គ្រោះថ្នាក់ចរាចរណ៍មួយក្នុងស្រុកឆែប ខេត្តព្រះវិហារ នៅថ្ងៃទី១៧ឧសភានេះ បានសម្លាប់ ឳពុកម្តាយតារាចម្រៀងកញ្ញា សុវត្ថិឌី ធារិកា។ យោងតាមស្នងការនគរបាលខេត្តព្រះវិហារ លោកឧត្តមសេនីយ៍ទោ សួស សុខដារ៉ា មនុស្សចំនួន៥នាក់ក្នុងរថយន្តមួយគ្រឿង បានក្រឡាប់ចូលក្នុងប្រឡាយទឹក ខណៈកំពុងធ្វើដំណើរមករាជធានីភ្នំពេញបន្ទាប់ពីបាន ចូលរួមកម្មវិធីសម្ពោធមួយនៅក្នុង ស្រុកឆែប ខេត្តព្រះវិហារនោះ។

តារាចម្រៀងកញ្ញា សុវត្ថិឌី ធារិកា បានស្ថិតក្នុងហេតុការណ៍ក្រឡាប់ឡាននោះផងដែរ ប៉ុន្តែនាងត្រូវបានគេជួយសង្គ្រោះ ជាមួយនឹងប្អូនប្រុសនិងជីដូនម្នាក់ទៀត។ ចំណែកមនុស្ស២នាក់ទៀតក្នុងរថយន្តគឺម្តាយ និង ឳពុករបស់នាង បានបាត់បង់ជីវិតក្នុងពេលនោះ ដោយសារតែឈ្លក់ទឹក។

មិនមានសេចក្តីរាយការណ៍ជុំវិញមូលហេតុដែលនាំឱ្យមានរថយន្តក្រឡាប់នោះទេ ប៉ុន្តែមន្ត្រីនគរបាលនៅទីនោះ បានថ្លែងថារថយន្តបានរងគ្រោះថ្នាក់ដោយខ្លួនឯងក្រឡាប់ចូលក្នុងប្រឡាយទឹក។