តុលាការអ៊ុយក្រែនរកឃើញទាហានរុស្ស៊ី២នាក់មានទោសឧក្រិដ្ឋកម្មសង្គ្រាម
តុលាការអ៊ុយក្រែនកាត់ទោសទាហានរុស្ស៊ី ២នាក់ ដែលត្រូវបានចាប់ខ្លួនឱ្យជាប់គុកជាង ១១ឆ្នាំរៀងៗខ្លួន ពីបទបាញ់ផ្លោងលើតំបន់ជនស៊ីវិលនៅភាគខាងកើតប្រទេស។
ការកាត់ទោសកាលពីថ្ងៃអង្គារលើទាហានរុស្ស៊ីឈ្មោះ Alexander Bobikin និង Alexander Ivanov គឺជាសាលក្រមទី២ ដែលធ្វើឡើងក្នុងសវនាការឧក្រិដ្ឋកម្មសង្គ្រាមដោយអ៊ុយក្រែន ចាប់តាំងពីរុស្ស៊ីបើកការឈ្លានពាននៅចុងខែកុម្ភៈ។ ទាហានទាំង ២ ត្រូវបានរកឃើញថា «បំពានច្បាប់ និងក្បួនខ្នាតនៃសង្រ្គាម» កាលពីសប្ដាហ៍មុន។
លោកចៅក្រុម Evhen Bolybok និយាយថា៖ «កំហុសរបស់ Bobikin និង Ivanov ត្រូវបានបញ្ជាក់យ៉ាងពេញលេញ»។ ប៉ុន្តែមិនទាន់មានការឆ្លើយតបយ៉ាងណាចំពោះការវិនិច្ឆ័យពីទីក្រុងម៉ូស្គូនៅឡើយទេ។
ទាហានទាំង២ទទួលស្គាល់ថា ខ្លួនគឺជាផ្នែកមួយនៃកងកាំភ្លើងធំ ដែលបាញ់ទៅលើគោលដៅក្នុងទីក្រុង Kharkiv ភាគឦសានអ៊ុយក្រែនពីតំបន់រុស្ស៊ី Belgorod ដែលនៅជិតក្រុង។ រដ្ឋអាជ្ញានិយាយថា ការបាញ់ផ្លោង បានបំផ្លាញសាលារៀនមួយកន្លែង ប៉ុន្តែមិនបណ្តាលឱ្យមានអ្នករងរបួសនោះទេ។ ទាំង Bobikin និង Ivanov ដែលជាអ្នកកាន់កាំភ្លើងធំ និងជាខ្មាន់កាំភ្លើង ត្រូវបានចាប់ខ្លួនក្រោយពីអ្នកទាំង២ឆ្លងព្រំដែនមកអ៊ុយក្រែនហើយបន្តការបាញ់ផ្លោង។
រដ្ឋអាជ្ញាស្នើសុំឱ្យតុលាការដាក់ពន្ធនាគារទាហានរុស្ស៊ីទាំង២រយៈពេល១២ ឆ្នាំ ខណៈដែលមេធាវីការពារក្តីស្នើសុំឱ្យមានការបន្ធូរបន្ថយ ដោយនិយាយថា ទាហានទាំង២ធ្វើតាមបញ្ជាប៉ុណ្ណោះ។
រឿងក្ដីចុងក្រោយ ធ្វើឡើងបន្ទាប់ពីតុលារការក្រុងកៀវកាលពីសប្តាហ៍មុន កាត់ទោសទាហានរុស្ស៊ីអាយុ២១ឆ្នាំម្នាក់ ឈ្មោះVadim Shishimarin ឱ្យជាប់គុកអស់មួយជីវិត ពីបទសម្លាប់បុរសជនជាតិអ៊ុយក្រែនដែលគ្មានអាវុធម្នាក់ចំក្បាល។ មេធាវីរបស់លោកនិយាយថាខ្លួននឹងប្ដឹងឧទ្ធរណ៍ជំទាស់នឹងសាលក្រមនេះ។
សំណុំរឿងក្ដីបែបនេះ ត្រូវបានគេរំពឹងទុកទាំងនៅអ៊ុយក្រែន និងនៅរុស្ស៊ីផ្ទាល់ ដែលតែងតែបដិសេធថាកងកម្លាំងរបស់ខ្លួនមិនបានកំណត់គោលដៅលើជនស៊ីវិលឬប្រព្រឹត្តឧក្រិដ្ឋកម្មសង្គ្រាម។ ប៉ុន្តែរុស្ស៊ីត្រូវបានគេជឿថា កំពុងរៀបចំការកាត់ទោសឧក្រិដ្ឋកម្មសង្គ្រាមលើទាហានអ៊ុយក្រែនដែលខ្លួនចាប់បាន។
ការិយាល័យអគ្គរដ្ឋអាជ្ញាអ៊ុយក្រែននិយាយថា ខ្លួនកំពុងស៊ើបអង្កេតសំណុំរឿងជាង ១៤ ០០០ ករណីនៃឧក្រិដ្ឋកម្មសង្រ្គាម ដែលគេចោទប្រកាន់ថា ទ័ពរុស្ស៊ីជាអ្នកធ្វើ។ យោងតាមអង្គការសហប្រជាជាតិ ជនស៊ីវិលជាង៤ ០០០ នាក់ត្រូវបានសម្លាប់នៅអ៊ុយក្រែនចាប់តាំងពីប្រធានាធិបតី វ្ល៉ាឌីមៀ ពូទីន ចាប់ផ្តើមប្រតិបត្តិការវាយលុក។ ចំនួនអ្នកស្លាប់នេះរួមទាំងអ្នកដែលត្រូវបានគេសម្លាប់ ក្រោមការចោទប្រកាន់លើឧក្រិដ្ឋកម្មសង្រ្គាមចំពោះកងកម្លាំងរុស្ស៊ី ដូចជានៅទីក្រុង Mariupol និង Bucha ជាដើម។
ប្រភព៖ Aljazeera
