តូក្យូ៖ ប្រធានាធិបតីអាមេរិកលោក ចូ បៃដិន បានប្រកាសនៅ ថ្ងៃចន្ទ ក្នុងទីក្រុងតូក្យូថា ប្រទេសចំនួន ១៣ បានចូលរួមក្នុងគំនិតផ្តួចផ្តើម ពាណិជ្ជកម្មអាស៊ីប៉ាស៊ីហ្វិកថ្មី ដែលដឹកនាំដោយសហរដ្ឋអាមេរិក ដែលចាត់ទុកថា ជាការប្រឆាំងទៅនឹងការពង្រីកឥទ្ធិពលដ៏ខ្លាំងក្លា របស់ចិននៅក្នុងតំបន់។

លោក ចូ បៃដិន បានបញ្ជាក់នៅក្នុងសន្និសីទសារព័ត៌មានមួយ ជាមួយ នាយករដ្ឋមន្រ្តីជប៉ុនលោក ហ្វូមីអូ គីស៊ីដា ថា សហរដ្ឋ អាមេរិក-ជប៉ុន រួមជាមួយនឹងប្រទេសចំនួន ១១ ផ្សេងទៀតនឹង ចាប់ផ្តើមក្របខ័ណ្ឌសេដ្ឋកិច្ចឥណ្ឌូប៉ាស៊ីហ្វិកសម្រាប់វិបុលភាព ឬ IPEF។

ប្រធានាធិបតីអាមេរិករូបនេះបានបញ្ជាក់ដូច្នេះថា ក្របខ័ណ្ឌនេះ គឺ ជាការប្តេជ្ញាចិត្តក្នុងការធ្វើការជាមួយមិត្តភក្តិជិតស្និទ្ធ និងដៃគូរបស់ យើងនៅក្នុងតំបន់ លើបញ្ហាប្រឈមដែលមានសារៈសំខាន់បំផុត ក្នុងការធានាការប្រកួតប្រជែងផ្នែកសេដ្ឋកិច្ចក្នុងសតវត្សទី២១ ដែលគ្រោងនឹងដាក់ចេញជាផ្លូវការនូវក្របខណ្ឌនៅថ្ងៃចន្ទសប្តាហ៍ក្រោយ។

យ៉ាងណាមិញ លោក ចូ បៃដិន មិនបាននិយាយថា ប្រទេសណាខ្លះ ដែលបានចុះហត្ថលេខាលើ IPEF រួចហើយ ដែលសេតវិមានកំពុង ចេញសេចក្តីព្រាងក្របខ័ណ្ឌ សម្រាប់អ្វីដែលនឹងក្លាយជាក្រុម ប្រទេស ពាណិជ្ជកម្មដ៏តឹងតែងមួយ។ នាយករដ្ឋមន្ត្រីសិង្ហបុរីលោក លី សៀនឡុង ធ្លាប់បាននិយាយថា ប្រទេសរបស់លោកក៏មាន បំណងចូលរួមជាមួយ IPEF ផងដែរ៕
ប្រភព៖ CNA ប្រែសម្រួល៖ ទីណា និងបុត្រា