ការបោះឆ្នោត ត្រូវបានគេមើលឃើញថា ជាការបង្កើនហានិភ័យនយោបាយកូឡុំប៊ី
ការបោះឆ្នោតជ្រើសរើសប្រធានាធិបតីរបស់ប្រទេសកូឡុំប៊ី ដែលជាការប្រជែងគ្នារវាងអតីតទ័ពព្រៃឆ្វេងនិយម និងមហាសេដ្ឋីអចលនទ្រព្យប្រជានិយម ត្រូវបានគេមើលឃើញថា ជាការបង្កឱ្យមានភាពច្របូកច្របល់ និងទំនងជានឹងបង្កើនហានិភ័យនយោបាយនៅក្នុងប្រទេស។
ដូចដែលបានរំពឹងទុក លោក Gustavo Petro បានឈ្នះជុំទីមួយកាលពីថ្ងៃ អាទិត្យ ជាមួយនឹងសម្លេង ៤០% ។ ជាអតីតអភិបាលក្រុងបូហ្គោតាក្នុងវ័យ ៦២ ឆ្នាំ ដែលកំពុង និងជាមេដឹកនាំឆ្វេងនិយមដំបូងរបស់ប្រទេសកូឡុំប៊ី លោក បានសន្យាថានឹងដំឡើងពន្ធលើអ្នកមាន បញ្ចប់ការរុករកឥន្ធនៈហ្វូស៊ីលថ្មី និងផ្តល់អាទិភាពដល់ការវិនិយោគក្នុងវិស័យកសិកម្ម។
ដោយឡែក បេក្ខភាព ជាគូរប្រជែងរបស់លោកនោះ គឺអ្នកជំនួញមហាសេដ្ឋី និងអតីតអភិបាលក្រុង Bucaramanga គឺលោក Rodolfo Hernandez ទទួលបានតែ ២៨% នៃចំនួនឆ្នោតសរុបប៉ុណ្ណោះ ពោលគឺ ច្រើនជាងតួលេខ ដែលបានព្យាករក្នុងការស្ទង់មតិទ្វេដង នៅក្នុងខែ មេសា។
ដោយសារតែ ជនជាតិកូឡុំប៊ីប្រដូចលោក Hernandez ទៅនឹងលោក ដូណាល់ ត្រាំ ព្រោះបុគ្គលិកលក្ខណៈមិនល្អរបស់លោក និងឧត្តមគតិអភិរក្ស ជាហេតុធ្វើឱ្យធ្លាក់ប្រជាប្រិយភាពវិញក្នុងរយៈពេលប៉ុន្មានថ្ងៃថ្មីៗនេះ។
អ្នកស្រី Karla Schiaffino អ្នកវិភាគជាន់ខ្ពស់នៅអាមេរិកឡាទីននៃវិទ្យាស្ថាន Verisk Maplecroft បាននិយាយថា៖ «លោក Gutiérrez បានបរាជ័យលើគោលនយោបាយសិទ្ធិប្រពៃណី និងគោលនយោបាយUribismo (គោលនយោបាយបង្កើតឡើងដោយប្រធានាធីបតីកូឡុំប៊ីចាស់) ដែលជាជំហាន ដើម្បីឈានទៅជុំបន្ទាប់»។
អ្នកស្រី បានបន្ថែមថា៖ «ដោយឡែក លោក Hernández ដែលទើប បង្ហាញខ្លួនជាអ្នកប្រកួតប្រជែងក្នុងខែចុងក្រោយរហូតឈានដល់ថ្ងៃបោះឆ្នោត បានបង្ហា្ញពីការបដិសេធ ចំពោះនយោបាយប្រពៃណី ដោយជំរុញគាត់ឱ្យនាំមុខ Gutiérrez និងកណ្តាលស្តាំនិយមគឺ លោក Sergio Fajardo ដែលជាអតីតអភិបាលក្រុង Medellín ។ ការបោះឆ្នោតប្រឆាំង នឹងនយោបាយប្រពៃណី ផ្តល់ការលួងលោមតិចតួចសម្រាប់អ្នកវិនិយោគ ដែលកំពុងស្វែងរកឱកាស។ អ្វី ដែលត្រូវរំពឹងពីរដ្ឋាភិបាលបន្ទាប់ គឺមិនគិតពីលទ្ធផលនៃការបោះឆ្នោតបន្ទាប់ឡើយ»។
អ្នកស្រី Schiaffino បានព្យាករថា សម្លេងឆ្នោតរបស់លោក Hernández ទំនងជានឹងកើនឡើងមុនការបោះឆ្នោត ដោយសារតែសំណើសេដ្ឋកិច្ច ដែលអ្នកបោះឆ្នោតកំពុងរពឹងទុក។
ការបោះឆ្នោតនេះកើតឡើងមួយឆ្នាំ បន្ទាប់ពីប្រទេសកូឡុំប៊ី ត្រូវប្រឈមនឹងការតវ៉ា ដោយហឹង្សា ដែលបានបណ្តាលឱ្យមនុស្សយ៉ាងហោចណាស់ ៤៦ នាក់ បានស្លាប់។ នេះបើយោងតាមអង្គការសហប្រជាជាតិ។
ការតវ៉ាប្រឆាំងនេះផងដែរ ក៏បានបណ្ដាលឱ្យមានការយកពន្ធខ្ពស់លើអ្នក ដែលមានចំណូលទាប និងមធ្យម ទាមទារឱ្យមានកំណែលម្អទូលំទូលាយ លើសមភាព និង សេវាសាធារណៈសំខាន់ៗ ដូចជា សុខភាព និងការអប់រំ។
រយៈពេល ១១ ខែកន្លងមកនេះ បើទោះជាគេមើលឃើញមានភាពស្ងប់ស្ងាត់ នៅតាមដងផ្លូវនៃទីក្រុងធំៗរបស់ប្រទេសកូឡុំប៊ីក៏ដោយ ក៏ប្រទេសនេះ អាចនឹងប្រឈមនូវរលកបាតុកម្មថ្មីនៅក្នុងសប្តាហ៍ខាងមុខនេះ ។ នេះបើយោងតាម អ្នកស្រី Schiaffino ។
អ្នកស្រី បាននិយាយថា៖ «តាមទស្សនៈរបស់យើង ហានិភ័យទាំងនេះ នឹងកើនឡើង មុននឹងគេប្រកាសលទ្ធផលនៃការបោះឆ្នោតថ្ងៃទី ១៩ ខែមិថុនា ទៀត។ ប្រសិនបើ លោក Hernández ឈ្នះ ក្តីបារម្ភអំពីភាពមិនលំអៀងនៃដំណើរការបោះឆ្នោត និងភាពត្រឹមត្រូវនៃលទ្ធផលនៃការបោះឆ្នោត នឹងជំរុញឱ្យមានហានិភ័យនៃភាពចលាចលនៅក្នុងតំបន់ទីក្រុងធំៗ ដោយការតវ៉ា ដែលផ្តោតលើរដ្ឋាភិបាល ដែលកំពុងបន្ត និងរដ្ឋាភិបាលថ្មីថែមទៀតផង»។
ការស្ទង់មតិពេលថ្មីៗនេះ កាន់តែបង្ហាញពីការមិនទុកចិត្តកាន់តែខ្លាំងឡើងនៅក្នុងស្ថាប័នភាគច្រើនរបស់ប្រទេស រួមទាំងសមាជ គណបក្សនយោបាយ ប៉ូលីស យោធា សារព័ត៌មាន និងមន្ត្រីអត្រានុកូលដ្ឋានជាតិ ដែលជាស្ថាប័នបោះឆ្នោតដ៏សំខាន់មួយ។
ទន្ទឹមនឹងនេះ គេក៏ចាប់ផ្ដើមឃើញមានអំពើហិង្សា ដែលរាប់បញ្ចូលទាំងបទបញ្ជាស្នាក់នៅក្នុងផ្ទះ ដែលចេញ ដោយក្រុមឧក្រិដ្ឋជនកាលពីដើមខែនេះ ដែលបានធ្វើឱ្យមួយផ្នែកធំនៃប្រទេសនេះ ជាប់គាំងយ៉ាងហោចណាស់បួនថ្ងៃ។
ប្រភព៖ New York Times
