ស៊ីអិនអិន៖ ការប្រកួតប្រជែងដើម្បីបន្តជើងហោះហើរអ្នកដំណើរល្បឿនលឿនជាងសំឡេងជិតពីរទសវត្សរ៍ បន្ទាប់ពីការចូលនិវត្តន៍របស់យន្តហោះ Concorde ត្រូវបានផ្តល់ភាពរំភើបរីករាយសាជាថ្មីកាលពីថ្ងៃចន្ទដើមសប្តាហ៍នេះ នៅពេលដែលក្រុមហ៊ុនផលិតយន្តហោះ Bombardier បានបង្ហាញសមិទ្ធិផលល្បឿនលឿន ខណៈបានបញ្ជាក់ពីការបាញ់បង្ហោះយន្តហោះជំនួញថ្មីរបស់ខ្លួន។

ក្រុមហ៊ុនកាណាដាបានបញ្ជាក់ថា យន្តហោះសកល ៨.០០០ (Global 8.000) ដែលកំពុងអភិវឌ្ឍនឹងក្លាយជាយន្តហោះពាណិជ្ជកម្មដំបូង ដែលផលិតក្នុងគោលបំណងធ្វើការហោះហើរក្នុងចម្ងាយឆ្ងាយបំផុត និងលឿនបំផុតរបស់ពិភពលោក។ បើតាមសេចក្តីថ្លែងការណ៍របស់ក្រុមហ៊ុន Bombardier ជាមួយនឹងសមត្ថភាពផ្ទុកអ្នកដំណើរបានរហូតដល់ ១៩នាក់ ក្នុងចម្ងាយ ៨.០០០ម៉ាយល៍ ឬប្រមាណ១៤.៨០០គីឡូម៉ែត្រ យន្តហោះប្រភេទនេះនាពេលខាងមុខ ត្រូវបានគេរំពឹងថា នឹងចូលបម្រើសេវាកម្មនៅឆ្នាំ២០២៥។

ដំណឹងនេះកើតឡើងបន្ទាប់ពីយន្តហោះ ៧.៥០០ (Global 7500) បានហោះហើរទម្លុះរបាំងសំឡេង ក្នុងអំឡុងពេលហោះហើរសាកល្បងកាលពីខែឧសភាឆ្នាំមុន ដោយទទួលបានល្បឿនលើសពី Mach 1.015។ ក្រុមហ៊ុន Bombardier បានអះអាងថា យន្តហោះដែលអមដោយយន្តហោះប្រដេញ NASA F/A-18 ក៏បានក្លាយជាយន្តហោះប្រភេទដឹកជញ្ជូនដំបូងគេដែលហោះហើរលឿនជាងសំឡេងផងដែរ ជាមួយនឹងការប្រើប្រាស់ប្រេងឥន្ធនៈអាកាសចរណ៍ប្រកបដោយនិរន្តរភាព (SAF) ជាលទ្ធផលនៃការហោះហើរ។

លោក Éric Martel ប្រធាន និងជានាយកប្រតិបត្តិនៃក្រុមហ៊ុន Bombardier បាននិយាយនៅក្នុងសេចក្តីថ្លែងការណ៍មួយ ដែលបានចេញផ្សាយកាលពីថ្ងៃចន្ទថា យន្តហោះ Global 8.000 ប្រើប្រាស់នូវលក្ខណៈលេចធ្លោនៃយន្តហោះ Global 7.500 ដោយផ្តល់ឱ្យអតិថិជនរបស់យើងនូវយន្តហោះទំនើបនៃយុគសម័យថ្មី។ ការធ្វើតេស្តហោះហើរសម្រាប់យន្តហោះ Global 8.000 បានចាប់ផ្តើមរួចហើយនៅលើយន្តហោះ Global 7.500។

Bombardier បន្ថែមថា យន្តហោះដែលនឹងមកដល់នាពេលខាងមុខនេះ ក៏នឹងមានកម្ពស់កាប៊ីនដែលស្មើនឹង 2,900ហ្វីតផងដែរ ខណៈយន្តហោះ Global 8.000 គ្រាន់តែជាការវិវឌ្ឍមួយ ក្នុងចំណោមការវិវឌ្ឍន៍ជាច្រើននៅក្នុងកិច្ចខិតខំប្រឹងប្រែងជាច្រើន ដើម្បីបង្កើនល្បឿននៃយន្តហោះដឹកអ្នកដំណើរជាងពីរទសវត្សរ៍ បន្ទាប់ពីយន្តហោះ Concorde បានចូលនិវត្តន៍៕ ប្រភព៖ CNN ប្រែសម្រួល៖ ទីណា និងបុត្រា