ស្ថានបេសកកម្មអចិន្ត្រៃយ៍កម្ពុជាច្រានចោលការលើកឡើងរបស់អ្នកនាំពាក្យនៃការិយាល័យឧត្ដមស្នងការទទួលបន្ទុកសិទ្ធិមនុស្ស គឺពុំត្រឹមត្រូវ ធ្វើនយោបាយូបនីកម្មនិងជ្រើសរើសតែមួយជ្រុង
ភ្នំពេញ៖ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជាប្រចាំអង្គការសហប្រជាជាតិនិងអង្គការអន្តរជាតិនានានៅទីក្រុងហ្សឺណែវ បានច្រានចោលទាំងស្រុងនូវការអត្ថាធិប្បាយដែលមិនត្រឹមត្រូវ ធ្វើនយោបាយូបនីយកម្ម ជ្រើសរើសតែមួយជ្រុង កាលពីថ្ងៃទី០២ ខែមិថុនា ឆ្នាំ២០២២របស់អ្នកនាំពាក្យ របស់ការិយាល័យឧត្ដមស្នងការទទួលបន្ទុកសិទ្ធិមនុស្ស លោកស្រី Liz Throssell នៅមុនការបោះឆ្នោត ឃុំ-សង្កាត់នៅកម្ពុជា។នេះបើយោងតាមសេចក្តីថ្លែងការណ៍ព័ត៌មានរបស់ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជាប្រចាំអង្គការសហប្រជាជាតិនិងអង្គការអន្តរជាតិនៅថ្ងៃទី៣ ខែមិថុនា ឆ្នាំ២០២២។
ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជាបានធ្វើការបកស្រាយបំភ្លឺរបស់ស្ថានបេសកកម្ម ចំពោះការអត្ថាធិប្បាយខុសឆ្គងទាំងស្រុងរបស់លោកស្រីអ្នកនាំពាក្យដូចតទៅ ៖
១. ការជ្រើសរើសពេលវេលាអត្ថាធិប្បាយរបស់លោកស្រី បង្កឱ្យមានការចោទជាសំណួរ ព្រោះការធ្វើអត្ថាធិប្បាយនេះធ្វើឡើងបន្ទាប់ពីមានរបាយការណ៍នៃការប៉ុនប៉ងធ្វើវិទ្ធង្សនាដំណើរការបោះឆ្នោតឃុំ-សង្កាត់នៅកម្ពុជា ត្រូវទទួលបរាជ័យ។ ការវាយតម្លៃប្រចាំថ្ងៃរបស់គណៈកម្មាធិការជាតិរៀបចំការបោះឆ្នោត បានបញ្ជាក់ឱ្យឃើញថា យុទ្ធនាការឃោសនាបោះឆ្នោតក្នុងរយៈពេល១៣ថ្ងៃកន្លងមកនេះជាទូទៅបានប្រព្រឹត្តិទៅក្នុងបរិយាកាសប្រកបដោយសន្តិសុខ សុវត្ថិភាព សណ្ដាប់ធ្នាប់ត្រឹមត្រូវ និងសន្តិវិធី ដោយគ្មានការបំភិតបំភ័យ។ ក្នុងរយៈពេលនៃយុទ្ធនាការឃោសនាបោះឆ្នោត រួមទាំងថ្ងៃបិទបញ្ចប់ផងដែរ គ្រប់គណបក្សទាំងអស់រួមទាំងបក្សប្រឆាំង បានប្រើប្រាស់សិទ្ធិរបស់ខ្លួនពេញលេញស្របតាមច្បាប់ និងកម្មវិធីស្នើសុំដោយពុំមានការគម្រាមកំហែង និងការរារាំង។
២. ការអះអាងរបស់អ្នកនាំពាក្យដែលថាបេក្ខជនមួយចំនួនត្រូវទទួលរងការរឹតត្បិតនិងបំភិតបំភ័យ គឺជាការមិនសមហេតុផលទាល់តែសោះ។ ពាក្យបណ្ដឹងតវ៉ាពីបេក្ខជនចូលរួមការប្រកួតប្រជែងការបោះឆ្នោត ជាសក្ខីភាពបង្ហាញឱ្យឃើញពីការអនុវត្តប្រកបដោយភាពចាស់ទុំ និងស្របច្បាប់ នៃលទ្ធិប្រជាធិបតេយ្យ និងសិទ្ធិជាមូលដ្ឋានរបស់ពួកគាត់។ ពាក្យបណ្ដឹងទាំងនោះពុំគួរត្រូវបានចាត់ទុក ជាការសងសឹក និងជាការរារាំង ប្រឆាំងក្រុមណាមួយនោះទេ។ សិទ្ធិចូលរួមក្នុងកិច្ចការសាធារណៈពុំមានន័យស្មើនឹង សិទ្ធិក្លែងបន្លំឯកសារ បរិហារកេរិ៍ត និងជេរប្រមាថ និងញុះញុងឱ្យមានការរើសអើង អំពើហិង្សា និងការស្អប់ខ្ពើមគ្នា នោះឡើយ។ សម្ព័ន្ធភាពជាមួយគណបក្សនយោបាយណាមួយ ពុំមែនជាអាជ្ញាប័ណ្ណ ដើម្បីបំពានច្បាប់ដោយនិទណ្ឌភាពនោះទេ។
៣.ការចោទប្រកាន់របស់អ្នកនាំពាក្យខាងលើដែលថា បេក្ខជនគណបក្សប្រឆាំងស្ទាក់ស្ទើរក្នុងការដាក់ពាក្យបណ្ដឹង គឺពុំត្រឹមត្រូវនោះទេ។ ការពិតគឺ ក្នុងពេលដែលលោកស្រីកំពុងតែថ្លែងរិះគន់បែបនេះពីកម្ពុជា គណៈកម្មាធិការជាតិរៀបចំការបោះឆ្នោតបានកាត់សេចក្ដីសម្រេចស្របតាមពាក្យបណ្តឹងតវ៉ារបស់បេក្ខជនបក្សប្រឆាំងគឺលុបចោលការពិន័យជាប្រាក់និងបានសម្រេចរក្សាសិទ្ធិបោះឆ្នោតនិងឈ្មោះក្នុងបញ្ជីបោះឆ្នោតរបស់បេក្ខជនបក្សប្រឆាំងចំនួន១៥រូប ដែលបាននាំគ្នាផ្តល់អំណោយជាថវិកា ក្នុងអំឡុងពេលយុទ្ធនាការឃោសនាបោះឆ្នោត។
៤. សេចក្ដីថ្លែងការណ៍របស់អ្នកនាំពាក្យខាងលើពោរពេញទៅដោយព័ត៌មានខុសឆ្គងជាច្រើន និងជ្រើសរើសតែមួយជ្រុង។ លោកស្រីពុំបានទទួលស្គាល់ទាល់តែសោះថា យ៉ាងហោចណាស់ ថ្នាក់ដឹកនាំអតីតបក្សប្រឆាំង៣២ រូប ទទួលបានសិទ្ធិធ្វើនយោបាយឡើងវិញ ដែលក្នុងនោះ ពួកគាត់ជាច្រើនរូបបានបង្កើតគណបក្ស នយោបាយថ្មីបន្ថែមចំនួនប្រាំមួយ ចូលរួមប្រកួតប្រជែងជាមួយគណបក្សកាន់អំណាច ក្នុងការបោះឆ្នោតនេះ។ ផ្ទុយទៅវិញ ស្ថាប័ន របស់លោកស្រីបែរជាអត់ឱននិងមិនហ៊ានរិះគន់ការរំលោភបំពានយ៉ាងគឃ្លើនរបស់ទណ្ឌិត សម រង្ស៊ី លើសិទ្ធិនយោបាយរបស់អ្នកដទៃ ដោយបានចាត់ទុក អ្នកដែលស្វែងរកការស្ដារនីតិសម្បទាសិទ្ធិនយោបាយ ថា ជា “ជនក្បត់”។
៥. ការគោរពគោលការណ៍សត្យានុម័ត ភាពមិនលំអៀង និងមិនជ្រើសរើសតែមួយជ្រុង របស់អ្នកនាំពាក្យ ត្រូវបានចោទជាបញ្ហា ។ ការអធិប្បាយរបស់លោកស្រី បានគាំទ្រគណបក្សមួយថា ជាគណបក្សប្រឆាំងដ៏សំខាន់នាពេលបច្ចុប្បន្ននៅកម្ពុជា ដោយមើលស្រាលគណបក្សដទៃផ្សេងទៀត។ ជាងនេះទៅទៀត អវត្តមាននៃគណបក្សនយោបាយមួយក្នុងការបោះឆ្នោត ដោយសារការបំពានច្បាប់ ពុំបានធ្វើឱ្យកម្ពុជាងាកចេញពីប្រព័ន្ធពហុបក្សឡើយ។ មិនថាលទ្ធផលបែបណា ការពិតមួយដែលមិនអាចប្រកែកបាននោះគឺ អ្នកបោះឆ្នោតអាចជ្រើសរើសគណបក្សមួយក្នុងចំណោមគណបក្ស១៧ ដែលបានចុះឈ្មោះប្រកួតប្រជែង ហើយដែលមានសិទ្ធិនយោបាយនិងសេចក្ដីថ្លៃថ្នូស្មើៗគ្នា និងត្រូវតែទទួលបានការគោរពដូចៗគ្នា មិនថាបក្សធំ ឬបក្សតូចឡើយ។
ការិយាល័យឧត្តមស្នងការទទួលបន្ទុកសិទ្ធិមនុស្សចាំបាច់ត្រូវបំពេញអាណត្តិរបស់ខ្លួនដោយអនុលោមតាមសេចក្ដីសម្រេចចិត្តរបស់មហាសន្និបាតអង្គការសហប្រជាជាតិ លេខ A/RES/48/141 ដែលបង្កើតស្ថាប័ននេះឡើងដោយតម្រូវឱ្យការិយាល័យនេះបំពេញមុខងារក្រោមធម្មនុញ្ញអង្គការសហប្រជាជាតិ និងអនុវត្តកាតព្វកិច្ចគោរពអធិបតេយ្យភាព និងដែនយុត្តាធិការរបស់បណ្ដារដ្ឋ។ កិច្ចសហប្រតិបត្តិការពិតប្រាកដដោយគ្មានរបៀបវារៈលាក់កំបាំងគឺជាអ្វីដែលគេរំពឹងថា នឹងទទួលបានពីគ្រប់ទីភ្នាក់ងារទាំងអស់របស់អង្គការសហប្រជាជាតិ ដែលមានតួនាទីគាំទ្រ មិនជ្រៀតជ្រែកកិច្ចការផ្ទៃក្នុងរបស់រដ្ឋជាសមាជិកឡើយ។
ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជាបានបញ្ជាក់ថា កម្ពុជាបន្តបេ្ដជ្ញាយ៉ាងមុតមាំក្នុងការបន្តដំណើរលទ្ធិប្រជាធិបតេយ្យនិងប្រព័ន្ធពហុបក្សដែលឥតងាករេរបស់ខ្លួន ទាំងក្នុងដំណើរការបោះឆ្នោតនៅឆ្នាំនេះ និងឆ្នាំបន្ទាប់ ឱ្យប្រព្រឹត្តទៅដោយសេរី យុត្តិធម៌ មានសណ្ដាប់ធ្នាប់ សន្តិវិធី និងតម្លាភាព៕ដោយៈ ពលជ័យ,សួង ពិសិដ្ឋ