កោះកុង៖ កោះទទឹង (Kaoh Totung) គឺជារមណីយដ្ឋាន ទេសចរណ៍ ធម្មជាតិមួយ ដែលមានទីតាំងស្ថិតនៅក្នុងស្រុកគិរីសាគរ ខេត្ត កោះកុង ។ វានៅជិតកោះឆាន់ និងកោះស្ដេចដែរ។ បើនិយាយ អំពី ចំណុចទាក់ទាញ គឺ កោះនេះមានទេសភាព ស្រស់ស្អាតមិនចាញ់ កោះ ដទៃឡើយ។សម្រស់ធម្មជាតិវិញ គឺអ្វីៗនៅទីនោះហាក់ ដូចជា ស្ថិតនៅក្នុងសភាពធម្មជាតិសុទ្ធសាធ។

អ្នកទេសចរដែលចង់ធ្វើដំណើរទៅកាន់តំបន់រមណីយដ្ឋាននេះគឺយើងអាចធ្វើដំណើរតាមអូប័រ ពីផែកោះស្ដេច ឆ្ពោះទៅទិសពាយព្យ ក្នុង ចម្ងាយ ប្រមាណ ៥គីឡូម៉ែត្រប៉ុណ្ណោះ។

តំបន់រមណីយដ្ឋានធម្មជាតិដ៏ល្អឯកមួយកន្លែងនេះមានទំហំប្រមាណមួយគីឡូម៉ែត្រការ៉េគ្របដណ្ដប់ដោយព្រៃឈើព្រឹក្សាលតាវល្លិ៍ប្រកបដោយពណ៌បៃតងស្រស់បំព្រង។ ចំណែកទឹកសមុទ្រ វិញ ពណ៌ ខៀវ ថ្លាដូចកញ្ចក់។វាជាទីកន្លែងលំហែសម្រាប់អ្នកចូលចិត្ត បរិយា កាសស្ងប់ស្ងាត់ ឬ បែបមនោសញ្ចេតនា។

លើផ្ទៃដីមួយហិកតាដែនកោះតូចមួយនេះរំលេចទៅដោយទេសភា ពយ៉ាង ស្រស់ស្អាត ប្លែកភ្នែក កំដរដោយសំឡេងបក្សាបក្សី សំឡេង ស្លឹករុក្ខជាតិក្រោមជំនោរខ្យល់មិនដាច់សូរ និងសំឡេងនៃទឹករលក ម្តងខ្លាំងម្តងខ្សោយប្រៀបដូចជាចង្វាក់ភ្លេង។

ទៅដល់ទីនោះអ្នកទេសចរនឹងបានឃើញពី ទឹកសមុទ្រ ថ្លាឈ្វេង មើលឆ្លុះអស់រុក្ខជាតិសមុទ្រ ផ្កា ថ្ម និង មច្ឆាហែលឆ្វែលឆ្វាត់ ប្រដេញគ្នាទៅមក។ជាតំបន់សម្រស់ធម្មជាតិដ៏ល្អ ស្ទើរតែគ្មានពីរ ។

អ្នកទេសចរនៅពេលទៅដល់រមណីយដ្ឋានកន្លែងនេះ នឹងទទួល អារម្មណ៍ស្ងប់ស្ងៀមប្រកបដោយផាសុខភាពសម្រាប់សម្រាក លំហែកាយរំសាយអស់រាល់បញ្ហាស្មុគស្មាញដែលកើតមានកាលពីមុនមក។

គួរបញ្ជាក់ថាចំណុចសំខាន់ៗនៅ កោះទទឹង មានដូចជា៖ ជិះទូក, បោះជំរុំឬបោះតង់, ស្ទូចត្រី, រៀបចំអាហារដោយខ្លួនឯង, ទស្សនា ឆ្នេរខ្សាច់, គយគន់ថ្ងៃលិច, លេងទឹកឬហែលទឹក, ដើរលេងដោយ ថ្មើរជើង, ទស្សនាទេសភាពព្រៃភ្នំ និងចំណុច ផ្សេងៗទៀត៕ ដោយ៖ ម៉ាដេប៉ូ