សហរដ្ឋអាមេរិក និងជប៉ុនថ្លឹងថ្លែងការសន្យារួមគ្នារារាំងចិនក្នុងកិច្ចប្រជុំកំពូលក្រុងតូក្យូ
រដ្ឋាភិបាលជប៉ុន និងសហរដ្ឋអាមេរិក ចាប់ផ្តើមសម្របសម្រួលលើពាក្យនៃសេចក្តីថ្លែងការណ៍រួម ដែលត្រូវចេញផ្សាយក្នុងអំឡុងពេលកិច្ចប្រជុំកំពូលរបស់ពួកគេនៅថ្ងៃចន្ទនាទីក្រុងតូក្យូ ដែលនឹងបញ្ជាក់យ៉ាងច្បាស់អំពីគោលនយោបាយនៃកិច្ចសហប្រតិបត្តិការដើម្បី «រារាំង និងឆ្លើយតប» សកម្មភាពរបស់ចិននៅក្នុងតំបន់ឥណ្ឌូប៉ាស៊ីហ្វិក។ នេះបើតាមការចុះផ្សាយរបស់កាសែត Nikkei ។
សេចក្តីថ្លែងការណ៍នេះ ក៏នឹងគូសបញ្ជាក់អំពីគោលនយោបាយរក្សាប្រទេសជប៉ុននៅក្រោមឆ័ត្រនុយក្លេអ៊ែររបស់សហរដ្ឋអាមេរិក និងការចែករំលែកយុទ្ធសាស្ត្រសន្តិសុខរវាងប្រទេសទាំង២។ ដៃគូនឹងបញ្ជាក់ពីការចាប់ផ្តើមនៃក្របខ័ណ្ឌសេដ្ឋកិច្ចឥណ្ឌូប៉ាស៊ីហ្វិក (IPEF) ដែលដឹកនាំដោយសហរដ្ឋអាមេរិក និងបញ្ជាក់ពីការចូលរួមរបស់ទីក្រុងវ៉ាស៊ីនតោននៅអាស៊ី។
កិច្ចប្រជុំថ្ងៃចន្ទ នឹងក្លាយជាជំនួបទល់មុខគ្នាលើកដំបូងរវាងនាយករដ្ឋមន្ត្រីជប៉ុនលោក Fumio Kishida និងប្រធានាធិបតីអាមេរិកលោក ចូ បៃដិន។ ការរំពឹងទុករបស់មេដឹកនាំទាំង២ចំពោះការរារាំងឥរិយាបទអនុត្តរភាពរបស់ចិន ឆ្លុះបញ្ចាំងពីការព្រួយបារម្ភរបស់ពួកគេដែលថា ការឈ្លានពានរបស់រុស្ស៊ីលើអ៊ុយក្រែនមានផលប៉ះពាល់ដល់អាស៊ី។
សហរដ្ឋអាមេរិកកំពុងពង្រឹងការប្តេជ្ញាចិត្តផ្នែកយោធារបស់ខ្លួនចំពោះអឺរ៉ុប ដើម្បីដោះស្រាយជាមួយរុស្ស៊ី ហើយសម្រាប់ពេលនេះ សហរដ្ឋអាមេរិកនឹងត្រូវបង្ខំឱ្យធ្វើយុទ្ធសាស្ត្រមុខ៣ គឺនៅអឺរ៉ុប មជ្ឈិមបូព៌ា និងអាស៊ីបូព៌ា។ ទោះបីជាមានបញ្ហាប្រឈមក្ដី សហរដ្ឋអាមេរិកនឹងសង្កត់ធ្ងន់ម្តងទៀតទាំងក្នុងស្រុក និងអន្តរជាតិថា អាទិភាពកំពូលរបស់ខ្លួនគឺចិន ដែលជាដៃគូប្រកួតប្រជែងយុទ្ធសាស្ត្រតែមួយគត់របស់ខ្លួន។
សេចក្តីថ្លែងការណ៍រួមពីមុនដែលចេញផ្សាយកាលពីឆ្នាំមុន និងចេញដោយលោកអតីតនាយករដ្ឋមន្ត្រី Yoshihide Suga និងលោក បៃដិន និយាយអំពីសារៈសំខាន់នៃសន្តិភាព និងស្ថិរភាពនៅក្នុង «ច្រកសមុទ្រតៃវ៉ាន់» ជាលើកដំបូងក្នុងរយៈពេលជិតកន្លះសតវត្សរ៍។ វាក៏រួមបញ្ចូលឃ្លា «សារៈសំខាន់នៃការរារាំង» នៅក្នុងតំបន់ផងដែរ។
ក្នុងសេចក្តីថ្លែងការណ៍រួមលើកនេះ ភាគីទាំង២នឹងពង្រឹងពាក្យសម្តី ដើម្បីរួមបញ្ចូលសេចក្តីថ្លែងការណ៍ថា នឹង«រារាំង» សកម្មភាពរបស់ចិន ដែលបំផ្លាញស្ថិរភាពក្នុងតំបន់ ហើយប្រសិនបើចាំបាច់ នឹងសហការដើម្បី «ឆ្លើយតប»។
លើសពីនេះ ជប៉ុន និងសហរដ្ឋអាមេរិកនឹងរក្សាទណ្ឌកម្មសេដ្ឋកិច្ចប្រឆាំងនឹងរុស្ស៊ី ដែលបន្តការឈ្លានពានរបស់ខ្លួនប្រឆាំងនឹងអ៊ុយក្រែន ហើយនឹងថ្កោលទោសការគំរាមកំហែងប្រើប្រាស់អាវុធនុយក្លេអ៊ែរ ទាំងបន្ថែមទៅលើការឆ្ពោះទៅរកការរំសាយនុយក្លេអ៊ែរកូរ៉េខាងជើង។
ចំណុចសំខាន់ដែលត្រូវបញ្ជូលទៅក្នុងសេចក្ដីថ្លែងការណ៍រួម ក៏មាននូវការបញ្ជាក់ជំហររបស់អាមេរិកក្នុងការការពារជប៉ុនក្រោមឆ័ត្រនុយក្លេអ៊ែរ ដោយថាប្រសិនបើជប៉ុនរងការគំរាមកំហែងដោយអាវុធនុយក្លេអ៊ែរ អាមេរិកមានឆន្ទៈការពារប្រទេសនេះមិនត្រឹមតែដោយកងកម្លាំងធម្មតាប៉ុណ្ណោះទេ ប៉ុន្តែថែមទាំងមានអាវុធនុយក្លេអ៊ែរផងដែរបើចាំបាច់។
ប្រភព៖ Nikkei Asia
