យូអិន៖ អង្គការសហប្រជាជាតិ (UN) បានព្រមាន អំពីផលប៉ះពាល់សិទ្ធិមនុស្សធ្ងន់ធ្ងរ ចំពោះវិធានការឆ្លើយតបរបស់កូរ៉េខាងជើង ដើម្បីទប់ស្កាត់ការផ្ទុះឡើងនៃជំងឺកូវីដ១៩។

អ្នកនាំពាក្យការិយាល័យសិទ្ធិមនុស្សរបស់អង្គការសហប្រជាជាតិ លោកស្រី Liz Throssell បានប្រាប់អ្នកយកព័ត៌មានថា «ការរឹតត្បិតនាពេលថ្មីៗនេះ ដែលរួមមានការដាក់មនុស្សឱ្យនៅដាច់ដោយឡែក និងការដាក់កម្រិតបន្ថែមទៀតលើការធ្វើដំណើរ នឹងមានផលវិបាកយ៉ាងធ្ងន់ធ្ងរសម្រាប់អ្នកដែលកំពុងតស៊ូដើម្បីបំពេញតម្រូវការមូលដ្ឋានរបស់ពួកគេ»។

មេដឹកនាំ គីម ជុងអ៊ុន បានបញ្ជាឱ្យបិទប្រទេសទាំងមូល ដើម្បីព្យាយាមពន្យឺតការរីករាលដាល នៃជំងឺកូវីដ១៩ ក្នុងចំណោមប្រជាជនដែលមិនបានទទួលវ៉ាក់សាំង ដោយបានដាក់ពង្រាយយោធា បន្ទាប់ពីអ្វីដែលលោកបានពិពណ៌នាថា ជាការឆ្លើយតបចំពោះការផ្ទុះឡើងដ៏អាក្រក់៕ ប្រែសម្រួល៖ សារ៉ាត