីធី ៕ ដោយ ៖ ជីម ភារ៉ា